1 ዮሃንሳ ኪታ 1

ደኦ ቃላ

1 ኑኒ ኮይሮፐ ዶምድ ደእያ፥ ኑ ሀይን ስእዳ፥ ኑ ፄልዳ፥ አይፈን በእዳ፥ ኑ ኩሸን ቦችዳ ደኦ ቃላባ ህንተዉ ፃፎስ።✝1:1 ዮሀ 1:1. 2 ሄ ደኦይ ቆንጭን፥ ኑኒ እያ በእድ፥ እያባ ማርካቶስ። አዋ ማታን ደእያ ኑስ ቆንጭዳ፥ መርና ደኡዋባ ህንተዉ አዋጆስ።✝1:2 ዮሀ 1:14. 3 ኑራ ህንተዉ እስፈተ ዳና መላ ኑኒ በእዳይሳነ ስእዳይሳ ህንተዉ ኦዶስ። ህንተዉ ኑራ እስፈተ ደእያ ግሾ፥ አዋራነ እያ ናኣ የሱስ ክርስቶሳራ እስፈተ ደኤስ። 4 ኑ ኡፋይሳይ ፖሎ ግዳና መላ ሄሳ ህንተዉ ፃፎስ።

ፆሳይ ፖኦ

5 ኑኒ ደኦ ግድዳ እያፐ ስእድ፥ ህንተዉ ኦድያ ኪታይ ሀይሳ፦ "ፆሳይ ፖኦ፤ እያን ም ባዋ" ያገይሳ። 6 ኑስ እያራ እስፈተ ደኤስ ያግሸ ማን ደእኮ፥ ኑ ኦዳንነ ኑ ኦሱዋን ዎርዶቶስ። 7 ሽን ፖኦን እ ደኤይሳዳ፥ ኑካ ፖኦን ደእኮ፥ ኑስ ዎል ግዶን እስፈተ ደኤስ። እያ ናኣ፥ የሱሳ ሱይ ናጋራ ኡባፈ ኑና ጌሼስ።

8 ኑኒ፥ ኑናን ናጋር ባዋ ጊኮ ኑ ኑና ጭሞስ፤ ኑናን ቱም ባዋ። 9 ሽን ፆሳስ ኑ ናጋራ ፓፅኮ፥ እ ኑ ናጋራ አቶ ጋናዉነ ኑ ቆሆ ኦሶ ኡባፈ ኑና ጌሻናዉ፥ አማነትዳይሳነ ቱማ። 10 ኑኒ ናጋራ ኦቦኮ ጊኮ ፆሳ ዎርዳንቾ ከሶስ፤ እያ ቃላይካ ኑናን ዴና።