1 Malagata Tsiyooni giddo ufuuffe;

woyyitte anxe kooba'ni ookkonee xexxe'achchisatika hafuuranna laqisse.

Duuchchi Woddike Goottixxi murtetixxi barra dage'eemmaxxee

buttate'n hedheek duuchchi culphisowwaal;

Isenna shiqo hexxeen.

2 Tinninna dukkanatixxenna cuggogotixxe barra,

duumanchiixxenna dimma dukkanaxxe barran;

Borrotike dayya'iki ifi koobuwwwati hana duuchcha'n geyammashsha jajjabbi heddi sannachchi dagaan;

Olma iitta hexxeexxi yaane hara kadde egendebaan,

dagaake barruwwa'ninna iitta hexxeexxi yaane hara kaddaba'a.

3 Konne sannachchi edii'ni giira ha'yitaan,

isi uduumi darre'ninna bubba'ni tallisaan;

Konne sannachchi edi darre'n hedheek bog Edeenike eloke hiddichchinxe bakka labaan

udumi darri duwwixxe qiilla gammoojje labaan,

konne sannachchinaa'n mittichchinna gataachchi hedhebaan.

4 Konnechchuwwixxi bifa fadhadoke labba;

qolcha giddonna loliinke fadhadishshaten.

5 Huura itta'n haxxaxxisammaxe giirashsha,

lolakee qophpheefateeke jajjabbi sannachchishsha

sarageelliinka hafuura laqisa'ni

koobuwwatixxe xungo hanii'n xoggaan.✝

6 Isi edonna gosa gosak ardi duuchchi culphisaan;

manji duuchchik albinna alayyik xilledhaan.

7 Duuliinke mannishsha dedhange'n miidhaan;

loliinke mannishshanna dalla'a da'maan.

8 Insa'ne weli'anni weli dhiibabaan;

mitti mittinig ifi ifike ora abixinee me'inaan;

Ifi ifike googeessi giddii'ni fullebaang,

gollifachcho enqine sa'naan.

9 Kunni sannachchi ookkone qachcha'ni gumaani;

dalla'i hani'ninna utaalaan;

Minuwwii hananna da'maan

modhachchiishshanna masikotuwwatenaa'ni e'yaan.

10 Buttatinna isi edo sheke sheke hitaan;

iimatinna girrisaan;

Arishsho agenjikinna dukkanaan;

urjuwwatinna ifa gibba.✝

11 Duuchchi Woddik Gootti dindimeexxi

ifike sannachcha edo ifika hafuura laqisaan;

Isike sannachchik laakkossi lumoo qico bara sa'eeken;

ajaja isika muuxaakinna isi hunnaameessaken;

Iitti Duuchchi Woddike Goottixxi barra jabaxxen;

lumo qiconna sodaachchisaaxxen, ayyete isee dande'ata?✝

12 «Ta'anna agabo godda hosati,

oodhishshatinna yaaddoti

Mitti godobinni anibaa higge» hiyya'neen Duuchchi Woddik Gootti.

13 Qalbe ha'nooxxa malee'e,

seemma ha'nooxxa dartinoqqe'e;

Duuchchi Woddike Gootta ha'noke Magenbaa higge;

isi o'waakenna mararaake,

Fuggoxxa iyyedago'a hiyyee waalaake kademmaxxee

mufe dande'akenna bira saxxeexxe jalalaken.

14 Ifixxe o'wan higeexxi

Duuchchi Woddike Gootta hanooke Mageni'a kadaake

Midhatike tolchinninna ha'watike tolchinni ha'noo eebbiso'a

eebba ifixxa ha'no'a uwwuu ayyete ege'ne?

15 Malagata Tsiyooni giddo ufuuffe;

woyyitte agabo goddo hosanna lallabbe;

Woyyichcha yaa'anna ye'we.

16 Ardakanna bukki asse

ookkonee yaa'anna woyyoonse;

Geedhe mitteba shiqishshe

annoolettanna bukki asse;

Waajubichchi ifika golo waalowwaal;

Waajubichchotinna ifixxe dukko waldowwaal.

17 Duuchchi Woddike Gootti edo ergatenda'neexxi qeese

tolchimalchoke'ninna galmiinxe wuddummexxe oddo'ni he'ne'e,

Hina'ni oo'naa qici: «Ee, Duuchchi Woddike Gootta arda atika anjir

qadaada atikanna gosa gosake arda'n mammakemaake

osolemaakenna gacifachotike manna no'o assitoxxee.

Mayee atike ardixxe oddo'ni

‹Mageni insa'nekita haba hedhe? No'o hina?› »

18 Yoona Duuchchi Woddik Gootti ifike boga'n hedheeke

ardi duuchchi'a gaabbe eloxa afemmaxxee isi ifike ardi'a mararan;

19 Duuchchi Woddik Goottinna hiyye hiisse haaso'ee qici:

«Kunnise midha, reefixxa woyinetixxa bookanna zayite

godditinaa qici'a ha'no'aa uwwannon;

Gosa gosak ardinna ha'noo'ni gacifataashsha assabe'non.

20 «Ani middika awwaaneessika sannachcha ha'nonaa'ni bayyisannon;

alba isikanna borotixxe abbaayya darre'n

Dudduro isikanna dhidhimii darrexxe abbaayyabaa assiyyoti

ookkone bagokenna uruma bogibaa me'ashsha assannon;

ookko bochchi isikinna laqisaan;

Foolekanna ganaan.»

Dhugaaten, isi lumooxxe yaane asse'een.

21 Tee butta sodaattoxxee

gammadi ilillisi;

Dhugaaten Duuchchi Woddik Gootti lumooxxe yaane asse'een.

22 Iitti bobba'atixxe badda'a quffeemmaxxee

koo bada'a giddike biniinchaa mee sodaatte;

Iikki haqichchuwwinna gumma gummise'een;

balasetik haqichchinna woyinetik hiddichchi unkuruure gummise'een.

23 Ha'no Tsiyoonike arda gammadde!

Duuchchi Woddike Gootta ha'noke Mageno'ni'anna ilillisse;

Haarsikanna bonika xeena

qullumati hasissaa qico'n ha'no'a gansiise'een

Edi woddishsha,

Haarsikanna bonika xeena ha'noo'a uwwe'een.

24 Aldummuwwate'ninna midha wo'mitaan;

miicatixxi baluwwanna reefixxe woyinetixxe bookanninna zayitenni

Wo'mitee danbalataan.

25 «Ha'nooxxe oddo'n wocci assennek lumook sannachchi

lumollikinna shiixxarammi awwaaneessi

weli awwaanessinna awwaanessiink sannachchi itemmaka

Kunni duuchchi itemmaxxe wogguwwaka hira ha'noo'a hiissannon.

26 Godditinaa qico'n ittinaaxxa heddo midha affinaan;

maso yaanuwwa ha'no'a asseeka

Duuchchi Woddika Gootta ha'nooke Magenika summa saaddinaan;

Ardi ank ta'anni edi'a shookabaan.

27 Ookkoneechchi uduma ani Isira'eelixxe oddo'n hedhennexxa

ani Duuchchi Woddike Gootta ha'nooke Mageno kadennexxa

anishsha hedheekinna hedhebaaxxa egendinaan;

Ardi ankinna ta'anni edi'a shookabaan.»

28 «Ookkonneechchi uduma

Hafuura anka manjo duuchcha'n dhangalaasannon;

Ha'noxxi labbaxxinna meyyaaxxi oose raaga raaggaan;

ha'nooxxi geedhenna oojjo oojjottaan;

dargageeyye ha'noxxinna waleella uuddaan.✝

29 Ittanni eettene barruwwa'n meyyaxxenna labbake erganjuwwa'n midde,

Hafuura anka dhangalaasannon.

30 Massotanna iimuwwate'n leellishannon

iittanni buttate'n munde, giiratanna wiliilletike utuphika duumaancha leellishaannon.

31 Jabaxxinna sodaachchissaaxxi Duuchchi Woddike Goottixxi barra daggebaa edi darre,

arishsho dukkandaan,

agenjikinna mundete'n jijjiiremaan.✝

32 Duuchchi Woddike Goottika summa ye'aak duuchchi,

isi anjiremaan;

Duuchchi Woddik Gootti hiyyemmashshanni

Tsiyoonixxe Kooba'ninna Iyyerusaalemi giddo

anjirensha hexxaan.

Ookkone anjiremaake manni giddii'ni

Duuchchi Woddik Gootti eeyyeekiiri ooko afemaan.»✝