ዎደ ዉርሰ ማላታታ
1 ዉርሰ ጋላሳን ኡንኤያ ዎደይ ያናይሳ ኤራ። 2 አሳይ ባንታና ዶሰይሳታ፥ ሚሸ ሲቀይሳታ፥ ጬቀተይሳታ፥ ኦቶረይሳታ፥ ጫየይሳታ፥ ባንታና የልዳይሳታስ ኪተቶናይስታ፥ ጋላቶናይስታ፥ ጌሻተ ባይናይሳታ፥ 3 ሲቆይ ባይናይሳታ፥ ማሮተ ኤሮናይሳታ፥ ዝግረይሳታ፥ ባንታና ሃሮናይሳታ፥ ዎዛና ምኖታ፥ ሎኦ ዶሶናይሳታ፥ 4 ሞርኬስ አድ እመይሳታ፥ ቆፍ ባይናይሳታ፥ ኦቶሮን ሱገተይሳታ፥ ፆሳፈ አድ አሾ ኡፋይሳናዉ ዶሰይሳታ ግዳና። 5 ኤንቲ አማንያ ዳኖሶናፐ አትሽን፥ አማኖ ዎልቃ ካዶሶና፤ ኔኒ ሄሳ መላ አሳታፐ ባቃታ።
6 ኤንታፈ እሶት እሶት አሳ ኬ ገልድ ናጋራን ኦይከትዳይሳታነ ዱማ ዱማ አሞን ሱገትያ ዳቡራንቾ ማጫሳታ ቦላ ጎዳቶሶና። 7 ሄ ማጫሳት ኡባ ዎደ ታማሮሶናሽን፥ ቱማ ኤራናዉ ዳንዳኦኮና። 8 ያነስነ ያምባሬስ ሙሰራ ኤቀትዳይሳዳ ሀ አሳት ጉገይ ኦናይሳታነ አማኖን ኩንድዳ አሳታ ግድያ ግሾ ቱማራ ኤቀቶሶና።3:8 ከሳ 7:11. 9 ሽን ያነሳነ ያምባሬሳ ኤያተይ ቆንጭዳይሳዳ ኤንታ ኤያተይካ አሳ ኡባ ስንን ቆንጫና ግሾ ኤንታዉ ሀነና።
ዉርሰ ዞረ
10 ሽን ኔኒ ታ ትምርትያ፥ ታ ዱሳ፥ ታ ቆፋ፥ ታ አማኑዋ፥ ታ ዳንዳኣ፥ ታ ሲቁዋ፥ ታ ገንጫ፥ 11 ታ ጎደተነ ታ መቱዋ ኤራሳ። አንፆከ፥ እቆንዮነን፥ ልስፅራ ካታማታን ታና ጋክዳባነ ታኒ ዳንዳእዳ መቱዋ ኤራሳ፤ ጎዳይ ታና ሄ ኡባፈ አሽስ።3:11 ሀዋ 13:14-52፤ 14:1-20. 12 ክርስቶስ የሱሳን ፆሳ ኡፋይስያ ደኦ ዳናዉ ኮይያ ኡባይ ጎደታና። 13 ኢታ አሳትነ ባለይሳት ባንታዉ ባለትሸነ ሀራታ ባለሸ ካሰፐ ኢት ኢት ባና።
14 ሽን ነ ታማርዳ ቱማንነ ነ አማንዳ አማኑዋን ኤቃ። ነ ኦደፈ ታማርዳኮ ኤራሳ። 15 ኔኒ ነ ናአተፈ ዶማዳ ክርስቶሳ የሱሳ አማናዳ፥ አቶተ ደምያ ጭንጫተ እማናዉ ዳንዳእያ ጌሻ ማፃፋታ ኤራዳሳ። 16 ጌሻ ማፃፋ ኡባይ ፆሳፈ እመትዳ ቃላ። ሄ ማፃፋይ ቱማ ታማርሳናዉ፥ ባልዳይሳታ ሴራናዉ፥ ሱርሳናዉነ ፅሎተ ዱሳስ ኮሽያ ዞረ እማናዉ ማዴስ። 17 ፆሳ አስ ፖሎነ ሎኦ ኦሶ ኡባ ኦናዉ ጊግዳይሳ ግዳና መላ ማዴስ።