1 Baatu'eelika belto Iyyuu'eelibaa daggeek Duuchchi Woddik Goottik hiyyichchi konneechchi butta hedheeken:

2 Ha'no geedhe tenne laqqe;

tenne butta'ni hexxina'neek duuchchiing caqasse;

Ha'noke baro'ninna kaddo edike ha'noke annuwwike baro'ni

iitta hexxeexxi yaane meya kadde egendee?

3 Tenne yaane oose ha'nooxxe'ni haaso'we;

oose ha'nooxxinna ifixxe oose'ni haasotowwaal;

insa'neexxi oosenna iitti andaaxxe illa'n haasottowwaal.

4 Daarrekenaa'n gateechcho awwaaneessi ite;

oosichchi awwaaneessinaa'ni gateechcho

Dargaggeessi awwaaneessi ite;

Dargaggeessi awwaaneessi itaa'naa gateechcho

lumolli awwaaneessi ite.

5 Ha'no machcho'alluwwi kexxine oodhe

ha'no woyyinetixxa booka ha'witinaak duuchchi woo hiyye;

Afo'o ha'nokenaa'n hoyyendemmaxxee;

reefixxe woyinetixxe booka'a woo hitine oodhdhe.

6 Laakkossi iimi darre hedheek hunnaameessi ardi

boga anka gume abixxemmaxxee

Isso isixxinna neeqiinxe issoshsha,

qeqqeshshi isikinna meyyake neeqiinke qeqqeshishshaten.✝

7 Isinna aninna anxa woyinetixxa bakka duwwi gatise;

anka belesetika haqichchuwwa kukkuteexxi,

Isixxi damuwwanna gola'lte leellitaa qico'n

isixxa quncuwwanna cooqe,

hune.

8 Dubarichcho isi'a uwwendeek reyee'naa yaaddotixxa seemma oddo'witeexxi ooxxamaxxishsha ha'nonna oodhdhe.

9 Midhatik tolchinna ha'watik tolcha

Duuchchi Woddike Goottike mininaa'n gate'een;

Duuchchi Woddike Gootti edo ergatenda'neexxi

qeesenna ooxxa'neen.

10 Iikki fichchuwwi duwwi gateen;

iikki boginna bageen;

Midha baxxeen;

reefixxi woyinetixxi booka muddeen;

zayitetinna xo'o hiteen.

11 He'no wisalluwwi yaadde;

ha'no woyenetike hiddichchik wiisalluwwi woo woo hiyye;

Midha duuchcha fichchake'n baxxemmaxxee,

so'akeenna dinnetee oodhdhe.

12 Iitti woyine bagge'een;

belasetik haqichchuwwinna qoore'een;

Romaane, teemirenna Inkoyye;

wele gumma ra'isaak haqichchuwwi duuchchi bage'een;

Tennexxee gammashsho

manjiinke beltonaa'n bayyate'een.

13 Ha'no ifike Mageni'a shiqishinaaxxe midhatikenna woyenetixxe bookaki tolchi hedha gopheemmaxxee

ha'no anke Magenike erganjuwwa kaddineexxee qeesse

Ammee, jooniyya seemma oddo'witineexxi hashsha duuchcha oodhdhe.

Ha'no ookkonee tolchimalcho'n ergatendinaakiirinna woo woo hiyye.

14 Woyyitte agabo goddo lasse;

woyyitte tuutanna bukki asse;

Geedhetanna bukki asse

ookkone bogi giddo hedheeka duuchcha

Duuchchi Wodika Gootta ha'nooke Magenike miniba'a ye'we;

Duuchchi Woddike Goottiba'aanna raarre.

15 Dada Duuchcha ajajaake Duuchchi Woddike Goottixxi barra shiqeemmaxxee

aanne'e! Eetten barra'a;

duuchchinxa dande'ake Mageni ba'ne iyyedagaaxxi barra gelte'een.✝

16 Indaaxxa ita

ille no'oxxeenaa'ni,

Gammashshotinna fenxe hiyya,

no'oke Mageniinke minenaa'n gatte'ebaata?

17 Wiisendeexxi midha buttin giddo

aloote baxxe'een;

miya masseccatik minwwinna diigemeedheen

iitti midha baggemaxxee

midha aasseccatik gootaruwwi duuchchinna duwwi gate'een.

18 Hori yo'oshsha ma'late;

lalikinna mekki hiyye;

Allallaaba goniphemmaxxee

gedhebikinna midde rakkate'een.

19 Ee, Duuchchi Woddike Gootta atee ye'aannen

allallatixxa badda'a duuchcha giira ittemmaxxee'e

haqichchuwwakanna giira itteen.

20 Badda'atik biniichchuwwi atiba'a hamuummate;

wodiinxi muumuwwa bage'een;

ansichcho duuchchanna giira itte'een.