Zelemi 41

1 Alugi lɔfelasiɛi ma, Netania ná-doun zunui Isemayɛle, é ga Elisama ná-dounloin, masa suwuzui ta, é ga ɓalaa masagi ná-nu wolai ta, naa ʋaani, ta zunu puugɔ, Ayikame ná-doun zunui Gedalia ʋɔ bɛ Misepa. Ti daamii woni miná ʋɔɔma Misepa. 2 Netania ná-doun zunui Isemayɛle wuzeɠeni nɔ pu, ta zunu puugɔiti ti ɠɛni polu, ti Gedalia ʋaa ga ta-woɠa zɔkpɔiti, Ayikame ná-doun zunui, Safan ná-dounloin, nii Ɓaɓilɔne masagi seini ga kundiɠii zooi unda. 3 Naa ʋoluma Isemayɛle Zuda nuiti pɛ paani, ti ɠɛni Gedalia ɠoba Misepa, ta Ɓaɓilɔne zalaʋusuiti ti ɠɛni náʋɛ.

4 Foloi velesiɛi, Gedalia ʋaai ma, siɛgi zu nu nɔpɛ ge la ɠɛni suɠwɛɛ da, 5 názu ɠa zunu ʋuulɔsaʋa (80) zeɠeni la Sikɛme, ta Silo, ta Samali, ti ʋa. Ti-ɓɛlɛiti bogai, ti-maazeɠeiti baliai ga ga kidaaʋiligi maaʋele, ti ɓɔɠɔ maazaɠazaɠaai saa wɔlɔ wo fai zu. Ti ʋaani ga vebɛ zalaɠaiti ta ansansegi, ti ʋa fe GALA bɛ Zeluzalɛme Ɠɔoɠɔ GALAGI zei ʋɛlɛi ma ɠoizuʋɛ. 6 Netania ná-doun zunui Isemayɛle ɠulani Misepa, é lo ti luɠɔ, é ɗa wɔlɔ. Siɛgi zu é zeelini la ti ma, é ɠɛ ti ma: «À ʋa Gedalia ʋɔ bɛ, Ayikame ná-doun zunui.» 7 Kɛlɛ ti zeeliai ma taazuʋɛ, Netania ná-doun zunui Isemayɛle ta ná-nuiti ti nuiti paani, ti poomaiti pili ya kɔlɔyeɠei zu. 8 Kɛlɛ zunu puugɔ ɠɛni ti zaama, naati ti ɠɛni Isemayɛle ma: «Mina gi ʋa, mazɔlɔɔ daamianigi makɛgɛ gi ʋɛ dɔɓɔi zu, ga moloi, ta wɔɔlezegi, ta gulɔi, ta kɔin gulɔi.» Isemayɛle la mɔ ɠɛni ti ʋaani ʋɔɔma ta ti-ɠɛɛleai zɔiti.

9 Kɔlɔyeɠei nii Isemayɛle zunui naati ma ʋoomai ʋilini su, ti ti ʋaani, é ɠɛni ga kɔlɔyeɠe wolai nii masagi Aza ɠɛni ti bɔ, siɛgi zu kɔɔi ɠɛni la ti yɔɠɔzu ta Izilayɛle masagi Ɓaasa. Naa ɠa Netania ná-doun zunui Isemayɛle daaveni ga nu ʋoomai. 10 Isemayɛle nuɓusɛi mɔtai pɛ soni Misepa ga duɔi: masagi ná-doun anzanuiti, ta nuɓusɛi kpein é yɛni Misepa, masagi makɛ nuiti ta-ɠundiɠii Neɓuzaladan kalivaani Ayikame ná-doun zunui Gedalia ma. Naa ʋolu wɔin ɠɛni Isemayɛle ma ga é li ga duɔiti Amɔn nuiti pɔ bɛ.

Isemayɛle ná-duɔ zogaiti unmɔɔ fai

11 Kaleya ná-doun zunui Yoɠanan ta salaʋusu ɠundiɠiiti kpein ti ɠɛni ba, ti faa ɲɔi naa pɛ mɛnini, nii Netania ná-doun zunui Isemayɛle kɛɛni. 12 Ti zunuiti pɛ seɠeni, ti li, ti laalɛ Netania ná-doun zunui Isemayɛle wu. Ti kɔɠɔzumɛɛnni Gaɓaɠɔn kpoi golai ɠobaʋɛ. 13 Siɛgi zu duɔiti pɛ ti ɠɛni Isemayɛle ya, ti Kaleya ná-doun zunui Yoɠanan ɠaani la, ta salaʋusu ɠundiɠiiti kpein ti polu, ti ɠoozunɛɛni. 14 Naazu, nuɓusɛiti pɛ Isemayɛle ʋaani ga tiye, ti zeɠe Misepa, ti ɠaleni ma, ti li, ti ʋɛɛ Kaleya ná-doun zunui Yoɠanan ʋa. 15 Kɛlɛ Netania ná-doun zunui Isemayɛle ʋelani ga zunu lɔsaʋa Yoɠanan ʋa, é li Amɔn nuiti pɔ bɛ.

16 Naa ʋoluma, Kaleya ná-doun zunui Yoɠanan ta salaʋusu ɠundiɠiiti ti ɠɛni polu, naati ti nuɓusɛi mɔtai pɛ seɠeni, niiti Isemayɛle zeɠeni ga tiye Misepa, Gedalia ʋaa ʋoluma: salaʋusuiti, anzanuiti, doungoiti, ta kundiɠi wolaiti, de bosu, nii pɛ ti ʋaani la, ti zeɠe Gaɓaɠɔn. 17 Ti lago loni wɛɛn laazu ʋɛɛzuʋɛ Kimeɠame, Ɓɛteleyɛme ɠobaʋɛ. Wɔin ɠɛni ti ma ga ti li dɛ Ezipete yooi zu, 18 mazɔlɔɔ ti ɠɛni luazu Ɓaɓilɔne nuiti ba, kaipa Netania ná-doun zunui Isemayɛle Ayikame ná-doun zunui Gedalia ʋaani, nii Ɓaɓilɔne masagi seini zooi unda.