1 ዉርሰን ኑ እሻቶ፥ ጎዳ ቃላይ ህንተ ግዶን ኤለስድ ዳልጋናዳነ ቦንቸታናዳ ኑስ ዎስተ። 2 ሄሳዳካ፥ አስ ኡባይ ቃላ ስእድ አማኖና ግሾ፥ ፆሳይ ጌላታፐነ ኢታ አሳታፐ ኑና አሻና መላ ኑስ ዎስተ።

3 ሽን ጎዳይ አማነትዳይሳ፤ እ ህንተና ምንናነ ፃላሄፐ ናጋና። 4 ኑኒ ህንተና ኪተይሳ ሀእካ ስንፈካ ህንተ ኦናይሳስ ጎዳን ኑኒ አማነቶስ።

5 ጎዳይ ህንተ ዎዛና ፆሳ ሲቁዋኮነ ክርስቶሳ ዳንዳኣኮ ካለ።

6 ኑ እሻቶ፥ ህንተ ኑፐ ኤክዳ ኪታ ካሎናይሳታፐነ ኦሶ ብልያ አዛላ አማንያ አሳታፐ ህንተ ሻከታናዳ ጎዳ የሱስ ክርስቶሳ ሱንን ህንተና ኪቶስ። 7 ኑዳ ሀንድ ዳናዉ በሰይሳ ህንተ፥ ህንተ ሁጰን ኤሬታ። ኑኒ ህንተራ ደእያ ዎደ ኦሶ ብልቦኮ። 8 ኑኒ ኦደፈካ ካ መላ ምቦኮ። ኑስ ዳንዳኤትዳ መላ ቃማነ ጋላስ ኦ ዳቡርድ ደእዳፐ አትሽን፥ ኦደስካ ቶሆ ግድቦኮ። 9 ኑኒ ሄሳ ኦዳይ፥ ህንተዉ ሌምሶ ግዳናሳፈ አትሽን፥ ህንተፈ ማደ ኦይቻናዉ ኑስ ማት ይና ግደና። 10 ኑ ህንተራ ደእያ ዎደካ፥ "ኦናዉ ኮዮና አስ ኦንካ ሞፖ" ያግድ ኪትዳ።

11 ኑኒ ሄሳ ግዳይ፥ ህንተ ግዶን እስ እስ አዛላት ደኤይሳ ስእዳ ግሾሳ። ሄ አሳት ገልሶናባን ገልድ ሀራታ ኦሶ ብልሶሶናፐ አትሽን፥ አይኮካ ኦኮና። 12 ኑኒ ሄሳ መላ አሳት ማራ ደኦ ዳናዳነ ባንታና ኮሽያባ ኦድ ደማናዳ ጎዳ የሱስ ክርስቶሳ ሱንን ኤንታ ኪቶስነ ዞሮስ።

13 ሽን ኑ እሻቶ፥ ሎኦ ኦሶ ኦናዉ አዛሎፍተ። 14 ሀእ ኑኒ ሀ ዳብዳብያን ኪትዳ ኪታስ ኪተቶና አስ ኦንካ ደእኮ ሄ ኡራ ኤርተ። እ ዬላታና መላ እያፐ ሻከትተ። 15 ሽን እያ እሻዳ ሴርተፐ አትሽን፥ ሞርከዳ ፄሎፍተ።

16 ሳሮ እምያ ጎዳይ፥ ባ ሁጰን ህንተዉ ኡባ ዎደነ ኡባ ባጋራ ሳሮ እሞ። ጎዳይ ህንተ ኡባራ ግዶ።

17 ታኒ ጳዉሎስ፥ ሀ ኪታ ታ ኩሸን ፃፋስ። ታ ኪታ ኡባስ ማላይ ሀይሳ፤ ታኒ ሄሳዳ ፃፋይስ።

18 ኑ ጎዳ የሱስ ክርስቶሳ አ ኬሀተይ ህንተ ኡባራ ግዶ።