1 Dada Duuchchiki Duuchchi Woddik Gootti Eedoomixxee hiyya'nee qici:

Duuchchi Woddike Goottanaa'n erga lanqennen;

Erganjikinna gosa gosake ardibaa ergemee

hiyya'nee qici:

«Ke'we; isee lollonaa fullo.»

2 «Kunnise ani atee'e gosa gosake ardi giddo horoondaboxxoshsha assannon;

haratanga ati tuffatendeetke kaddaton.

3 Ati baqaqa kinoti giddo

hexxaateke,

galduma atikanna xungoti iima assexxeeteke,

Ati ifi'aani qalbe giddo,

‹Ate anee butti'a dirrisa dande'aaki?› hitaateke

atixxe qalbexxi ifiduka atee sobbe'een.

4 Sinbiriinsha keelik iim'a kexxootole,

urjuwwati giddonna galduma atika assexxootole,

ookko'ninni ani atee butti'a dirrisannon,»

hiyya'neen Duuchchi Woddik Gootti.

5 «Moodha'lishshe atibaa daggeele,

mulqedhaak manni hashsha e'yeele,

Mooraak insa'ne geyaa qico callabaataa?

Woyinetixxa gumma qocedhaakir atiba dageele,

Feshshi'linaachcho gatisabaa hiyyotee?

Atee kinni hitta hexxeexxe ba'ne heqqita'netaa!

6 Yaane kinni Eesaawu hittaa mulqemee?

Isi sho'eemmaxxi karranna hittatata mulqende.

7 Jaaluwwi atik duuchchi gabalatiba'a ate dhiibaan,

hariyya atixxiirinna atee sonbaan; ate'ni hunna hortaan;

Qore atixxenaa'n iteekirinna fonxoro ati'a fayaan;

ati kinni tenne egendeboxxon.

8 «Eettenne barra» hiyya'neeni Duuchchi Woddik Gootti,

«Eedoomike boganaa'n beekkoole,

Eesaawuxxe koobanaa'ni qalbeeffachcho afeeka manna balleessanon.

9 Tee Temaani atik loliink manni duuchchi culphisaan;

Eesaawuxxe kooba'n hedhaak duuchchinna,

shiyemee ba'aan.

10 Dayyo atike Ya'iqoobi'n assitetaxxe xaqaroxxee,

shookee shooko oddo'witatton;

duuchchi woddi'anna ati baxxatton.

11 Alagi karra atixxa gudhdhe me'aa wodda,

annafee bogik manni atixxe hulanaa'n e'yeexxi,

Iyyerusaalemi'n hixa iblsaa wodda,

eettene barra ati bayyatee uuritee uudeten;

atinna insa'nenaa'n mittekemman.

12 Fuggoxxi iso'ni daggeexxa barra,

atike dayyixxe wixixxii'ni silaati gammadatabaan;

Ba'ne insa'ne'ni geltee'naa Yihudake ardi yaadaa wodda,

silaati ililisatabaan,

Insa'ne wixixxi hineexxa barranna,

hollati ifi dukke haasottaabaan.

13 Insa'nexxe ba'nexxa barra,

anke ardixxa hula silaati e'yitatabaan;

Ba'ne insa'ne'ni gelteexxa barra,

wixixxi hiyya insa'nexxe'ni silaa gammadattabaan;

Insa'neexxe ba'nexxe barra'ni,

silaati karra insa'nexxa saandatabaan.

14 Insa'neka baajammakaara shiyaatee

weldeenate'n silaati heqqitatabaan;

Insa'nexxe wixixxiitixxe barra'ni

hafe gateemmakaara silaati sa'issite uutatabaan.✝

15 «Gosa gosake arda duuchcha'n

Duuchchi Woddike Goottixxi barra gelte'een

Ati assiteeteshshanni ate'ninna iitanni assendaan;

fuggoxxi huje atixxi umo atinge'ni higgaan.

16 Ha'no anxe woyyitte kooba hana rakko ha'witineemmashshanni,

gosa gosak ardi duuchchinna duuchchi wodda saxxeexxa rakko ha'waan;

Insa'ne ha'winee, tuchchiinsaan;

konne edo kande egenebaa qiconna kandee mundaan.

17 Yaane kinni Tsiyoonixxe kooba'n leexxa fula kaddaan;

Ya'iqoobik ardi isi woyyichchake kadaan;

qadaada insa'nekanna dhalaan.

18 Ya'iqoobik ardi giira,

Yoosefik ardinna bubenjoke kadaan;

Eesaawuk ardi huurake kadaan;

Insa'nenna isoo gunbaan; isoo indaan;

Eesawuke ardinaa'n ayyinnna gataak hedhebaan.»

Tenne haaso'eki Duuchchi Woddik Goottan.

19 Bita'ik ardi,

Eesaawuxxa kooba abixaan;

Eettene kooba hunda hedheek manninna,

Filisixeemike ardika boga dhaalaan;

Efireemike mannikanna Semaariyake mannika fichcha abixxinaan;

Biniyaaminna Gele'adika boga dhaalaan.

20 Kenaanike boga'n booji'ende hexxeexxi tinni Isira'eelixxi gamo,

Seraaphita qico'ni hedheeka boga dhaaldaan;

Seeferadimi giddo hedheek booji'emeek Iyyerusaalemik ardinna,

Bita'ika qachchuwwa dhaalaan.

21 Eesaawuxxa koobuwwa galchatee,

anjiralluwwi Tsiyoonixxe koobabaa qabataan;

mootumma iittinna Duuchchi Woddike Goottixxe kaddaan.