Zelemi 28

Zelemini ta Ɠanania

1 Naama ɠona gilagi nɔ, Zuda masagi Sedesiyase ná-masadai lɔɔzeigi, konagi naanisiɛi ma alu dɔɔlugɔi, Azuul ná-doun zunui Ɠanania, GALA goo wo nui, é ga Gaɓaɠɔn nui, naa ɠɛni mà, Ɠɔoɠɔ GALAGI zei ʋɛlɛi ma ɠoizuʋɛ, zalaɠa ɠula nuiti ta nuɓusɛiti kpein gaazu: 2 «Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Sei undai Ɓaɓilɔne masagi bogai eɠɛ unbawului, gè suɓezeɠelega! 3 Tɔɔzei, é yɛga ga kona felegɔ, gè ʋa ʋolu ga Ɠɔoɠɔ GALAGI zei ʋɛlɛi wu zɔɔlaiti pɛ ʋɛ, niiti Ɓaɓilɔne masagi Neɓukadenɛzaal liini ga tiye Ɓaɓilɔne. 4 Nà ʋaazu ʋolu ga Zuda masagi Yekonia, Yeɠoyakime ná-doun zunui, é ɓɔ Zuda nuiti pɛ ba, ti liini ga tiye Ɓaɓilɔne,› Ɠɔoɠɔ GALAGI wooi ɠana. ‹Ungo, sei undai Ɓaɓilɔne masagi bogai eɠɛ unbawului, nà naa zuɓezeɠelesu.› »

5 GALA goo wo nui Zelemi GALA goo wo nui Ɠanania wooɠaaʋoteni, zalaɠa ɠula nuiti gaazu, ta nuɓusɛiti pɛ gaazu ti ɠɛni Ɠɔoɠɔ GALAGI zei ʋɛlɛi ma ɠoizuʋɛ: 6 «É ɠɛ yenaa kae! Ɠɔoɠɔ GALAGI kɛ yenaa, ʋelela ʋele vai è bogai é ʋilɛ su, é ʋa ʋolu ga Ɠɔoɠɔ GALAGI zei ʋɛlɛi wu zɔɔlaiti ti zeɠe Ɓaɓilɔne, ta duɔiti kpein! 7 Kɛlɛ tama, à woilo ga pagɔ naa ma, nii gè bosu wo ma, é loo è woizu, é loo nuɓusɛiti goizu. 8 Kaite GALA goo wo nua ti ʋaani, ɗɔun è luɠɔ, nà ɓalaa tùɠɔ. GALA goo wo nui naati, ti ta-ɠeela wooi woni zou wolaiti ma, ta masada wolaiti, bɔɔlɔzu ɠɛni ga kɔɔ vai, ta maanɔɠɔ vai, ta ɗɔfɔ zeeɓɛ vai. 9 Kɛlɛ ni GALA goo wo nui ta a undaanɛ vaa wona, nu ɠa kwɛɛ ɠale ga GALA goo wo nui naa, gaamazu Ɠɔoɠɔ GALAGI ɠa é teʋeni? Koo! Nu ɠa kwɛɛ siɛgi zu nii é bosu, naa laazeelizu la, é ʋilɛ su.»

10 Naazu ɠa GALA goo wo nui Ɠanania unbawului ɠulani la GALA goo wo nui Zelemi ɠɔ bu, é suɠaleɠale. 11 Naa ʋolu, niiti kpein ti ɠɛni ná, Ɠanania ɠɛ naati ma: «Ɠɔoɠɔ GALAGI wooi ɠaa: ‹Aisa kona felegɔ, tanɔpɛ ge la laa ma, kɛʋele nɔ nii zuɠaleɠaleai la, zenɔ ɠana nà Ɓaɓilɔne masagi Neɓukadenɛzaal ná-unbawului zuɠaleɠale la, gè kula ziiti pɛ kɔba.› » GALA goo wo nui Zelemi zeɠeni ná, é li.

12 GALA goo wo nui Ɠanania ɓegai ma ga unbawului zuɠaleɠale, nii é ɠɛni GALA goo wo nui Zelemi ɠɔba, Ɠɔoɠɔ GALAGI ɓɔɛni Zelemi ʋɔ, é ɠɛ ma: 13 «Li, ɗa ɠɛ Ɠanania ma: ‹Ɠɔoɠɔ GALAGI wooi ɠaa: Tɔɔzei è gulu unbawului zuɠaleɠalea, ɗa ti maavalibo ga kɔlu unbawului. 14 Mazɔlɔɔ Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: Gè kɔlu unbawului lɔa ziiti pɛ kɔba ga maaɓaai ga ti ɠolo Ɓaɓilɔne masagi Neɓukadenɛzaal ʋɛ. Ungo, ti pɛ ta ɠolo bɛ, anɛɛ dɔɓɔ zuaiti, gè naati dɔa zeezu, ti ɠolo bɛ.› »

15 GALA goo wo nui Zelemi ɠɛni GALA goo wo nui Ɠanania ma: «Woilo ga pagɔ, Ɠanania, Ɠɔoɠɔ GALAGI la è leʋeni, è niima nuɓusɛiti dia zɛɛi zo fai ma, ti la da. 16 Naa ɠa é ba, Ɠɔoɠɔ GALAGI wooi ɠaa: ‹Nà ʋaazu è-ɓusɛi ɠulazu eteai zu. Aisa ɲɔmɔ ɠonagi ʋa ɓe, ɗa zaazu, mazɔlɔɔ è lɔa nuɓusɛiti unsu, ti wuzeɠe Ɠɔoɠɔ GALAGI laalɔɠɔma.› »

17 GALA goo wo nui Ɠanania zaani ti, ma ɠonagi tɔna ma alu dɔfelasiɛi ma.