1 ታኒ፥ የሱስ ክርስቶሳ ሀዋረይ ጰፅሮስ፤ ጳንፆሳን፥ ጋላትያን፥ ቃጳዶቃን፥ ኢሰንነ ብታነን በታንቾዳ ላለትድ ደእያ ፆሳይ ዶርዳ፥ አሳስ ሀ ዳብዳብያ ፃፋስ። 2 የሱስ ክርስቶሳስ ህንተ ኪተታና መላነ እያ ሱን ጌያና መላ፥ ፆሳ አዋይ ባ ካሰ ኤራን ዶርዳይሳታስነ ጌሻ አያናን ጌይዳ፥ ህንተዉ አ ኬሀተይነ ሳሮተይ ግዶ።
ዮና ኡፋይስ
3 የሱስ ክርስቶሳ ሀይቆፐ ደንድ ባ ግታ ማሮተን ናምአን የለተነ ዮና ኡፋይሳ እምዳ ኑ ጎዳ የሱስ ክርስቶሳ አዋይ፥ ፆሳይ ጋላተቶ። 4 ቃስ ፆሳይ ህንተዉ ዮና፥ ኢቶናነ ቡቆና ላታ ሳሎን ጊግስስ። 5 ሄ ላታይ ዎደ ዉርሰን ቆንጫናዉ ደእያ አቶተስ ፆሳ ዎልቃን አማኖን ህንተዉ ናገትድ ደኤስ።
6 ሀእ ጉ ዎደስ ህንተ ዱማ ዱማ ፓጨን ኡንኤትኮካ ሄሳን ኡፋይትተ። 7 ሄ ፓጨይ ህንተና ጋክዳይ፥ ታማን የግን ይያ ዎርቃፈ ህንተ አማኖይ አነ ቱማ ግደይሳ በሳናሳ። ሄ ፓጨትዳ አማኑዋን የሱስ ክርስቶሲ ቆንጭያ ዎደ ጋላታ፥ ቦንቾነ ሳባ ህንተ ኤካና። 8 ህንተ የሱሳ በእቤከታ፥ ሽን እያ ሲቀታ። ህንተ ሀእ እያ በእቦናባ ግድኮካ፥ እያ አማነታ። ቃስ ኦዳን ቆንጭሳናዉ ዳንዳኤቶና ኡፋይሳንነ ቦንቾን ኩምደታ። 9 ህንተ አማኖን ናግያ ህንተ ሸምፑዋ አቶተ ኤካና።
10 አ ኬሀተ ባጋራ ህንተዉ ጊግዳ ሀ አቶተባ ናበት ኤራናዉ ግታ ኮሻንነ ናጎን ኮይዶሶና። 11 ኤንታን ደእያ ክርስቶሳ አያናይ እያ ዋያባነ ሄሳፈ ጉየ ያና ቦንቹዋባ ካሰትድ ማርካትሸ፥ አዉደ ዎይኮ ዋንድ ሀናኔኮ አኬካን ፕልግዶሶና። 12 ናበት ኦድዳ ትንብተይ ባንታዉ ግዶናሽን፥ ህንተዉ ግደይሳ ፆሳይ ህንተዉ ቆንጭስስ። ሀእ አሳይ ህንተዉ ኦድዳ ዎንገላ ሳሎፐ ኪተትዳ ጌሻ አያና ዎልቃን ህንተዉ ኦድዶሶና። ኪታንቾትካ ሄሳ በአናዉ አሞትዶሶና።
ጌሻተን ደእተ
13 ሄሳ ግሾ፥ ኦሶስ ህንተና ጊግስተ፤ ህንተና ሃርተ። የሱስ ክርስቶሲ ቆንጭያ ዎደ ህንተ ኤካና አ ኬሀተ ኡፋይሳን ናግተ። 14 ፆሳ ናይታዳ እያዉ ኪተትተ፤ ህንተ ካሰ ኤሮና ኦዳ ኢታ አሙዋ ካሎፍተ። 15 ሽን ህንተና ፄግዳ ፆሳይ ጌሽ ግድዳይሳዳ ህንተካ ህንተ ዱሳ ኡባን ጌሽ ግድተ። 16 ጌሻ ማፃፋን፥ "ታኒ ጌሽ ግድዳ ግሾ ህንተካ ጌሽ ግድተ" ጌተትድ ፃፈትስ።1:16 ሌወ 11:44-45፤ 19:2.
17 አሳ ሶምኦ በኦና እያ ኦሱዋዳ ፕርድያ ፆሳ፥ "ኑ አዋዉ" ግድ ፄግያባ ግድኮ፥ ሀ ሳኣ እማተ ዱሳ ያሻን ደእተ። 18 ህንተ፥ ህንተ አዋታፐ ላትዳ ፓና ደኡዋፐ ዎዘትዳይስ፥ ይያ ብራን ዎይኮ ዎርቃን ግዶናይሳ ኤሬታ። 19 ቦረይ ዎይኮ ቦርሶይ ባይና ዶርሳ ሱዳ አልኦ ግድዳ ክርስቶሳ ሱን ዎዘትደታ። 20 ፆሳይ አላመይ መታናፐ ካሰ ክርስቶሳ ዶርስ፥ ሽን ሀ ዉርሰ ዎድያን ክርስቶስ ህንተ ግሾ ቆንጭስ። 21 ህንተ አማኖይነ ህንተ ኡፋይሳይ ፆሳን ግዳና መላ እያ ሀይቆፐ ደንድ፥ ቦንችዳ ክርስቶሳ ባጋራ ፆሳን አማነታ።
22 ህንተ ቱማተስ ኪተትድ ህንተናተ ጌሽደታ። ህንተ እሶይ እሱዋ ዎዛናፐ ሲቀታ፥ ሽን ሀእካ ቱማ ዎዛናፐ ምንድ ሲቅተ።
23 ህንተ ናምአን የለትዳይ ይያ ዘረፈ ግዶናሽን፥ መርናዉ ደእያ ፆሳ ቃላን ዮና ኮቻፈ የለትደታ። 24 ፆሳ ቃላይ፥
"አስ ኡባይ ማታ መላ፤
እያ ቦንቾ ኡባይ ጪሻ መላ።
ማታይ መሌስ፥ ጪሻይካ ቆለቴስ።1:24 እሳ 40:6-8.
25 ሽን ጎዳ ቃላይ መርናዉ ደኤስ"
ያጌስ። ህንተዉ ኦደትዳ ዎንገላ ቃላይ ሀይሳ።