1 ጳዉሎስ፥ ስላሰይነ ፅሞትዮስ ተሰሎንቀ ዎሳ ኬን ደእያ፥ ፆሳ አዋባነ ጎዳ የሱስ ክርስቶሳባ ግድዳ አሳስ ፃፈትዳ ኪታ።✝

2 ፆሳ ኑ አዋፐነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

3 ኑ እሻቶ፥ ህንተ አማኖይነ ህንተ እሶይ እሱዋነ ሀራታ ሲቅያ ሲቆይ ዳሮ ድጭያ ግሾ፥ ኑኒ ሄሳስ ፆሳ ኡባ ዎደ ጋላታናዉ በሴስ። 4 ህንተና ጋክዳ ጎዳንነ ዋየ ኡባን ገንጫንነ አማኖን ምንድ ኤቅዳ ግሾ፥ ኑኒ ኑ ሁጰን ፆሳ ዎሳ ኬታን ህንተባ ማርካትሸ ህንተናን ጬቀቶስ።

5 ህንተ እያ ግሾ ግድ መቶ ኤክያ ፆሳ ካዎተስ በሰይሳታ ግድድ ታይበታና መላ ፆሳ ፅሎ ፕርዳስ ሀይስ ማላ። 6 ፆሳይ ቱማ ፕርዳ ፕርዳና። ፆሳይ ህንተና ዋይሰይሳታ ቦላ ዋየ ኤሀና። 7 ጎዳይ የሱሲ ባ ዎልቃማ ኪታንቾታራ፥ ታማ ላጮራ ሳሎፐ ያ ዎደ ዋየትያ ህንተናነ ኑና ሸምፕሳና። 8 ቃስ ፆሳይ ባና ኤሮናይሳታነ ኑ ጎዳ የሱስ ክርስቶሳ ዎንገላስ ኪተቶናይሳታ ፕርዳና። 9 ኤንቲ ጎዳ ስንፈነ እያ ቦንቹዋ ዎልቃፈ ሻከትድ መርና ዩዋን ፕርደታና።✝ 10 ሄ ጋላስ፥ እ ባ ጌሻ አሳንነ ባና አማንያ ኡባን ቦንቸታናዉነ ሳበታናዉ ያ ዎደ ኑ ህንተዉ ኦድዳ ኪታ ህንተ አማንዳ ግሾ፥ ህንተ እያ ቦንቸይሳታ ግዶንነ ሳበይሳታ ግዶን ዳና።

11 ኑኒ ህንተዉ ኡባ ዎደ ፆሳ ዎሰይ ሄሳሳ። ኑ ፆሳይ ህንተና ፄግዳ ደኡዋስ በሰይሳታ ግድድ ታይበታና መላ ኑኒ ዎሶስ። ህንተ ሎኦባ ኦናዉ አሞትያ አሙዋነ ህንተ አማኖ ኦሱዋ እ ባ ዎልቃን ፖሎ። 12 ሄሳን ኑ ፆሳነ ኑ ጎዳ የሱስ ክርስቶሳ አ ኬሀተን፥ ጎዳ የሱሳ ሱን ህንተ ቦንቻና፤ ህንተናካ እ ቦንቻና።