1 Nà ga tufai, nii é ʋuazu Salon nɛmɛi zu,

nà ga pɛtu su wulɛgi.

2 Ʋelei bulɛgi a ɗa ɠɛ la ɠaingiti saama,

ʋele ɠana zìima anzanui la anzalopoiti saama.

3 Ʋelei nɔ pɔme gului la dɔɓɔ wuluiti saama,

ʋele ɠana nɛ̀ɛbɛ nui la zinipoiti saama.

Nɛɛʋɛ bɛ̀ ga gè zei ná-niinigi wu,

gaawaai nɛɛʋɛ dàaʋɛ.

4 É lɛa ga ze fɛti ɠula ʋɛlɛi wu,

ná-poogi é màazu, naa ɠa ga nɛɛbɛi.

5 À kɔ̀nɔkula ga leezɛn vɔɔiti, nii a kɛ gè zɛbɛ zɔlɔɔ,

à kɔ̀da yɛɓɛ ga pɔmegiti, gè gaaɓaa zɔlɔɔ,

tɔɔzei gè zeeɓɛa ga nɛɛbɛi.

6 Kɔʋɛzu ʋele yeei ɠa é daazu nɔ̀ungi wu,

é zeezai velevele mà.

7 Zeluzalɛme anzalopoiti, nà wo maanɛɛnɛzu

dopaiti ta goegiti daaseigi zu, ti dɔɓɔi zu:

À mina nɛɛbɛi maaloɠa,

à mina maaloɠa, aisa é ʋa nɛɛ bɛ.

8 À woilo dɛɛ, nɛ̀ɛbɛ nui wooi ɠanu, é lɛɛzu,

tɔ ɠanu é ʋaazu ga ɓudɛa gize goiti ta gize wolaiti maazu.

9 Nɛ̀ɛbɛ nui ɠulaʋɛ ga dopai ɓaa goe ziʋoi.

Wɛlɛ ba loni gá-zasai ʋoluʋɛ,

é ɗa wɛlɛ gá-venɛtɛlɛ laaʋɛti.

10 Nɛ̀ɛbɛ nui ɓɔɛ pɔ̀, é ɠɛ mà:

«Wuzeɠe, zìima anzanui, nà-nu ʋagɔi, ʋa!

11 Samai leʋega,

tonai looɠoga, é leʋega.

12 Zooi zu ná pɛ tufaiti ti ʋua,

guye loo ziɛgi zeelia.

Nu kpumagoi wooi mɛnisu,

é ɗa guyei loo ada-yooi zu.

13 Kooleɠoole gwaaiti ti ɗa ɓɔi niina ti-ma wuluiti ga,

leezɛn ɓeleiti ti teʋea,

ti-maku nɛɛnɛgi ɗa ɠula.

Wuzeɠe, zìima anzanui, nà-nu ʋagɔi, ʋa!

14 Ɗɛi è ga nà-poopo kolegi,

è-laɠagi logai fasa yeɠeiti su,

ta ada zɛlɛgiti ma lɔɔɠuzuʋɛti.

Ɠaazuʋɛ ɠula lɛɛ, gè è-ɠaazuʋɛ ɠa,

ta gè è woomɛni,

mazɔlɔɔ è-wooi wola nɛɛʋɛ,

è-ɠaazuʋɛ wola ʋagai.

15 «À wansai niiti so dɛɛ gi ʋɛ,

wansa yiʋoi niiti,

tiya ɠa ti faa zuɠoloɠologi ɠɛɛzu gá-leezɛn ɓeleiti su,

tama naati ti teʋea.»

16 Nɛ̀ɛbɛ nui ɠa zèema,

nà ɓalaa gè ɠɛ zeema,

toɠa ná-baalagiti kɔnɔkulazu bulɛgiti saama.

17 Kpɔkɔ ɠaalɛilɛigi ɠa zeelina,

niinigiti su ɠa wɔɔlɔna,

ɠale ma, nɛ̀ɛbɛ nui, è ʋa,

veɠa ɓɔɠɔ ma,

eɠɛ dopai ɓaa goe ziʋoi a ɠɛ ada zɛlɛgiti.