Guyei Pagai Guyei Pɛ Ba 3

1 Zɛ̀gɛ laani nà-betei zu kpidii,

gè ɗa zìima nui ɠaiziɛ,

gè gaiziɛʋɛ, kɛlɛ gè la kaani.

2 Gè ɠɛni ɓɔɠɔ ma: «Nà wuzeɠezu mu, gè taai lati,

gè leʋe koi yɔɠɔzuʋɛti, ta maaɓɔ bosuʋɛti,

gè zìima nui ɠaiziɛ.»

Gè gaiziɛni, kɛlɛ gè la kaani.

3 Gi ɠomini gá taa makɛ nuiti,

ti ɗa lati taai ma.

Gè ti ɠaazaɠani ga:

«Wo la zìima nui ɠaani bɛ̀?»

4 Gè leʋeni nɔ ti ʋa feya,

gè zìima nui ɠa.

Gè soni zeei ʋa,

gè la mɔ ɓeni ba pɛ,

eyɛsu gè lɛɛ la

sɔ̀lɔɔ deei ná-pɛlɛi wu.

5 Zeluzalɛme anzalopoiti, nà wo maanɛɛnɛzu

dopaiti ta goegiti daaseigi zu, ti dɔɓɔi zu:

À mina nɛɛbɛi maaloɠa,

à mina maaloɠa, aisa é ʋa nɛɛ bɛ.

6 Ɓɛ ɠanu, é ɠulazu teʋebai zu,

é ɗa lɛ eɠɛ abu luulu,

makugi nɛai eɠɛ miilegi,

naa ʋɛɛ ansansegi ma zii pɛ ba?

7 Salomɔn laa ʋetei ʋe,

maaɠakugai ga zɛbɛsu nu ʋuulɔzita (60),

Izilayɛle zɛbɛsu nuiti saama.

8 Boɠa zɔkpɔi ɠa ti pɛ zea,

ti ɠalagai ga kɔɔi.

Ɛsɛ saamaɠiliʋɛ ga ná-kɔɔɠɔ zɔɔla,

kpidii zu vaaɓaagiti daalɔɠɔma.

9 Ti Salomɔn zeɠe ɓɔkpɔgi ɓɛtɛʋɛ

ga Liɓan wului.

10 Ti ma ɓɛdɛgiti kpɛtɛʋɛ ga walii,

tiɓisuʋɛ ɠɛ ga zanugi,

ti seɠe ɓɔkpɔgi ɓɛtɛ ga zalama zeɠei,

Zeluzalɛme anzalopoiti ti suʋu ga nɛɛbɛi.

11 Ee, Zeluzalɛme anzalopoiti, à ɠula,

wo masagi Salomɔn ɠa, masa bɔɔlɔgi unma,

nii dee dɔɔni unma, ná-vulu ɠɛɛ voloi,

yeei koozunɛɛi ziimaʋɛ pɛ daaveni la.