Atos 14

Pɔle ta Ɓalanaɓase ti ɠɛɛ vai Ikoniyume

1 Pɔle ta Ɓalanaɓase ti ɠɛai ma Ikoniyume, ti lɛɛni miná ɓalaa Zuifuiti ta-ƓALA dɛbi ʋɛlɛi wu, ti yɛni ɓɔɛzu ga kɛʋelei ta, Zuifui ma mɔinmɔin ta Gɛlɛkii ma mɔinmɔin ti ɠidaaleʋe. 2 Kɛlɛ Zuifuiti ti ɠikpaai, naati ti lɔɔni zii ɠiligiti unsu, ti naati daaʋili ga ti faa ɲɔu ɠɛ ga kidaaleʋe nuiti. 3 Anɛɛ naa ʋe, Pɔle ta Ɓalanaɓase ti lɛbini Ikoniyume, ti ɠɛni ɓɔɛzu ga ladalai, tɔɔzei ti laani Maliɠii la, naama ge ɠɛni ná-zaala wooi ma ɠaamai ɠulazu kɛlɛma ga laavɔɔ vaiti ta maaɓɛlɛ vaiti, nii é ma zobogi veeni ti ʋɛ ga ti ɗa kɛ. 4 Taazuʋɛ nuɓusɛi ɠaaɠwɛɛni su fele, gilazuʋɛ ɠɛni Zuifuiti polu, gilazuʋɛ ɠɛ keelaiti polu. 5 Tɛi zii ɠiligiti ta Zuifuiti é ʋɛɛ ta-ɠundiɠiiti ba, ti ɠɛni ɠɛʋele ɓɛtɛzu ga ti Pɔle ta Ɓalanaɓase maanɔɠɔ, ti ʋa ti zɔɔ ga kɔtuiti, 6 naati ti suɠwɛɛgai ma, ti ʋelani ti li Likaoni ɠoʋii ma: Lisitele, Dɛɛleɓé, ta ti-maaɠoolii zu. 7 Ti Woo Niinɛ Ʋagɔi laazeelini miná.

Pɔle ta Ɓalanaɓase ti ɠɛɛ vai Lisitele

8 Mɛɠɛlɛ zunui ta ɠɛni zeini Lisitele taazuʋɛ, nii é zɔlɔɔni ga mɛɠɛlɛgi, kaipa é la ɠɛni dɛ zooni é ʋa ziɛ. 9 É ɠɛni woilosu Pɔle woo ma. Naa wɛlɛni ba, é ka ga kidaaleʋei ɠa zea ga é ʋalo, 10 Pɔle wooɠulani, é ɠɛ ma: «Wuzeɠe, è lo è-ɠɔɠɔiti ga!» Zunui ʋilini kpulu kɔɠɔiti ga, é tɔɔzei ga é ɗa ziɛ. 11 Tɛi bɛbɛi naa ɠaani, nii Pɔle ɠɛni kɛɛzu, ti ɠɛni ɓainsu ga woo wola Likaoni wooi zu, ti ɗa ɠɛ ma: «Galagiti ti nuɓusɛ ɠɔlɔgi zeɠea, ti yei gi zaama.» 12 Ti Ɓalanaɓase laasei pɛɛni ga Zuuse, ti Pɔle laasei pɛɛ ga Ɠɛɛlemɛse, tɔɔzei naa ɠa kpɔɛi ɠɛni da.*14:12 Gɛlɛkiiti ta-ɠala pelei ma, Zuuse ɠa é ɠɛni ga galagiti ta-ɠundiɠii, ta Ɠɛɛlemɛse ɠɛ ga galagi naati ta-ɠeelai. 13 Galagi nii daa ga Zuuse, naama zalaɠa ɠula nui ná-gala pɛlɛi ɠɛni taa loaʋɛ, é ʋaani ga nikɛ zinɛiti ta tufa lɛʋɛlɛʋɛgaiti taa ziɠidaʋɛ. Ta bɛbɛi ti zolooni ma niina ga ti naama aniiti kula ga zalaɠai Ɓalanaɓase ta Pɔle ʋɛ.

14 Keela felegɔiti ti naa mɛnigai ma, ti ti ɠɔba zeɠeiti balini ga kidaaʋiligi maaʋele ma, ti ɓizɛ bɛbɛi ʋɔ pelei, ti ɓain ga tiye, ti ɠɛ ma: 15 «Lee vaa zu wo naa ɠɛɛzu? Gá ɓalaa gá nɔ ga nuɓusɛi ga wo ɠɛʋele, gi ʋaaʋɛ Woo Niinɛ Ʋagɔi laazeelizu wo ma, ga wo ɓeteʋe ɠimalala vai naati ba, wo lati zɛnvu su ƓALAGI ma, nii é geeɠɔlɔgi, ta zooi ta kpoloɗɛi ɓɛtɛa ta ti zu aniiti. 16 Yeeɠɛɠalai niiti ti leʋegai, é zii ɠilagilagiti pɛ zɛgɛ ná, ɛsɛ ge ɗa ziɛ ga yiima ʋele. 17 Anɛɛ naa ʋe, é la ɓeni ɓɔɠɔ lɛɛzu ga tiye ga ná-faaɓɔɠɔiti maaʋele, niiti é ti ɠɛɛzu, tɔɔzei tɔ ɠa é tonai ta ani ɓɛtɛ yeeɠɛɠalaiti teʋesu wo ma, é ɗa ɠɔnɔgi ve wo ya, ta é koozunɛɛi lɔ wo-yiimaʋɛti.» 18 Anɛɛ ɓalaa keelaiti ti naama wooiti boni, kɛlɛ é ɠɛni ga faa ɓaaɓa gola, ti ʋa pele leʋe bɛbɛi luɠɔ ga naati ti mina zalaɠai ɠula ti ʋɛ.

19 Naa ʋoluma, Zuifuiti ti zeɠeni Antiyɔse ta Ikoniyume, ti ʋa ti bɛbɛi unsu leʋe. Ti Pɔle zɔɔni ga kɔtuiti, ti kpokpo, ti kula taai ʋa, tɔɔzei ti ɠɛni ɠisiɛzu ga é za. 20 Kɛlɛ siɛgi zu kaladopoiti ti ɠaalɛɛni ba la koba, é wuzeɠeni é lɛ taazuʋɛ, poluma zobui ta Ɓalanaɓase ti liini Dɛɛleɓé.

Ti ɠalema vai Antiyɔse

21 Siɛgi zu Pɔle ta Ɓalanaɓase ti ɓeni la ga Woo Niinɛ Ʋagɔi laazeeli Dɛɛleɓé, ti kaladopo mɔinmɔin sɔlɔɔni ná, ti ɠaleni ma Lisitele ta Ikoniyume, ti gaaɓela Antiyɔse. 22 Ti ɠɛni kaladopoiti iɲɔdɔɔzu, ti ɗa ti lɛnɛ ga ti yɛ kidaaleʋei zu, ti ɗa ɠɛ naati ma: «Kɛni ade kpɔlɔ mɔinmɔin sɔlɔɔ pɛ, ade ʋa lɔ GALA ná-masadai zu.» 23 Ti yeeloni totuɠɔiti ba Egilisii ɠilagilagi pɛ su, ta la ɓena ga GALA fali ti zugi zo, ti ɠɛni naati kalivaazu Maliɠii ma, nii ti ɠidaaleʋeai ma.

24 Naa ʋoluma, ti leʋeni Pisidi ɠoʋii ma, ti zeeli Panfili. 25 Ti GALA daawooi laazeelini Pɛɛlezé, naa ʋoluma ti li Atali. 26 Ti zeɠeai ma miná, ti lɛɛni ɓatoi zu, ti li Antiyɔse, ʋɛ ti ɠalivaani ná GALA ná-zaalai ma, botii naama vaa zu, nii ti ɓeni ga kɛ. 27 Ti zeeliai ma, ti Egilisii zu nuiti pɛ gaalɛɛni ba, ti ʋoluvaawo ti ma ga nii pɛ GALA ge kɛai ga ti maaʋele, ta ʋelei naa kidaaleʋei ma ʋɛlɛi laalaogai la zii ɠiligiti tuɠɔ. 28 Ti ku ɠɛɛni ná fele kaladopoiti saama.