Neɠemi 6

Neɠemi faaɓaagi ma niinɛ ɠili maazuɓudɛ vai mɔnɔ

1 Sanebalate ʋe, Toɓiya ʋe, naa ʋɛɛ Alaɓe nui Gesɛme ʋa ta gi zili nui mɔtaiti ti mɛnini ga gè ɓega ga siɠigi lo ʋolu taai ma, ta zeɠe nɔpɛ ge la mɔ siɠigi ʋa. Naama ziɛgi zu gè la ɠɛni dɛ vɔlɔ kpogiti tooni ma ziɠidaʋɛti da. 2 Sanebalate ta Gesɛme ti keela leʋeni mà, ti ɠɛ mà: «Ade ɠomi Kefilime, Wono ʋɛtugi zu, ade ɓɔɠɔ ɠaa.» Ti ɠisiɛni ga ti faa ɲɔu ɠɛ ga ze. 3 Gè ti wooɠaaʋoteni, gè ɠɛ ti ma: «Botii zuwɔɔlɔʋɛ dɛ zèa, gè la zooga yeizu wo ʋɔ pelei ɓɔɠɔ ɠaa vaa ma. Nà zeɠena boti ɠɛɛzuʋɛ, toɠa lo ga pòluʋelei.»

4 Ti naama vaa ɠilagi ma ɠeelai leʋe daa ɠɛɛni ga naanigɔ, gè ɗa gooɠaaʋote gilagi nɔ ve ti ya. 5 Ná zeizu lɔɔlusiɛi, Sanebalate naama vaa ɠilagi ma ɠeelai leʋeni mà, é sɛʋɛi ɠɛ, é daalaogai ve ná-botiɠɛ nui ya, naa ʋaa la pɔ̀. 6 Sɛʋɛi naa zu wooi ɠɛni ga nii: «Toɠa wosu zii ɠiligiti saama, Gesɛme ɓalaa bogɛ mà, ga wa è-ɠɛɛloun Zuifuiti wa ɠisiɛzu ga wo ɓaka, tɔ vɔlɔ naa ɠa é kɛɛzu è siɠigi losu ʋolu, kɛɛʋɛ eɠɛ vɔlɔ ɗa pɔ ga è ɠɛ ga ta-masagi, 7 bogɛ ɓalaa ga è yeeloga GALA goo wo nuiti ba, niiti ti ʋaazu bosu Zeluzalɛme ga ɗa ɠa niina è ga Zuda masagi. Naa ɠɛɠala ɓɔɛiti ta ʋaazu zeelizu masagi ma, naa ɠa é ba, ʋa, ade ɓɔɠɔ leve.» 8 Gè gooɠaaʋoteni, gè ɠɛ ma: «Nii kpein è bosu, gaama ɠila kpalaa ge su, ɗa ɓɔɠɔ ɠa è naati kpɛtɛa.» 9 Niima nuiti pɛ ti ɠɛni pɔ ga ti gi maalua, ti ɗa ɠisiɛ ga gi iɲɔ ka leʋena, gi la mɔ botii ɠɛa.

Naa ɠa é ba, ee, nà-GALAGI, sɛ̀bɛlɔɔna nà-botii zu.

10 Gè liini yeeta Delaya ná-doun zunui Semaya ʋɔ bɛ, Meɠetaɓeyɛle ná-dounloin, mazɔlɔɔ é pɛlɛi laaɠuluni ɓɔɠɔ ma, é ɠɛ mà: «De li GALA sei ʋɛlɛi wu, GALA sei ʋɛlɛi zaama munu, de daaɠulu ɓɔɠɔ ma, tɔɔzei è zili nuiti ta ʋaazu è ʋaa vai ma, tama kpidii ɠa ti ʋaazu la ga ti è ʋaa.» 11 Gè gooɠaaʋoteni, gè ɠɛ ma: «Gè la ga naama zunui ta gè ʋa ʋela, é ɠula naa ʋolu ɓalaa, ʋelei gè la ɠani, nà ɠa nà zoo gè lɛ GALA sei ʋɛlɛi ɠoozuʋɛ, gè yɛ vulua? Gè la lɛɛzu ná pɛ!» 12 Gè gaaɠaani ga GALA tɛi é ʋa teʋe, kɛlɛ kpɔɛʋɛ pɔ̀ ɠanu tɔɔzei Toɓiya ta Sanebalate ti lɔɔni unsu ga walii. 13 Ti naa ɠɛɛni, nii a kɛ gè lua, gè ʋilɛ gooi ʋolu, gè loo kotoi zu, naazu ta zobo sɔlɔɔ ti tɔ̀ɠɔ ɲɔu ziɛ, ti unfegi yei ga ze.

14 Ee, nà-GALAGI, ɠizɛ Toɓiya ta Sanebalate ti-zɔgiti su, naa ʋɛɛ gala goo wo anzanui Noadia ʋa, ta gala goo wo nui zɔiti kpein ti ɠɛa pɔ ga ti màalua.

15 Siɠigi lo fai ɓeni alugi naa ma daa ga Elule, ma volo ʋuufelegɔ maazu lɔɔlugɔi (25) ma. Botii pɛ ge ɠɛɛni folo ʋuulɔɔlugɔ maazu felegɔ (52) laawu. 16 Siɛgi zu gi zili nuiti, zii ɠiligiti ti gi-maaɠoolii zu, ti mɛnini da ga siɠigi ɓega ga lo, ti wola luani, naa ʋoluma ti ʋɛlɛʋɛlɛ ɓɔɠɔ ɠaazu. Ti kwɛɛni ga botii nii ɠɛɛʋɛ ga gá-ƓALAGI ná-kpɔbai.

17 Naama ziɛgi kpein daawu, Toɓiya ta Zuda nu wolai tanigaa ti ɠɛni sɛʋɛiti teʋesu ɓɔɠɔ ma. 18 Mazɔlɔɔ Zuda nu mɔinmɔin ge ɠilini ba konai maazu, tɔɔzei é ɠɛni ga Ala ná-doun zunui Sekania nɛkoi, ta tɔ ɓɔɠɔi ná-doun zunui Yoɠanan Mesulame ná-doun anzanui vuluni, Ɓelekia ná-dounloin. 19 Ti ɠɛni tɔɠɔ ʋagɔi wosu gàazu, ti ɗa gòoiti daazeeli ma. Toɓiya ɓɔɠɔi ɠɛni sɛʋɛiti teʋesu, nii a kɛ é màalua.