1 ታ እሻቶ፥ ሀ ሀኖት ሀናና ዎድያነ አጌና ህንተዉ ፃፋናዉ ኮሸና። 2 ጎዳ ጋላሳይ ካይሶይ ቃማ የይሳዳ ያናይሳ ህንተ ሎይ ኤሬታ።5:2 ማቶ 24:43፤ ሉቃ 12:39፤ 2 ጰፅ 3:10. 3 አሳይ፥ "ሳእ ሳሮ፥ አይኮይካ ሀነና" ያግሽን፥ ማጫስ እቀ ኦይከይሳዳ ዮይ ኤንቲ ቆፖና ኤንታ ቦላ ያና። ኤንቲ አይ ኦገንካ ከስ ኤኮኮና።
4 ሽን ኑ እሻቶ፥ ሄ ጋላሳይ ህንተዉ ካይሶይ የይሳዳ ያናዉ ህንተ ማን ደኤከታ። 5 ህንተ ኡባይ ፖኦ አስነ ጋላሳን ደእያ አስ፤ ኑኒ ቃማ አስ ዎይኮ ማ አስ ግዶኮ። 6 ሄሳ ግሾ፥ ኑኒ ሀራት ስከይሳዳ ስካናዉ በሰና፤ ኑኒ ባርካናዉነ ጊግድ ዳናዉ በሴስ። 7 ስከይሳት ቃማ ስኮሶና፤ ማተይሳት ቃማ ማቶሶና። 8 ሽን ኑኒ ጋላሳ አስ ግድያ ግሾ ጊግድ ዳናዉ በሴስ። አማኖነ ሲቆ ፁሩረዳ ትራን ማእድ፥ አቶተ ኡፋይሳ ሁጰን ዎያ ኦላ ብራታ ባርኔፃዳ ዎድ ዳናዉ በሴስ።5:8 እሳ 59:17፤ ኤፈ 6:13-17. 9 ፆሳይ ኑና ኑ ጎዳ የሱስ ክርስቶሳ ባጋራ ኩመ አቶተ ኤካና መላ ዶርስፐ አትሽን፥ ሀንቆስ ዶርቤና። 10 ኑኒ ፓፃ ደእን ዎይኮ ሀይቅን፥ ክርስቶስ ያ ዎደ እያራ እስፈ ዳና መላ ክርስቶስ ኑ ግሾ ሀይቅስ። 11 ሄሳ ግሾ፥ ህንተ ካሰ ኦይሳዳ፥ እሶይ እሱዋ ምንተነ ድችተ።
ዞረነ ሳሮ
12 ኑ እሻቶ፥ ህንተ ግዶን ኦይሳታ፥ ህንተና ካለና መላነ ዞራና መላ ጎዳይ ዶርዳይሳታ ቦንቻና መላ ህንተና ዎሶስ። 13 ኤንቲ ኦያ ኦሱዋ ግሾ፥ ኤንታ ዳሮ ቦንችተነ ሲቅተ። እሶይ እሱዋራ ሳሮተን ደእተ።
14 ኑ እሻቶ፥ ኑኒ ህንተና ዞሮስ። ቦዛታ ሀንቅተ፤ ባበይሳታ ምንተ፤ ዳቡራንቾታ ማድተ፤ አሰ ኡባ ዳንዳእተ። 15 ኦንካ ኢታ ግሾ ኢታ ዛሮና መላ ናገትተ። ህንተ ዎልስነ አሳ ኡባስ ሎኦባ ኦናዉ ምንተ።
16 ኡባ ዎደ ኡፋይትተ። 17 ኡባ ዎደ ፆሳ ዎስተ። 18 ኡባባን ጋላትተ። ክርስቶስ የሱሳ ባጋራ ፆሳይ ህንተፈ ኮየይ ሄሳ።
19 ጌሻ አያና ኦሱዋ ቶይሶፕተ። 20 ትንብተ ቃላ ካፕተ። 21 ኡባባ ፓጭተ፤ ሎኦባ ኤክተ። 22 ኢታ ኦሶ ኡባፈ ሃክተ።
23 ሳሮ እምያ ፆሳይ ባ ሁጰን ህንተና ፖሎ ጌሾ። ኑ ጎዳይ የሱስ ክርስቶሲ ያና ጋላሳስ፥ ፆሳይ ህንተ አያና፥ ህንተ ሸምፑዋነ ህንተ ኩመ አሳተ ቦረይ ባይና ናጎ። 24 ህንተና ፄገይስ አማነትዳይሳ ግድያ ግሾ፥ ሄሳ እ ፖላና።
25 ኑ እሻቶ፥ ኑስ ፆሳ ዎስተ።
26 አማንያ አሳ ኡባ ጌሻ ዬረተን ሳሮተ።
27 ህንተ ሀ ኪታ አማንያ አሳ ኡባስ ናባባናዳ ጎዳ ሱንን ህንተና ዎሳይስ።
28 ኑ ጎዳ የሱስ ክርስቶሳ አ ኬሀተይ ህንተራ እስፈ ግዶ። አምንእ።