1 Ookkone baro'ni eettene yanna'ni

Yihudaxxanna Iyyerusaalemixxa booji'o hiissanno wodda,

2 Gosa gosaka arduwwa duuchcha bukki assannon;

Iyyoosaafixxixxe dhooqa giddi'anna insa'ne iyyedagannon;

anka qadaada, Isira'eelike ardixxee,

Ookko insa'ne'ni muronna'aa e'yannon, tinni kaddaachchi insa'ne

boga anka qodendeemmaxxe

arda ankanna arduwwi giddo xexxeeremmaxxeeten.

3 Insa'nenna anke arda'n hixa iblisine'een;

labaxxa oosenna yabaabultuwwatike hiri'a uune;

woyitixxa booka ha'wiyyoteenna meyyaxxa oose gurgudhine.

4 «Tee Xiroosinna Sidoona iittanni ha'no Filisixeemixxe galchuwwake arda duuchcha ane'ni maa afine'e? Assennexxe yaanexxee ane'n halo fuldino'aate? Halo fuldina'neexxe kaddoole rakkennexxi iikki woddi ha'no assitinemmaxxa ha'no'ninni wirri asse hiissannon.✝ 5 Anka birretika sibljonna anxa worqe adhdhitine'een; mellemeeka anka miyuwwanna gudhdhitineexxi ha'noke galmuwwi giddo e'yishineen. 6 Insa'neke boginaa'n bayyissino'a Yihudiinkanna Iyyerusaalemika manna Girkeeke manna'ni gurgudhitineen.

7 «Kunnise insa'ne gurgurtinemmake bonchuwwanaa'n insa'nee ke'issannon; ha'nonna assitinemmaxxa umo ha'nonge'n hiissano. 8 Aninna labbaxxanna meyyaxxa ha'nooxxa oose Yihudiinke arda'n gurgurannon; insa'nenna oose ha'nooxxa bayya hedheeke Saabake manna'n gurgurdhinaan» Duuchchi Woddik Gootti tenne haaso'eedheen.

9 Konneechchi butta hexxeexxa tennee gosa gosake ardi'a lasse:

bagedokee qixxeeffatte

Loliinka mannanna dammasse;

loliink manni duuchchinna shiqeexxi lolowwaal.

10 Qotto ha'nooxxi wolaantichchake

haanto ha'nooxxinna bagedoke kaddo'a tumme;

Goof manjinna

«Ani worbaken» hiyyowwaal✝

11 Ha'no qarqarake'ni hexxineek gosa gosak ardi duuchchiing

rakkine amme; ookkonna bukki hiyye.

Ee, Duuchchi Woddike Goottaa atika loliinka manna adade ergi.

12 «Gosa gosak ardi ke'owwaal;

Iyyoosaafixxixxe dhooqaba'aanna reke dirrowwaal;

qarqarake'ni hedheeke gosa gosake arda duuchcha'ni murronna'a ookko ofo'lannon.

13 Insa'nexxi fuggo hara birasaxxe'een;

haantot midha haandaammashsha insa'ne haamme;

Woyine miicatixxi bakka'n wo'mite hirbeesendammashsha insa'nenna hirbeesse!»✝

14 Duuchchi Woddike Goottixxi barra murtetixxe dhooqa'n sheqqeemmaxxee lumooshsha heddi ardi ookko bukki hiyye'een.

15 Arishshotinna agenji dukkananna

urjuwwa konneechchi edi'a ifissabaan.

16 Duuchchi Woddik Gootti Tsiyooninaa'n hafuura gikki asse haaso'aan;

Iyyerusaaleminaa'n dindimaan;

iimatinna butta raankitaan;

Duuchchi Woddik Gootti kinni arda ifikee gollake

Isira'eelike ardi'anna gollake kadaan.✝

17 «Ookkonechchi uduma ani Duuchchi Woddiki Gootti ha'nook Mageni

Woyyitte anxe kooba'ni Tsiyooni'ni hadhannoxxa egendinaan;

Iyyerusaalemi woyyitte kaddaan;

ta'an edi'a alagi isee injifatabaan.

18 «Ookonne wodda woyinetixxi bookka koobuwwatenaa'n cocobbaan;

tulliuchchuwwakenaa'ninna ado phu'wisaan;

Yihuda giddo hexxeexxe dhooquwwa duuchcha wode'e lolaassaan;

Duuchchi Woddike Goottike minenaa'n muumme burqitaan;

Shiximixxa dhooqa'ninna yaataan.

19 Boga insa'neke'n qullitte munde dhangalaasiyyot

Yihudake arda'n assineexxe fuggoxxee

Gibtsee urimitaan,

Eedoominna qiilla gammoojje kaddaan.

20 Yihuda duuchchi woddi'a,

Iyyerusaaleminna ila duuchchi'a galdumiinxe bakka kaddaan.

21 Munde insa'nexxe halo fulannon

balleessanjo xixaa waalabe'no.»

Duuchchi Woddik Gootti Tsiyoonixxe kooba'ni hedhaan!