Kɛɛwotiiti 11

Piyɛlɛ ná-poluvaawogi Zeluzalɛme Egilisii zu

1 Keelaiti ta kidaaleʋe nui niiti ti ɠɛni Zudé yooi zu, ti mɛnini ga zii ɠiligiti ɓalaa, ti yeezeiʋɛ GALA daawooi wu. 2 Siɛgi zu Piyɛlɛ lɛɛni la Zeluzalɛme, kidaaleʋe nui niiti ti ga Zuifuiti ti peelalani, ti ɠɛ ma: 3 «È leʋe ɠale, è liai, è lɛ zii ɠiligiti ta-ʋɛlɛi wu, naa ʋoluma wo laami ʋɔɔma wa tiye.»

4 Piyɛlɛ tɔɔzeini naazu ga faiti suɠula ti ma ga gilagila, é ɠɛni ti ma: 5 «Gè ɠɛni Zɔpé taazuʋɛ, gè yɛni GALA falizu sùɠili, gè kulakɛlɛmai ta zɔlɔɔni. Ani ta zeɠeni geeɠɔlɔgi zu, eɠɛ seɠe wola toko logai seki naanigɔi pɛ ga, é ɗa yei, eyɛsu é zeeli mà. 6 Gè suʋɛtɛni ga pagɔ, gè ɠɔɠɔ naani suaiti kaani, ta dɔɓɔ zuaiti, naa ʋɛɛ kpokpo suaiti ta wɔniiti ba. 7 Gè woo ɠila mɛnini ɓalaa, é ɗa ɠɛ mà: ‹Wuzeɠe, Piyɛlɛ, è ta ʋaa, è mi.› 8 Kɛlɛ gè ɠɛni ma: ‹Ɓa-o, Màliɠii, tɔɔzei kaipa kɔzɔba ani ɓaa tɔ ma ani la dɛ lɔɔni dàaʋɛ.› 9 Wooi woni mà ʋolu ná velesiɛi zu, é ɠula geezuʋɛ, é ɠɛ mà: ‹Nii GALA ge ɠɛɛzu ma ɲadegɛ, mina naa ʋɛtɛ ga kɔzɔba ani.› 10 Naama vai zeini ma ga seizu saʋagɔ, naa ʋoluma, ti pɛ ge ɠaaɠaleni ma geeɠɔlɔgi zu. 11 Gaamago nɔ, zunu saʋagɔ unkulani, ti zeɠe Sezalé, ti ʋa tòlisu, ti loni siɠidaʋɛ, ʋɛ gi ɠɛni ná. 12 Zɛnvu Ɲadegai ɠɛni mà, gè ʋilɛ ti ʋolu gi li, gè mina inɛinɛ. Wɛlɛ kɛɛloun lɔzitaiti ba, niiti ti màazani, gi li, gi lɛ Kɔlenɛye ná-pɛlɛi wu. 13 Naa ɓalaa boni gi ma, ʋelei é kulakɛlɛmai zɔlɔɔni la, geezuɠeelai loni, é ɗa ɠɛ ma: ‹Keela leʋe Zɔpé, ti Simon loli, nii daasei pɛai ga Piyɛlɛ. 14 Toɠa naa lɛ ga ɗe, ʋelei ɗa ɠizo da, wa ɗa-ʋɛlɛ wu nuiti.› 15 Siɛgi zu gè kpɔɛzuɠulai lɔɔzeini la, Zɛnvu Ɲadegai yeini ti ma, ʋelei é yeini la ade ma mɔungi. 16 Naama ziɛgi zu, kìgi looni Maliɠii laawooi nii zu ga: ‹Mazɔlɔɔ Zan ɓatizei woni ga ziɛi, kɛlɛ wɔun, wa ɓatize ga Zɛnvu Ɲadegai.› 17 Ni tama GALA ge vebɛani ɠilagi naa nɔ vea ti ya, nii feai ada ɓalaa zea, adɛi de ɠidaaleʋeai Maliɠii Yesu Kilista ma, nɔ̀un nà ga leeni, nà li losu GALA daawu?»

18 Naama wooi ti yiimaalɛini, ti lɛbiyai ve GALA bɛ, ti ɗa ɠɛ ma: «GALA ge va bu ga zii ɠiligiti ɓalaa ti ti-ziɛ ʋelei maavalibo, nii a kɛ ti zɛnvui zɔlɔɔ!»

Antiyɔse Egilisii lɔɔzei ʋelei

19 Wɔinzeɠemai ʋaai ma eyɛsu ti Etiyɛni ʋa, kidaaleʋe nui zɔiti ti vazani, naa tanigaa ti zeelini fɔ Fenisi, ta Sipele, naa ʋɛɛ Antiyɔse ʋa, kɛlɛ ti la ɠɛni GALA daawooi laazeelizu zii ɠili nɔpɛ ma, kɛni Zuifuiti nɔ. 20 Anɛɛ naa ʋe, ti zaama, nui tanigaa niiti ti zeɠeni Sipele ta Silɛne, ti li Antiyɔse, naati ti ɓɔɛni ɓalaa zii ɠiligiti pɔ, ti Maliɠii Yesu ná-Woo Niinɛ Ʋagɔi laazeeli ti ma. 21 Maliɠii ɠɛni ti ʋa, nu mɔinmɔin ge laani ti-laawooi la, ti ɠaaʋote Maliɠii ma.

22 Naama wooi zeelini Zeluzalɛme Egilisii zu nuiti ma, ti Ɓalanaɓase leʋeni fɔ Antiyɔse. 23 Naa zeeliai ma, é pɛtɛni ʋelei GALA ná-zaalai ɠɛni botii ɠɛɛzu la, koozunɛɛni gola. É kidaaleʋe nuiti iɲɔdɔɔni ga ti ɠɛ ga wooɠɛɠila nu Maliɠii ʋɛ, ta ti ɠili ba ga ti-yiimaʋɛ pɛ. 24 Mazɔlɔɔ Ɓalanaɓase ɠɛni ga nu ʋagɔ, nii daavegai ga Zɛnvu Ɲadegai ta kidaaleʋei. Nu mɔinmɔin ge zɔlɔɔni, ti ɓɔɠɔ ve Maliɠii ya. 25 Naa ʋoluma, Ɓalanaɓase liini Taalese, é Sɔle laaɠomi. 26 É naa ɠaani ná, ti yɛ ʋolu, ti ʋa Antiyɔse. Ti kona gila kɛɛni miná, ti ɗa gaalɛbai wo ʋɔɔma ta Egilisii, ta ti ɗa nu mɔinmɔin kala. Antiyɔse ɠa kaladopoiti ti-laasei ge ʋɛɛni ná mɔunpa ga keletiɛinti.

27 Naama ziɛgi zu, GALA goo wo nuiti ti zeɠeni Zeluzalɛme, ti yei Antiyɔse. 28 Ti ɠila ge ɠɛni ná, nii daaseigi ɠɛni ga Agaɓuse. Zɛnvu Ɲadegai loni tuɠɔ, é wuzeɠe, é bo ga pulu wolai ɠa loozu eteai zu ná pɛ. Pului naama ge looni Wɔlɔme masagi Kelode ná-siɛgi zu. 29 Kaladopoiti ti deveni ti zoloo ma ga nii nɔpɛgi ma zobogi ɛsɛ bɛ, ma nu kɛ ga kpɔbai kidaaleʋe nuiti bɛ, niiti ti Zudé yooi zu. 30 Naa ɠa ti kɛɛni, ti fe Ɓalanaɓase ta Sɔle ya, naati ti teʋe totuɠɔiti pɔ.