1 Gè telebotala vaiti kaani mɔnɔ, ti ɠɛɛzu zooi ɠa. Maawɔin nuiti ta wɔlɔ, ti ɠaanɛɛnɛ nu la ná. Gaaɓaai ɠa zobobɛ nuiti nɔ ʋɛ, naa ɠa é kɛɛzu ti ɠaanɛɛnɛ nu la ná. 2 Gè kaaʋɛ ga zɔiti ti zaai niina, naati undaanɛɛʋɛ, é leʋe niiti ba, ti vulua dɛ. 3 Kɛlɛ nii fizɔgai ti pɛ ba, naa ɠa ga nii é la dɛ vɔlɔ zɔlɔɔni, nii é la dɛ ɠaazulaani faa ɲɔi ma, é ɠɛɛzu zooi ɠa.

4 Gè pɛtɛgɛ ɓalaa ga nuɓusɛiti ta ɠaaɓaazu, ti kpɔlɔi zuzo ta-wotiiti dii vai zu luɠɔ, naa pɛ ma ungi ɠa ga toloi é ti yɔɠɔzu. Naa ɓalaa ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so.

5 Zɔi é yeeʋuuzu ɠɔkɔsu, naa ɠa ga ɠimalala nu,

nii tɔ ɓɔɠɔi ɓusɛi ɠoloɠolosu ga pului.

6 Fizɔgɛ nu é dooɠo ko ve ɓɔɠɔ ʋɛ,

è ʋa li ɓɔɠɔ zuʋaazu ga botii, eɠɛ nu ɠa ɠɛ ɓizɛzu fiilɛi ʋolu ga é so.

7 Gè wafuun fai ta ɠaaʋɛ mɔnɔ, é ɗa ɠɛ zooi ɠa. 8 Gè zunu ɠila pɛtɛgɛ, tɔ ɠila kpe nɔ, siɛpoluɲɔɠɔ nɔpɛ ge la ná, doun la bɛ, kɛɛɠɛloun la ná, tama é ɗa boti ɠɛ, dooɠo faa la ba. É la ɓɔlɔzu ga naavolo ɠaiziaai. Toɠa ɓɔɠɔ ɠaazaɠasu ga: «Ɓɛ ɠa mu gè botii ɠɛɛzu bɛ, ta gè ɠɛlɛzu nà-undaanɛɛi ʋa bɛ?» Naa ɓalaa ka ga wafuun faa nɔ, ta ziizoolɛ ɲɔuɲɔu gola.

9 Nu felegɔi ɓɔgai su, naa vizɔgɛ nu ɠilagi ʋa,

ta ɠɛna fele, ta ɗa ta-wotii zulɔnɔgi zɔlɔɔ.

10 Ni gila ka loona, bɔɔlai ɠa ɗa buzeɠe,

kɛlɛ zɔi tɔ ɠila be, naa maawɔingo,

ni a loona, bɔɔla la ná, nii a buzeɠe.

11 Ʋele nɔ ɠana é la, ni nu wa ɠɛna laani ga nu felegɔ betei zu,

diegi ɠa zoo zeizu wo ma,

kɛlɛ zɔi tɔ ɠila é laani,

diegi ɠa zoo zeizu ɠale naa ma?

12 Ni nui ta a ɠɛna ná, é ɗa vɔni nu ɠilagi ma,

nu felegɔi ɠa zoo vɔnisu tɔun ma.

Galu ʋɔɛngi nii é ma ga saʋagɔ,

naa leʋe la ɓaaʋɛ.

13 Zunu loungoi é ga bala nui, kɛlɛ ɠigi ma, naa vizɔgɛ kɛwola wɔlɔi ʋa, é ga masagi, ɠi ge la ma, tama é la woilosu tɛnɛ gooiti ma. 14 Anɛɛ ɓalaa zunu loungoi naa zɔlɔɔgɛ baladai zu, ɓaa é ɠula nɔ feya kasoi ɠa, é ɗa ɠɛ ga masagi. 15 Naa ɠɛɠala vai ta ɠɛɛni, gè pɛtɛni ga ɛsɛ pɛ ge ɠɛni zunu loungoi ná-kakei ɠa, nii é zeizu masagi ʋotogi zu. 16 É ɠɛni bɛbɛ wolai untuɠɔ, nii nu la zooga gaalusu. Tama yeeɠɛɠalai nii é ʋaazu tɔun poluma, naama nuɓusɛiti ti la mɔ ɠoozunɛa tɔun ma. Naa ɓalaa ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so.

17 Mina li GALA sei ʋɛlɛi ma ɠoizuʋɛ ga ɠi poluma ʋele. Ɗa ɠɛna lia, li nii a kɛ è woilo faa ma, naa vizɔgɛ, é leʋe zalaɠai ʋa, ɗa kula ga ɠimalala nuiti kɛʋele, niiti ti la kwɛni ga faa ɲɔu ɠa ga naa, nii ti kɛɛzu.