Amɔse 7

Kotogiti ma ɠulakɛlɛmai

1 Wɛlɛ nii ʋa, Maliɠii Ɠɔoɠɔ GALAGI kulani bɛ̀ kɛlɛma: Koto kpulugi ɠɛni ɓɛtɛzu, siɛgi zu tufai nii gaaleʋeni mɔunpa masagi ʋɛ, naa ɠɛni lɛnusu la. 2 Tɛi ti ɠɛni zooi ɠaa lufai pɛ miizu, gè ɠɛni ma: «Màliɠii Ɠɔoɠɔ GALAGI, nà è maanɛɛnɛzu, ɗa-nuɓusɛiti suvaayɛ! Ni naa laade, Zakɔɓe mavofodai ɠa zoo yɛsu ná ɠale? Ti wola maalɔiɗai!»

3 Ɠɔoɠɔ GALAGI ná-kisiɛi valiboni, é ɠɛ ma: «Naama vai la mɔ ɠɛa.»

Abui ma ɠulakɛlɛmai

4 Wɛlɛ mɔnɔ nii ʋa, Maliɠii Ɠɔoɠɔ GALAGI kulani bɛ̀ kɛlɛma: É abui maalolini, ga é ná-tukpɔi ɠaaleʋe ga naa, abuliegi naa ɠɛni zou wu ɗɛiti fɔɔzu, é ɗa Izilayɛle yooi ɠala. 5 Gè ɠɛni ma: «Màliɠii Ɠɔoɠɔ GALAGI, nà è maanɛɛnɛzu, kpela pele zu mu! Ni naa laade, Zakɔɓe mavofodai ɠa zoo yɛsu ná ɠale? Ti wola maalɔiɗai!»

6 Maliɠii Ɠɔoɠɔ GALAGI ná-kisiɛi valiboni, é ɠɛ ma: «Niima vai ɓalaa la mɔ ɠɛa.»

Kɔɠɔ galui ma ɠulakɛlɛmai

7 É nii ɠulani bɛ̀ ʋolu kɛlɛma: Maliɠii ɠɛni loni siɠigi ɠa, kɔɠɔ galui zoni zea, kenagi kpui ba. 8 Ɠɔoɠɔ GALAGI gàazaɠani, é ɠɛ mà: «Amɔse, leeni ɠa è kaazu?» Gè gooɠaaʋoteni, gè ɠɛ ma: «Kɔɠɔ galui ʋe kenagi kpui ba.» Maliɠii ɠɛni mà: «Nà kɔɠɔ galui ʋilisu nà-nuɓusɛiti, Izilayɛle nuiti saama. Nii ʋoluma, gè la mɔ ti maavaayɛga pɛ.

9 Izaake ná-zalaɠa ɠula adaʋɛti kpein ta ɠoloɠolo,

Izilayɛle ná-ada ɲadegaiti ti ɠoloɠolo.

Nà kɔɔi ʋɛɛ Zeloɓoame ná-masa pɛlɛyeɠei ʋa.»

Amɔse ɓɛɛ vai Ɓetɛle

10 Ɓetɛle zalaɠa ɠula nui Amasia wooleʋeni masagi Zeloɓoame ma, é ɠɛ ma: «Amɔse ɠa yaavai ɓɛtɛzu è laalɔɠɔma Izilayɛle nuɓusɛiti saama. Nuɓusɛi la mɔ zooga ziɛzu ná-kpɔɛzuɠula mɔinmɔingi wu. 11 Mazɔlɔɔ wɛlɛ ʋelei kpɔɛai la: ‹Zeloɓoame ɠa zaazu boɠa zɔkpɔi ɠa, Izilayɛle nuɓusɛiti ti maa ɠa ɠooza poun ta-yooi ʋa.› »

12 Amasia ɠɛni Amɔse ma: «Wozaɠaa nui, ʋelana, è li Zuda yooi zu ʋelei, è ɗa laami ná, è ɗa GALA gooi wo ná ʋele. 13 Kɛlɛ Ɓetɛle lɛi è ʋa ɠɛ yɛsu ná, è ʋa ɗa GALA gooi wo, mazɔlɔɔ masagi ná-ada ɲadegai ɠa ga ʋɛ, ná ɠa ga GALA sei ʋɛlɛi masadai ʋɛ.»

14 Amɔse Amasia wooɠaaʋoteni, é ɠɛ ma: «Gè la ga GALA goo wo nu, gè la ɓalaa ga GALA goo wo nu ná-doun zunu. Nà ga togani makɛ nui, sikɔmɔɔl kpelei ɠa nà ɗa tɛ. 15 Kɛlɛ Ɠɔoɠɔ GALAGI sèɠeʋɛ togani ɓulugi ʋolu, é ɠɛ mà: ‹Li, è GALA gooi wo nà-nuɓusɛiti ma, Izilayɛle nuiti.› 16 Woilona mu Ɠɔoɠɔ GALAGI laawooi ma, Amasia, ɗɛi è ɠɛɛzu mà: ‹Mina GALA goo wo Izilayɛle nuiti ma, mina mɔ ɓɔɛ Izaake mavofodai laalɔɠɔma.› 17 Naa ɠa é ba, Ɠɔoɠɔ GALAGI wooi ɠaa:

‹È-anzai ɠa ɓɔɠɔ ve koloɠologi ya taazuʋɛ,

è-loun zunuiti ta è-loun anzanuiti ta za ga boɠa zɔkpɔi,

galui ɠa la ɗa-yooi ma, gaaɠwɛ taɠiligaa ʋa,

ɗa ɓɔɠɔi ɗa zaazu kɔzɔba yooi ta zu,

Izilayɛle ɠa li duɔlai zu, maaɠooza poun ná-zooi ʋa.› »