Wozé 12

Zakɔɓe mavofodaiti ta-ɠotoi

1 Efelayime màaɠakuga ga zɛɛi,

Izilayɛle ʋɛlɛyeɠei màaɠoolia ga yaavai.

Kɛlɛ Zuda ɠa dɛ GALA ba,

toɠa dɛ ga wooɠɛɠila nu GALA Ɲadegai ʋɛ.

2 Efelayime ɠa ɓɔɠɔ ɠɔnɔkulazu ga fiilɛi.

Toɠa ɓizɛzu folo ɠulazu ʋele viilɛi ʋolu foloi laawu ɲɛgɛlɛin.

Folo-o-folo toɠa ta ɓɔsu zɛɛi ʋa, ta toomai,

é ɗa ɓɔɠɔ ɠili Asiili ʋa ga minazeɠegi,

é ɗa gulɔi leʋe Ezipete yooi zu.

3 Tukpɔi ɠa ɓalaa Zuda ta Ɠɔoɠɔ GALAGI yɔɠɔzu.

Toɠa Zakɔɓe mavofodaiti doɠazu

tɔɔzei ti-ziɛ ʋelei maaʋele ma,

é ta-vaa ɲɔi ma ɠulanumai ve ti ya.

4 Zakɔɓe yɛni dee ɠoozu, é diɛ yaava.*12:4 Wɛlɛ ʋɛti: Zen 25:26; 27:35-36.

Kpaɠoai ma, ti ɲɛpi ɠɔɔni ta GALA.*12:4 Wɛlɛ ʋɛ: Zen 32:25-29.

5 Ti kɔɔni ta geezuɠeelai ta, é zobo sɔlɔɔ,

é wɔlɔni, é naa maanɛɛnɛ.

É GALA pɛtɛni Ɓetɛle,

miná ɠa GALA ge ɓɔɛni ná gi ʋɔ.

6 Ɠɔoɠɔ GALAGI ʋe, Fai-Pɛ-Maliɠii GALA.

Toɠa daaseigi ga: «Ɠɔoɠɔ GALAGI».

7 Niizu, ee, Zakɔɓe mavofodai,

ɠale ma mu ɗa-ƓALAGI ʋɔ.

Ɠaaɓa wooɠɛɠiladai ɠɛɛ vai ma, ta sɔledai,

naa ʋoluma, ɠito ɗa-ƓALAGI ʋa siɛnɔpɛ su.

8 Ʋelei Kanaan nuiti ti ɠɛni kɛɛzu la,

niima nuɓusɛiti ɓalaa zɛɛ ɠɔɠɔ ganigiti ta ti ya,

ti wɔinʋɛ ga yaavai.

9 Efelayime ɠɛ ma: «Gè ɓɛtɛa,

gè naavolo mɔinmɔin maaɓɔga.

Zeemaleʋebogi kpein gè kɛa,

gè la faa ɠaazani, nii a ɠɛ ga koto.»

10 «Nɔ̀un, nà ga Ɠɔoɠɔ GALAGI, ɗa-ƓALAGI,

kaite názu dɛ è Ezipete yooi zu.

Nà è ɠaaɠalesu ma mɔnɔ seɠe ɠotaiti bu,

eɠɛʋelei wo ɠɛni la siɛgi zu ade ɠomini da.

11 Gè gooi ʋuuni GALA goo wo nuiti da naama ziɛgi zu,

gè kulakɛlɛmai ma mɔinmɔin dɛɛ ga tiye.

Zaaɠaza, GALA goo wo nuiti ka gè ɓɔɛzu ti ʋɔ faalaaliiti su, ti ɗa bo.»

12 «Tɛi Galaade nuiti ti ga zɛɛ nuiti,

tiya ɓɔɠɔi ta ɠɛɛzu nɔ ga nu ɲakaiti.

Ti nikɛ zinɛ zalaɠaiti kulaʋɛ Gilegale.

Ta-zalaɠa ɠulazuʋɛti ta ɠɛ nɔ niina ga kɔtu ziɠigiti

wozawoli ʋogiti su kpalagaʋɛti.»

13 Zakɔɓe ʋelani, é li Mezopotami yooi zu.

É botii ɠɛɛni nu ɠili bɛ, anzanu ɠila sɔngɔ vai zu,

gaamazu anzanu ɠila sɔngɔ vaa ɠa é ɓɔɠɔ ɠɛɛni la ga togani makɛ nu.

14 Tama, Ɠɔoɠɔ GALAGI Izilayɛle ɠulani Ezipete yooi zu,

ga GALA goo wo nu ɠila maaʋele.

GALA goo wo nu ɠila ka é ɠɛni ɓaazu Izilayɛle maazu.

15 Efelayime nuiti ti Ɠɔoɠɔ GALAGI wola yiiɠaawanani.

Ti-Maliɠii ɠa ɲamai maaloli ti ma, nii ti puai,

toɠa ta-ɲama ʋui ma zalai ve ti ya.