Zonase 4

Zonase luʋa ʋelei ta zelii Ɠɔoɠɔ GALAGI toni ma

1 Naa la ɠɛni nɛɛni Zonase ʋɛ ga tago ɓalaa, é wola yiiɠaawanani. 2 É Ɠɔoɠɔ GALAGI maanɛɛnɛni ɠani, é ɠɛ ma: «Ee, Ɠɔoɠɔ GALAGI, nii nɔ ɠa gè ɠɛni bosu, kɛ̀ai ma dɛ nà-zooi zu, naa ɠa é kɛɛni gè ɠɛni ɠɛɛzu gè ʋela, gè li Taalasise. Gè ɠɛni kwɛɛni ga ɗa ga maawɔinɠaa ƓALAGI, nii é zaalai veezu, zii la ɠulaa fala, kpɛtɛai wooɠɛɠiladai zu, a ɗa zeɠe maanɔɠɔi naa ʋaa vai ʋolu, é ɠɛa deveni ga é ʋaa la. 3 Naa ɠa é ba, Ɠɔoɠɔ GALAGI, zɛ̀nvui zeɠe niina. Saai vizɔgɛ mà, é leʋe zɛnvui ʋa.» 4 Ɠɔoɠɔ GALAGI Zonase ɠaazaɠani, é ɠɛ ma: «Gaama ɠa è ya nɛi ga è yiiɠaawana?»

5 Zonase ɠulani taai ʋa, é li, é zei taai letema, folo ɠulazu ʋelei. É kota go loni miná, é zei ma niinigi wu, é ɗa naa maaɓɔun, nii é ʋaazu ɠɛɛzu ga taai. 6 Ɠɔoɠɔ GALAGI gului ta ʋɔnɔni, gaaɠooza Zonase ʋa, nii a kɛ é ɗa niinigi ve zea, kula vai zu ná-ziiɠaawanai zu. Zonase wola ɠoozunɛɛni gului naa ma.

7 Kɛlɛ poluma voloi, geelaalaogai ma, GALA ge koʋizu ɠoegi ta leʋeni, é zeɠei wɔ gului ʋa, naa vɔ. 8 Foloi ɠulaai ma, GALA ge ʋaani ga folo ɠulazu ʋele viilɛ ɓadii. Foloi looni Zonase nɔungi zu, su ɠɛ nɔ yɔɔɠɛ. É saai maalolini, é ɠɛ ma: «Saai vizɔgɛ mà, é leʋe zɛnvui ʋa.» 9 GALA ge Zonase ɠaazaɠani, é ɠɛ ma: «Gaama ɠa è ya nɛi ga è yiiɠaawana gului nii vai zu?» Zonase gooɠaaʋoteni, é ɠɛ ma: «Ungo, gaama ɠa zèa ga gè yiiɠaawana, gè ɠɛ vɔlɔ gè za nɔ.»

10 Ɠɔoɠɔ GALAGI ɠɛni Zonase ma: «Gului ɠana maawɔin è zosu, nii è la mɔɔlɛni ma, ɗa lɛi è ʋa kpɛtɛ, nii pɔnɔgai kpidi ɠila nɔ, é za poluma ɓidi nɔ. 11 Naa ɠa è ɠɛa ɠɛɛzu, gè mina Ninive taa wolai maawɔinɠa, ʋɛ nuiti ti leʋegai nu waaungila nu waaʋuufelegɔ (120.000) ʋa, niiti ti la yeeza ɠwɛɛ, ti la ɠɔʋɛ ɠwɛɛ, naa ʋɛɛ togani mɔinmɔingiti ba?»