1 Zunui ta ɠɛni Sezalé, daaseigi ga Kɔlenɛye, é ɠɛni salaʋusu ɓulu gila maazu, nii é zeɠeni Itali. 2 Zunui naa ta ná-pɛlɛyeɠei ti ɠɛni ga GALA gaazuluaba nua, é ɠɛni faaɓɔɠɔ mɔinmɔin kɛɛzu nuɓusɛiti bɛ, é ɠɛni GALA falizu siɛnɔpɛ su. 3 Yeeta, kpɔkɔ volo yeeɠɛɠalai zaʋasiɛi ma, é GALA ná-geezuɠeelai gila kaani, kulaai kɛlɛma kpezekele, é ɗa lɛ ná-pɛlɛi wu, naa tolini, é ɠɛ ma: «Kɔlenɛye!» 4 É ɠaazuloni naa ʋa, dualuagi soni, é ɠɛ ma: «Toɠa ɠale, Màliɠii?» Naa ɠɛ ma: «Ɗa-ƓALA faliiti, ta ɗa-vaaɓɔɠɔiti ti zeelia GALA ma, ki ka ti zu. 5 Keelaiti teʋena ɠaniɠani nɔ Zɔpé, ti Simon loli, nii daasei pɛai ga Piyɛlɛ. 6 Kɔlɔ ɓɛtɛ nui Simon ná-pɛlɛi wu ɠa é ɲiizu ná, kpoloɗɛi laaʋɛ.» 7 Geezuɠeelai nii é ɠɛni ɓɔɛzu pɔ, naa liini nɔ feya, Kɔlenɛye ná-botiɠɛ nu felegɔ loli, ta GALA gaazuluaba zalaʋusui gila, nii é botii ɠɛɛzu tɔun ba. 8 Kpegai ma ga fai pɛ suɠula ti ma, é ti leʋeni Zɔpé.

9 Polumai, tɛi ti ɠɛni pelei ma, ti maa ɗa ɓuɠa Zɔpé ʋa, Piyɛlɛ lɛɛni pɛlɛ ɠɔmaʋɛ ga folo ɓekpegi, ná ɓɛtɛai ga dooɠo bosuʋɛ, ga é GALA fali. 10 Pului soni, é ɠɛni pɔ ga é daamii wo. Siɛgi zu ti ɠɛni ɠɔnɔgi ɓɛtɛzu la bɛ, suɠilini. 11 É geeɠɔlɔgi laalaogai ɠaani, é ani ta ɠaani eɠɛ seɠe wolai toko logai seki naanigɔi pɛ ga, é ɗa yei zooi ma. 12 Ɠɔɠɔ naani suaiti ti ɠɛni su, ta kpokpo suaiti, naa ʋɛɛ wɔniiti ba. 13 Wooi ta zeelini ma, é ɠɛ ma: «Wuzeɠe, Piyɛlɛ, è ta ʋaa, è mi!» 14 Kɛlɛ Piyɛlɛ ɠɛni ma: «Ɓa-o, Màliɠii, tɔɔzei kaipa gè la dɛ tɔ ma ani ɓaa kɔzɔba ani miini.» 15 Wooi naa ɠɛni ma ʋolu ná velesiɛi: «Nii GALA ge ɠɛɛzu ma ɲadegɛ, mina naa ʋɛtɛ ga kɔzɔba ani.» 16 Naama vai zeini ma ga seizu saʋagɔ, naa ʋoluma, anii naa ɠaaɠaleni ma geeɠɔlɔgi zu.

17 Siɛgi zu Piyɛlɛ ɠoozuʋilini da ga é kulakɛlɛmai naa ʋoluʋɛ ɠwɛɛ, gaamago Kɔlenɛye ná-keelaiti é ti leʋeni, ti gaazaɠagiti boni, ti ʋa kwɛɛ ʋɛ Simon ná-pɛlɛi ná, naati ti loni siɠidaʋɛ. 18 Ti toligi woni, ta ti ɗa gaazaɠagi wo, ni Simon laazuʋɛ ɠa ná, nii daasei pɛai ga Piyɛlɛ. 19 Tɛi Piyɛlɛ ɠɛni ɠisiɛzu kulakɛlɛmai ʋoluʋɛ zu, Zɛnvu Ɲadegai ɠɛni ma: «Wɛlɛ, zunu saʋagɔ ʋaaʋɛ, ti ɗa è ɠaiziɛ. 20 Wuzeɠe, è yei, mina inɛinɛ, à li ʋɔɔma wa tiye, tɔɔzei nà ɠa gè ti leʋegai.» 21 Piyɛlɛ yeini, é ɠɛ zunui naati ma: «Wɛlɛ nà ʋa, nà ɠa wo gàiziɛzu, lee ɠa é ga wo ʋaa ungi ʋɛ?» 22 Ti gooɠaaʋoteni, ti ɠɛ ma: «Salaʋusu ɠundiɠii daa ga Kɔlenɛye, é ga zunui nii telebogai, ta é luazu GALA ba, nii Zuifuiti pɛ ti tɔɠɔ ʋagɔi wosu, naa ɠa GALA ge ná-geezuɠeela ɲadegai gila teʋegai ma, é ɠɛ, é è loli ná-pɛlɛi wu, nii a kɛ é è woomɛni.» 23 Piyɛlɛ ti lɛɛni pɛlɛi wu, é ti laazuʋɛ.

Poluma zobui é wuzeɠeni, é ʋilɛ ti ʋolu, ti li. Zɔpé ɠidaaleʋe nuiti tanigaa ti ʋilɛni polu, ti maaza. 24 Poluma voloi, ti zeelini Sezalé. Kɔlenɛye ɠɛni ti ɓɔunsu, é ná-nuiti ta bɔɔla wanawanagiti tolini ná-pɛlɛi wu. 25 Siɛgi zu Piyɛlɛ lɛɛni la pɛlɛi wu, Kɔlenɛye daaɠomini, é loo kɔɠɔwu, é nɔkɔ bu. 26 Kɛlɛ Piyɛlɛ buzeɠeni, é ɠɛ ma: «Wuzeɠe, tɔɔzei nà ɓalaa, nà ga nui ga è ɠɛʋele.» 27 Ti yɛni yɛpɛzu, ti lɛ pɛlɛi wu, ti nu mɔinmɔin kaani, ti ɠaalɛai ba. 28 É ɠɛni ti ma: «Wo kwɛni ga tɔ ka Zuifuiti ma, ga ti mina ɓɔ faa nɔpɛ ma ta zii ɠiligiti, ɓaa ti ʋa lɛ naati ta-ʋɛlɛ wu. Kɛlɛ GALA ge dɛɛʋɛ ga ze ga maa la nɛɛni, nu ʋa ɠɛ nui tanɔpɛ ma kɔzɔba nu, ɓaa ɲadetala nu. 29 Naa ɠa é kɛa, siɛgi zu wo keela leʋega da mà, gè ʋa, gè la maaɠaali nɔpɛ kɛɛni su. Kɛlɛ nà wo ɠaazaɠasu, lee ɠa wo tòligai ma?» 30 Kɔlenɛye ɠɛni ma: «Ma volo naanisiɛi ɠa ga za, niima yeeɠɛɠalai nɔ zu, gè ɠɛni GALA falizu nà-pɛlɛi wu kpɔkɔ volo yeeɠɛɠalai zaʋasiɛi ma. Zunu ɠila ge ʋaani, é lo kàkala, kɔba zeɠei ɠoleai é ɗa volo, 31 é ɠɛ mà: ‹Kɔlenɛye, ɗa-ƓALA falii ɠaaʋotega, GALA ki ka ɗa-vaaɓɔɠɔiti su. 32 Keelaiti teʋena ɠaniɠani nɔ Zɔpé, ti Simon loli, nii daasei pɛai ga Piyɛlɛ. Kɔlɔ ɓɛtɛ nui Simon ná-pɛlɛi wu ɠa é ɲiizu ná, kpoloɗɛi laaʋɛ.› 33 Gaamago nɔ, gè keelaiti teʋe è ma, è laaɠomi fai zu, ɗa ma, è soloogɛ ga è ʋa fala. Ʋɛ niina gi pɛ ka gi GALA gaazu, gi woilo naa ma, nii Maliɠii è leveai ma.»

34 Piyɛlɛ kpɔɛi zeɠeni naazu, é ɠɛ ma: «Gaamazu, gè kwɛɛga niina ga GALA ge la zeelɔzɔɠɔzu ɠɛɛzu nuiti ba, 35 kɛlɛ zii pɛ saama, zɔi nɔpɛ é luazu ba, ta é telebodai ɠɛɛzu, naama nui nɛɛʋɛ bɛ. 36 Wo daawooi ɠwɛni, nii é teʋegai Izilayɛle nuiti ma, é ziilɛi Goo Niinɛ Ʋagɔi laazeeli ti ma ga Yesu Kilista maaʋele, tama ka é ga ɛsɛ pɛ Maliɠii. 37 Wo kwɛni nii é ɠɛɛni dɛ Galilé, naa ʋoluma Zudé yooi zu ná pɛ, Zan daazeeliai ma bɛbɛi ma ga ti ɓatizei. 38 Wo kwɛni ʋelei GALA ge Zɛnvu Ɲadegai yeini la Nazalɛte nui Yesu ma, ta é zɛbɛi ve zea. Wo kwɛni ɓalaa ʋelei Yesu ɠɛni leʋesu da zooi zu, é ɗa faa ʋagɔi ɠɛ, é ɗa naama nuiti pɛ balo, niiti ti ɠɛni Inɛgi ná-zobogi wu, tɔɔzei GALA ge ɠɛni ba. 39 Nii kpein é kɛai Zuifuiti ta-yooi zu ta Zeluzalɛme, giya ɠa gi ga naama zeeleiti. Ti kpadɔni saa wului ma, ti paa. 40 GALA ge buzeɠeni, é kula saai ya foloi zaʋasiɛi, é zobogi ve zea ga é ɓɔɠɔ lɛ ga nuiti. 41 Kɛlɛ nui pɛ ge la ɠɛni de, kɛni zɔiti niiti GALA ge yiimazeɠeni ga tiye kaite, ga ti ɠɛ ga zeeleiti, gá ya, gɛi gi daamii ta kpɔɔlei woni ʋɔɔma gá tiye, GALA kpegai ma ga buzeɠe, é kula saai ya. 42 Naa ʋoluma, Yesu devei veeni giya ga gi GALA daawooi laazeeli nuɓusɛiti ma, gi zeele wooi wo ga tɔ ɠa GALA ge yeelogai ba, ga é ɠɛ ga nu vuluiti ta gɔvɛiti ta-lukpɔɠaaleʋe nui. 43 GALA goo wo nuiti pɛ ta naama zeele wooi wosu ná-faa zu, ga zɔi nɔpɛ a ɠidaaleʋena Yesu ma, naama nui ná-kotoi zuvaa ɠa yɛ ga tɔun daaseigi maaʋele.»

44 Siɛgi zu Piyɛlɛ ɠɛni dɛ naama wooiti bosu da, Zɛnvu Ɲadegai yeini nuiti pɛ ma, niiti ti ɠɛni woilosu. 45 Kidaaleʋe nui niiti pɛ ti ɠɛni ga Zuifuiti ti yɛni Piyɛlɛ ʋolu ti ʋa, ti laavɔɔni ga Zɛnvu Ɲadegai yei vai zii ɠiligiti ɓalaa ma. 46 Mazɔlɔɔ ti ɠɛni naati goomɛnisu, ti ɗa ɓɔɛ zii woo ɠiligiti su, ti ɗa GALA dɛbi. Piyɛlɛ kpɔɛi zeɠeni ʋolu, é ɠɛ ma: 47 «Nu ɠa ɠɛlɛ nɛi naama nuiti kpatizesu ziɛi wu, niiti ti Zɛnvu Ɲadegai zɔlɔɔgai ga ade ɠɛʋele ɓaa?» 48 É devei veeni, ti naati kpatize Yesu Kilista laaseigi zu. Ti maanɛɛnɛni ga é yɛ ti ɠoba foloi tanigaa laawu.