1 Ookkoneechchinni uduma jabaka baalooma afe'ek weli lumok iimik erganji iimi'ni dagaa wodda afennen; isike gaachchannanaa'n kexxeexxinni butta wa'a hite iffe. 2 Iisinna hafuura gikki asseexxi hiyya'ni cancee qici, «Iitti Lumoxxi Baabiloon ibbe! Ibbe!, Fuggoke hafuuruwwi galdumi, battuwwati hafuuruwwi duuchchi irko, battuwwatixxinna diqachchiissaaxxe ci'uwwa duuchchike galduma kadde. 3 Arduwwi duuchchi isexxe yabaabulexxee mufetexxa woyinetixxa booka ha'wemmaxxe buttatik moyanjiwwi isenni welti yababule'een; buttatixxi daddaltonna isexxe danqasha galanaa'ni kexxeexxa duronde'een.»

4 Ookkone uduma iiminaa'n weli haaso'i hiyya'naa laqenne,

«Anke arda isexxe cubbonni mittondinabaashsha

isexxe balanaa'ninna qoodendinabaashsha

ise giddii'n fulle.

5 Cubbo isixxe iimi qico'n tuulende'een,

Magenikinna xaqaro isexxa qaabate'een.

6 Uutemmaxxe qixxe'n badoo ise'a hiissenne;

hujemmaxxe duuchchiinxeenna dachcha'a anga ise'a uwwenne;

makkemmaxxe buuda'n lame anga ise'a makke.

7 Ise umo ifika ifi ulfeessanna danqasha gala uutemmaxxe qixxen

saldotanna yaaddo ise'a uwwe.

Isenna qalbe giddo hitee qici,

‹Giitettishsha ofo'lenne;

Ani aro'okanna shiwwiteexxe manjobaan› hita'n ifi dukke.

8 Tennexxee baluwwa mitte barra ise'n dagga;

reyo yaadotinna solo'i ise'n geyaan;

Ise'n muraak Gootti Mageni lumoke kademmaxxee

ise giirate'ni gubattaan.

9 «Isenni welti yabaabulekiirinna danqasha galeek buttatik moyanjuwwi ise gubataa wodda iimi'a tuqutuqu hitaaxxa wiliille undaa wodda isexxee oo'naan; yaandaan. 10 Isexxa seldonna sodaatiyyot bayya uurrineexxi hinaa qici,

« ‹Koo ati lumoke qachcha ati'a aanne'e! Ati'a aanne'e!

Ati koo Baabiloonike lumoke qachcha

Murte ate'ni mitte sa'aate giddo dage'een› hina'n haasonaan.

11 «Ifixxe hoboluwwaxxa ba'o ta'inni edi'a insa'nee'ni hidhdhaak hedha gophemmaxxee buttatixxi dadaltonna isexxee ooxxaan, yaadaan. 12 Hoboluwwa insa'nexxe'ni fenemmalchuwwi worqe, birreti sibiljo, hiri fiixeeka kinjo, fiixeek ulfaateek kinji, eloxxa layinotixxa semma, badeesite seemma, haarretixxi seemma, diimoxxa seemma, fishaallo haqquwwa duuchchi, arbiinxe issonna'ni, fiixxa haqqichchuwwina'ni, sageetotena'ninna sibljokenaa'n cabbetike golalook kinjinni hujemeek miyuwwi duuchchi. 13 Qarafa, qurunfuduwwa fishshaaka haqichcho, karbe, hixaani, woyinetixxa booka, ejersiinxa zayite, bulle, dinne, horuwwi, gedhebi, fadhadi, fadhdinxi gaaruwwa, garbuwwinna wele mannaramman.

14 «Daddaltotinna isee, ‹Ati halchitettexxi elola yaane atenanaa'ni bayyateen; karra atixxinna elolammi atik dancheefachchotik miyi duuchchi ba'edheen; ta'anni edi'a konnelchuwwa hara alfitabexxo› hittaan. 15 Konnelchuwwa duuchcha gurgudhdhitanni isenni duroondeexxi daddalto seldo isixxa sodaateexxi bayyate uurritaan; insa'nenna oonaan; yaandaan. 16 Insa'nenna hafuurakanna gikki assiteexxi,

« ‹Eloxxi layinotixxe seemma, baddeesitenna diimooxxa seemma oddo'witemmaxxi

worqe, fiixa ulfattexxa kinonna dancha inqute hinaak fiixa kinjinni danchoomeemmake

ookkone lumoke qachchi'a aanne'e! Aanne'e!

17 Iitti karra duuchchi mitte sa'aate giddo baxxeen.›

«Hoboluwwatiki ajajalluwwi duuchchi hobuluwate'n me'ammak manni duuchchi hoboluwwate'n abbaayyate'n hujaak hujalluwwi duuchchi bayyante uurrinaan. 18 Ise gubataa wodda tuqu tuqu hitaaxxa wiliille undaa wodda ‹Iitta hedheek lumok qachchi hara haba hedhe?› hina'nee rarraan. 19 Insa'nenna ifi ifike umo'ni buko fiffilxina'n oona'ninna yaandaa'n

« ‹Abbaayyate'ni hana hobolo afeedheek duuchchi

isexxe karranni duromeekiir

ookkone lumoke qachchi'a aanne'e! Aanne'e!

Mitte saate giddo baxxeen.

20 Tee iima ise hana gammadi!

ha'no woyyoole wabeekonna ergameeyye gammadde.

Ise hoo'ni geessissemmaxxe yaane'a Mageni ise'ni mureen› » hiyye.

21 Ookkoneechchi uduma mitti lumk iimik erganji lumooka daamiinika kinjo fakkataaka kinjo aadheexxi abbaayyate'n darba'n hiyyee qici:

«Iikki lumok qachchi Baabiloon

iitta hexxeexxe hunnanni darbemaan;

ta'anni edi'a haranga afemabaan.

22 Bagana gana'neekiirinna sirbiinke mannik hafuuri

suusulletikinna malagata ufuufammake mannik hafuuri

Ta'anni edi'a ati giddo hara laqemaba'a;

angatixxe ogek manni

Ati giddo langaxxa afemaba'a;

daamiik hafuurinna

ta'anni edi'a ati giddo laqemaba'a.

23 Xassiink ifi

ta'anni edi'a ati giddo hara ifeemabaan;

Waajubichchinkinna waajubichchotik hafuuri

ta'anni edi'a ati giddo laqemaba'a;

Dadalto atixxir lumollamma butta duuchchike mannamman;

atixxe gojonninna arduwwa duuchcha dhedhake'ni ibesse'een.

24 Ise giddo wabeekkotixxinna qulliyyetixxi iittanni

buttate'n shiyemeeke mannixxi munde duuchchi afende» hiyye.