1 Mɔungi zu, GALA ge ɓɔɛni ade-mɛmɛwolani pɔ, ná zeizu mɔin, ta kɛʋele mɔinmɔin su, ga GALA goo wo nuiti maaʋele. 2 Kɛlɛ niima voloiti su, ti ga yeeɠɛɠala ɠaaɓelagiti, é woo ʋua ná-Doun Zunui la, naa ɓɔɛ la ade ʋɔ. Tɔ ɠa é yiimazeɠea la ga é anii pɛ pu zeezu. Tɔ ɠa é eteai ɓɛtɛni ga tɔun maaʋele. 3 Doun Zunui tɔna ka é ga GALA ná-lɛbiyai ma voloi, é ga GALA ɓɔɠɔi ʋaaɠulabai. Tɔ ɠa é kpɛtɛanii pɛ suzosu ga daawooi ná-zɛbɛi. Kpegai ma ga kotoiti gba vai ɠɛ, é zeini geeɠɔlɔgi zu maazuʋɛ poun, GALA Maayikiai yeezazuʋɛ.

4 Doun Zunui wɔɔlɔʋɛ gola, é leʋe geezuɠeelaiti ba, ʋele nɔ ɠana é la ɓalaa, é daasei sɔlɔɔgɛ, nii bɔɔlɔai naati tɔnɔi ʋa. 5 Mazɔlɔɔ geezuɠeelai ɓɛgele ɠa GALA ge ɠɛni ma:

«Ɗa ga dòun zunui,

za, gè è ɠɛa ga dòin.»*.

Ɓaa mu mɔnɔ:

«Nà ɠɛ bɛ ga ɠɛɛɠɛi,

tɔun ge ɠɛ bɛ̀ ga doun zunu»?*.

6 Siɛgi zu GALA ge Doun Zunu mɔungi leʋeni da eteai zu, é ɠɛni ma:

«GALA ná-geezuɠeelaiti pɛ ti nɔkɔ bu!»* bogɛ é zoloo Gɛlɛke woo zɛʋɛ wɔlɔmai ma.

7 Niima wooi ɠa é boni geezuɠeelaiti ta-vaa zu:

«Tɛigi a ɗa ná-geezuɠeelaiti kɛ ga fiilɛi,

é ná-botiɠɛ nuiti kɛ ga abuzogi.»* bogɛ é zoloo Gɛlɛke woo zɛʋɛ wɔlɔmai ma.

8 Kɛlɛ GALA ge ɠɛni Doun Zunui ma:

«Ee, GALA, ɗa-masa kpɔkpɔgi ɠa ná yeenɔpɛ, eyɛsu ɠɔ,

ɗa-masa tukpɔi ɠa ga telebo tukpɔi.

9 Telebodai nɛɛʋɛ è ʋɛ, è tɔ koloɠolo fai wɔinzeɠe.

Naa ɠa é ba, GALA, ɗa-ƓALAGI gulɔi ziɛni è ma, koozunɛ wulɔi,

é yiimazeɠe ga ɗe è ɠɛɠalaiti saama.»*.

10 É ɠɛni ma mɔnɔ:

«Ɗa ɠa, Maliɠii, è eteai lɔɔɓadɔni tɔɔzeizu mɔunpa,

geeɠɔlɔgi ɠa ga è-yeei ná-kpɛtɛanii.

11 Ta ɲɛɛlɛ, kɛlɛ ɗɔun ɗa ná eyɛsu ɠɔ.

Ti pɛ ta wɔlɔzaɠa eɠɛ seɠei,

12 è ti ʋɛɛ su, è ti ɓili eɠɛ tookɔba wolai,

ti maa ɠa valibo eɠɛ seɠei.

Kɛlɛ ɗɔun, ɗa yɛsu ɠɛʋele ma,

ɗa-ɠonagiti ti la ɓega ɠɔ!»* bogɛ é zoloo Gɛlɛke woo zɛʋɛ wɔlɔmai ma.

13 Geezuɠeelaiti su, ɓɛgele ɠa é ɠɛni ma:

«Zei zèezazuʋɛ,

eyɛsu gè è zili nuiti kɛ ga ɗa-ɠɔɠɔloma anii»?*.

14 Geezuɠeelaiti ti pɛ tɛi ti ʋa ɠɛ ga zɛnvuiti ti GALA ná-botii ɠɛɛzu ɓaa? É ti leʋesu ga ti kpɔba ve naati bɛ ti maanɛai ti kizogi zɔlɔɔ.