1 Ee, é ga è ɠɛni ga bàazeelai,

nii é dèe ná-ɲiimii ɓɔleai!

Nà la zoo gè è laaɠomi eteaʋɛ,

gè è nɛɛnɛ, nu la ɓena sùɠula.

2 Gè ɓena li ga ɗe dèe ná-pɛlɛi wu,

è nɔ̀un kala,

gè dɔɔ maku nɛɛnɛgi ve, è kpɔle,

nà-gelenadegi ma ɗɛi.

3 Kɔʋɛzu ʋele yeei ɠa é daazu nɔ̀ungi wu,

é zeezai velevele mà.

4 Zeluzalɛme anzalopoiti, nà wo maanɛɛnɛzu ga:

À mina nɛɛbɛi maaloɠa,

à mina maaloɠa, aisa é ʋa nɛɛ bɛ.

(Zeluzalɛme anzalopoiti)

5 Anzanui ɓɛ ɠanu, é ɠulazu teʋebai zu, é ɗa lɛ,

tiɓigai nɛɛbɛ nui yeei ʋa?

(Anzanui)

Gè è maaloɠaʋɛ pɔme gului wu,

ʋɛ è-lee è-ma ɠogi zeɠeai ná,

ʋɛ è-lee è zɔlɔɔni ná.

6 Nɔ̀un seɠe, è kɛ̀ ga poogi ɠɛʋele è-yiimaʋɛ,

eɠɛ poogi nii é è-yeei ma.

Tɔɔzei nɛɛbɛi zɛbɛi wɔɔlɔʋɛ ga saai ɠɛʋele,

wɔinlai ɓaaʋɛ ga gɔvɛalaazu ɠɛʋele.

Nɛɛbɛi ná-abuzogiti ta ga abu nɛ golai.

7 Ziɛ wolai tanɔpɛ ge la zooga nɛɛbɛi ná-abui ʋaazu,

ziɛ wolaiti ti la maaɓɔlega.

Anɛɛ ɓalaa nui ta ɠa kɔligi kpein feezu nɛɛbɛi ɠeya vai ma,

ɲɛɛɠulasu nɔ ɠa ma nu a sɔlɔɔ.

(Ɠɛɛɠɛlointi)

8 Gá-zeela goi ta ɠa ná,

é la dɛ ɓaɠoni, ɲiimi la dɛ ba.

Leeni ɠa gi ʋaazu kɛɛzu bɛ,

siɛgi zu ná-vulu vai maanɛai é ɠɛɛ la?

9 Ni a ɠɛna ga siɠigi,

gá kɔɔɠɔ ʋɛlɛiti to ma ga walii,

ni a ɠɛna ga pɛlɛlaʋɛ,

gi sɛdele kpogiti pilɛ da.

(Anzanui)

10 Nɔ̀un nà ga siɠigi,

ɲìimiiti ta ga siɠi gaaɠoozagiti.

Naazu, nà ɠa gè ga ná-undaanɛɛi.

(Zunui)

11 Leezɛn ɓelei ta ɠɛni Salomɔn ya Ɓaale-Ɠamon,

é kalivaa makɛ nua ma.

Leezɛn waai ɠeya zɔngɔi ɠɛni ga wali ɠae waagila (1.000),

nii ti ɠilagilagi ti ɠɛni feezu zea.

12 Nɔ̀un, nà nà-leezɛn ɓelei makɛsu nà ɓɔɠɔi.

Salomɔn, ɗɔun yeekɛ ɗa-wali ɠae waagilagi (1.000) ʋa,

nii unfelegɔi (200) ɠɛɛzu ga gulu waa makɛ nuiti tɔnɔi.

13 Ɗɛi è zeizu kpeleiti su,

bɔ̀ɔlaiti goilogɛ è-woo ma.

Ee, soma kae gè è woomɛni!

(Anzanui)

14 Ʋela fala, nɛ̀ɛbɛ nui,

veɠa ɓɔɠɔ ma eɠɛ dopai, ɓaa goe ziʋoi,

tufa maku nɛɛnɛ gizei ma.