1 Wɛlɛ nii ʋa, Maliɠii Ɠɔoɠɔ GALAGI kulani bɛ̀ kɛlɛma: Kpɔlɔgi daavegai ga gulu waa ɓɔigiti. 2 É gàazaɠani, é ɠɛ mà: «Amɔse, leeni ɠa è kaazu?» Gè gooɠaaʋoteni, gè ɠɛ ma: «Kpɔlɔgi ʋe, gulu waa ɓɔigiti ti su.» Ɠɔoɠɔ GALAGI ɠɛni mà:

«Nà-nuɓusɛiti, Izilayɛle nuiti, ti zeelia ɠwɛma,

gè la mɔ ti maavaayɛga pɛ.

3 Naama voloi, guyei niiti ti loozu masa pɛlɛi wu,

naati ta valibo ga kpalagi,»

Maliɠii Ɠɔoɠɔ GALAGI wooi ɠana.

«Ta ɠɛ poomaiti pilisu ya adɛ pɛ,

woza ɠaalɛi tɔɔntɔɔn.»

4 À woilo nii ma, wɔigiti wo loozu bala nuiti ma,

wo pɔ ga wo maawɔin nuiti suwuɠaaleʋe zooi ɠa.

5 Wa ɠɛɛzu ma: «Alu toga niinɛi ma vɛtii ɓena kae,

gi tɔɔzei ga gá-moloiti pɔdia.

Dooɠo foloi ɓena kae,

gi gá-molo ɠotaiti daalao ʋolu,

gi ta ɠula kɔɠɔ ganiiti da,

gi ta ʋɛɛ aniiti sɔngɔiti ba,

gi woyai lɔ kilo ɠɔɠɔ ganiiti su,

6 gi maawɔin nuiti geya ga walii,

gi bala nuiti geya ga saʋala gilagi.

Gá zoo vɔlɔ gi yɛ pɔdii loozu,

gi gá-molo ɓaɠai pɛ pɔdi.»

7 Ɠɔoɠɔ GALAGI ɠonaʋɛ ga:

«Eni nɔ Izilayɛle ɠa dɛ wasosu,

gè la yeema ti-zɔgi gila kpalaa ma.

8 Naa ɠa é ba, zooi ɠa ɓali,

gaa nuɓusɛiti pɛ ta ɠɛ gaazuɗɛʋui zu.

Zooi ɓɔɠɔi ná pɛ ka lɛ su, é ɗa ɲiikpi,

naa ʋoluma, é ɠula su ga Ezipete ɗɛ wolai Nile ɠɛʋele.»

9 «Naama volo ná, nà foloi leʋe gee ʋa, folo gaalɔgai ma ziɛgi zu,»

Maliɠii Ɠɔoɠɔ GALAGI wooi ɠana.

«Nà kpidii ʋɛɛ zooi ɠa, ná pɛ folo ɓekpegi.

10 Nà wa-vɛtiiti maavalibosu ga saa wɔlɔi,

wa-wuyeiti ta lati ga gɔlɔi.

Nà ɛsɛ pɛ saamaɠili ga saa wɔlɔ wo seɠei,

gè kpaanagi la wo-unmaʋɛti kpein,

Nà soolɛi ʋili zooi nii ma,

eɠɛ nui nii ná-doun ɠila kpegi a za.

Nii é ʋaazu naa ʋolu, naa ɠa ɠɛ nɔ ga ziizoolɛ voloi.

11 Foloi tanigaa ta ʋaazu,

yeei gè pulu wolai loozu la zooi nii zu,»

Maliɠii Ɠɔoɠɔ GALAGI wooi ɠana.

«Daamiani balagi ma ʋului laade,

ziɛ ʋalagi ma ɓɔɔle wɔin laade ɓalaa,

kɛlɛ Ɠɔoɠɔ GALAGI laawooi mɛnitalai ma ʋului ʋe.

12 Ta ʋilɛ unba naazu,

ti ɗa leʋeteʋe kpoloɗɛiti zɔɠɔzu.

Naa ʋoluma, ta leʋe lɛkpɛmaʋɛ nu ɠɔʋɛzu ʋeleiti zɔɠɔzu ta folo ɠulazu ʋelei,

ti ɗa Ɠɔoɠɔ GALAGI laawooi ɠaiziɛ, kɛlɛ ti la kaa.

13 Naama volo ná, anzalopo ʋapagiti ta zunu loungoiti

suvikɛi ɠa ɓe ga kpɔɔle wɔin.

14 Zɔiti kpein ti ɠonazu zɛɛ ɠalagi ma é Samali, ti ɗa ɠɛ ma:

‹Ɗa-ɠalagi lɛbi ɠeke faan, Dan,

gala falii lɛbi ɠɛɛzu ɠeke faan, Ɓeel-Seɓa,›

naama nuiti pɛ ta loo,

ti la mɔ zooga wuzeɠezu, eyɛsu pɛ.»