1 ታ ሲቆ እሻቶ፥ አያናታ ኡባ አማኖፕተ፥ ሽን ኤንቲ ፆሳፈ ይዳኮ ፓጭድ በእተ። አይስ ጊኮ፥ ዳሮ ዎርዶ ናበት አላመን ደንድዶሶና። 2 ፆሳ አያና ግደይሳ ህንተ ሀይሳን ኤራና፤ "የሱስ ክርስቶሲ አሰ ግድድ ይዳይሳ ማርካታይስ" ግያ አያና ኡባይ ፆሳፈ ዬስ። 3 ክርስቶስ አሰ ግድድ ይዳይሳ አማናይስ ጎና አያና ኡባይ ፆሳፈ ግደና። ሄስ ክርስቶሳ እፅያ አያና። ህንተ ሄ አያናይ ያናይሳ ካሰ ስእደታ፤ እ ሀር አቶሽን ሀእካ አላመን ደኤስ።

4 ታ ናይቶ፥ ህንተ ፆሳሳ። ህንተ ግዶን ደእያ ጌሻ አያናይ አላመን ደእያ አያናፐ ዳሮ ዎልቃማ ግድያ ግሾ ዎርዳንቾ ናበታ ህንተ ፆንደታ። 5 ኤንቲ ሀ አላምያ አሰ ግድያ ግሾ፥ ሀ አላምያባ ኦዶሶና፤ ሀ አላምያ አሳይ ኤንታ ኦዳ ስኦሶና። 6 ኑኒ ፆሳፈ የለትዳ፤ ፆሳ ኤርያ ኦንካ ኑና ስኤስ። ፆሳ ኤሮና ኦንካ ኑና ስኤና። ኑኒ ቱማ አያናነ ዎርዶ አያና ሄሳን ሻኮስ።

7 ታ ሲቆ እሻቶ፥ ሲቆይ ፆሳፈ ያ ግሾ፥ አነ እሶይ እሱዋራ ሲቀቶስ። ሲቅያ ኦንካ ፆሳ ናአ፤ እ ፆሳ ኤሬስ። 8 ፆሳይ ሲቆ ግድያ ግሾ ሲቆና ኦንካ ፆሳ ኤረና። 9 ኑኒ ክርስቶሳ ባጋራ ደኡዋ ደማና መላ ፆሳይ ባ እስ ናኣ ሀ አላምያ ኪትስ። ፆሳይ ኑና ባ ሲቁዋ ሄሳን በስስ። 10 ቱማ ሲቆ ጉሳይ ሀይሳ፦ ኑኒ ፆሳ ሲቅዳ ግሾ ግዶናሽን፥ ፆሳይ ኑና ሲቅዳ ግሾነ ኑ ናጋራፐ ኑና ማራናዉ ባ ናኣ ኪትዳ ግሾሳ።

11 ታ ሲቆ እሻቶ፥ ፆሳይ ኑና ሀይሳዳ ሲቅኮ፥ ኑካ እሶይ እሱዋ ሲቃናዉ በሴስ። 12 ፆሳ በእዳይ ኦንካ ባዋ። ኑኒ እሶይ እሱዋ ሲቅኮ ፆሳይ ኑናን ደኤስ፤ እያ ሲቆይካ ኑናን ፖሎ ግዴስ።✝

13 ፆሳይ ባ ጌሻ አያና ኑስ እምዳ ግሾ፥ ኑኒ ፆሳን ደኤይሳነ እካ ኑናን ደኤይሳ ኤሮስ። 14 አዋይ ባ ናኣ፥ ሀ አላምያ አሸይሳ ግዳና መላ ኪትዳይሳ ኑኒ በእድ ማርካቶስ። 15 የሱሲ ፆሳ ናኣ ግደይሳ ማርካትያ ኦደንካ ፆሳይ ደኤስ፤ እካ ፆሳን ደኤስ። 16 ፆሳይ ኑና ሲቀይሳ ኑኒ ኤሮስነ አማኖስ።

ፆሳይ ሲቆ። ሲቆን ደእያ ኦንካ ፆሳን ደኤስ፤ ፆሳይካ እያን ደኤስ። 17 ኑ ደኦይ ሀ አላምያን ክርስቶስ ደእዳይሳ መላ ግድያ ግሾ፥ ፕርዳ ጋላስ ያዮና እያ ስን ሺቃናዉ እያ ሲቆይ ኑናን ፖሎ ግዴስ። 18 ሲቆን ያሽ ባዋ፥ ቱማ ሲቆይ ያሽ ከስ ሆሌስ። ያሽነ ፕርድ እስፈ ብያ ግሾ፥ ያይያ ኡራ ሲቆይ ፖሎ ግደና።

19 ፆሳይ ኮይሮ ኑና ሲቅዳ ግሾ ኑ ሲቆስ። 20 ኦንካ፥ "ፆሳ ሲቃይስ" ግሸ ባ እሻ እፅኮ፥ እ ዎርዳንቾ። አይስ ጊኮ፥ በእያ ባ እሻ ሲቆና ኦንካ በእቦና ፆሳ ሲቃናዉ ዋንድ ዳንዳኢ? 21 ክርስቶስ ኑስ እምዳ ኪታይ ሀይሳ፤ "ፆሳ ሲቅያ ኦንካ ባ እሻ ሲቃናዉ በሴስ" ያገይሳ።