1 ታኒ ነና ፆሳ ስንንነ፥ ካዎ ግድድ ሃራናዉ ቆንጭያ ዎደ ፓፃታነ ሀይቅዳይሳታ ፕርዳናዉ ደእያ ክርስቶስ የሱሳ ስንን ዞራይስ። 2 ቃላ ኦዳ፤ ዎደይ እንጀትን እንጀቶና እፅን ምናዳ ኦዳ። ዳሮ ዳንዳአንነ ታማርሶን አሳ ዞራ ሴራነ ደን። 3 አሳይ ቱማ ትምርትያ ስኦና እፅያ ዎደይ ያና። ኤንቲ ባንታ አሙዋ ካልድ፥ ባንታዉ ስአናዉ ኡፋይስያባ ኦድያ አስታማረታ ሺሾሶና። 4 ኤንቲ ቱማ ትምርትያ አግድ፥ ቱማ ግዶና ኦዳ ስአናዉ ባንታ ሀይ ዛሮሶና። 5 ሽን ኔኒ ኡባባን ነና ሃራ። መቶ ዳንዳአ። ዎንገላ ማርካተ ኦሱዋ ኦ። ነዉ እመትዳ ፆሳ ኦሶ ኡባ ፖላ።

6 ታኒ ያርሸትያ ዎደይ ጋክስ፤ ሀ አላምያ አጋዳ ብያ ዎደይ ማትስ። 7 ታኒ ሎኦ ኦላ ኦለታስ፤ ታ ጋድያ ዎፃዳ ዉርሳስ፤ አማኑዋ ናጋስ። 8 ስንፈ ፅሎተ ካላቻይ* ታና ናጌስ። ሄሳ ፅሎ ፕርዳ ፕርድያ ጎዳይ ሄ ጋላስ ታዉ እማና። ሄሳ ታ ፃላላስ ግዶናሽን፥ እያ ቆንጨ አሞትያ ኡባስ እማና።

9 ኤለሳ ያዳ ታና በአ። 10 ዴማስ ሀእ አላምያ ዶስድ፥ ታና አግድ፥ ተሰሎንቀ ካታማ ብስ። ቀርቅስ ጋላትያ ቢታ፥ ቃስ ትቶይ ድልማፀ ቢታ ብስ።✝ 11 ሉቃሳ ፃላል ታራ ደኤስ። ማርቆስ ፆሳ ኦሶን ታና ማዳናዉ ዳንዳእያ ግሾ፥ ኔራ ኤካዳ ያ።✝ 12 ታኒ ትክቆሳ ኤፈሶና ካታማ ኪታስ።✝ 13 ኔኒ ያሸ፥ ፅሮኣዳ ካታማን ካርፖሳ ማታን አጋዳ ይዳ ታ ኮትያነ ማፃፋታ ታዉ ኤካዳ ያ። ኡባካ ጋልባን ፃፈትዳ ማፃፋታ ኤኮና ዮፓ።

14 ብራታ ቆፅያ እስክንድረይ ታና ዳሮ ቆህስ፤ ጎዳይ እያ ኦሱዋዳ እያዉ ዛራና።✝ 15 እ ኑ ትምርትያ ዳሮ እፅያ ግሾ እያፐ ነና ናጋ።

16 ኮይሮ ታ ሞተትያ ዎደ ኡባይ አግድ ብዶሶናፐ አትሽን፥ ኦንካ ታና ማድቤና። ፆሳይ ሄ ናቁዋ ኤንታዉ ታይቦፖ። 17 ሽን ታኒ ኩመ ኪታ አይሁደ ግዶና አሳ ኡባስ ማርካትን፥ ኤንቲ ስአና መላ ጎዳይ ታ ማታን ኤቅድ ታዉ ዎልቃ እሚስ። ቃስ ኮሻትዳ ጋሞዳ ዶና ዶይዳ ሀይቁዋፐ ታና አሽስ። 18 ጎዳይ ታና ኢታ ኡባፈ አሽድ ባ ሳሎ ካዎተ ሳሮን ኤፋና። እያዉ መርናፐ መርና ጋካናዉ ቦንቾይ ግዶ። አምንእ።

19 ጵርስቅላስ፥ አቅላስነ አነስፎራ ሶ አሳስ ታ ሳሮዋ ኦዳ።✝ 20 ኤራስፆስ ቆሮንቶሳ ካታማን አትስ። ፅሮፍሞስ ሀርገትዳ ግሾ፥ ምልፀ ካታማን አጋስ።✝ 21 ባልጎይ ገላናፐ ስን ኤለሳዳ ያ።

ኤዉቡሉስ፥ ጱዴስ፥ ልኑስ፥ ቅላደይነ ሀራ አማንያ አሳት ኡባይ ነና ሳሮ ጎሶና።

22 ጎዳይ የሱስ ክርስቶሲ ነ አያናራ ግዶ።

ፆሳ ማሮተይ ህንተ ኡባራ ግዶ።