1 Yoonaasinna qulxu'metike godobi giddo hedheexxi isika Duuchchi Woddika Gootta Mageno;

2 «Ee anke Duuchchi Woddike Gootta! Rakko giddo hedhe atee ye'edhenneni;

Atinna laqqe hiissiteten;

Reyeeki manni hedhammaxxe bale giddo hedhe,

Atibaa raarennen;

ookko'ni atinna laqqeetten.

3 Abbaayyatixxe dhi'mo'ni hundetten;

wodi'ikinna anee liqiinseen;

yaasumuwwi qarqara anka qoqqobe;

Danbala'i atikinna hobonbalte atixxi

ani iimi'ni saxxaashsha assitetten.

4 ‹Ani ati edii'ni ba'enneshsha hedennen;

kaddo malee ati haarooba,

Atike woyyichcha Galma

uudanno› hiyyenne.

5 Wodi'i goobin qico'ni ane'n geyeen;

abbaayyatixxi dhi'monna anee liqinsiteen;

abbaayya giddixxi badda'uwwa umo anke'ni mirqendeen.

6 Abbaayyati hunda sa'ennen;

ookkoonna duuchchi woddi'a sila gatannoshshatemman;

Ati kinni anke Duuchchi Woddike Gootta Mageno!

Wode'iinxe dhi'monaa'ni lubbondinni anee gatissetten.

7 «Hedho anxi butti'a higga'n me'ite wodda, Ee

Duuchchi Woddike Gootta atee qaabbatenne;

Soodachcho anxinna atike,

woyyichcha atike galmibaa iimi'a gelte.

8 «Dharichchaa woyi fulabaaka magenuwwa magenoonfataaki duuchchi

alfiyyo hasisammaka badhaadha gophaan.

9 Ani kinni galatiinxe faaronni,

tolcha ati'a tolchanno;

Ati'a weeregenneka werreeganna uwwanno;

anjirensha anxinna Duuchchi Woddike Goottinaa'nite.»

10 Ookkonneechchi uduma Duuchchi Woddik Gootti qulxu'me Yoonaasi tuffaashsha ajaje; qulxu'metinna bago boonno'ni tuffe.