1 ዉርሰን፥ ታ እሻቶ፥ ፆሳ ኡፋይሳናዉ ህንተ ዋንድ ዳናዉ በሲያኮ ኑፐ ታማርደታ። ሄስ ህንተ ኮይሮፐ ደእዳ ደኡዋ፥ ሽን ሀእ ህንተ ካሰይሳፈ አድ ኦናዳ ጎዳ የሱሳ ሱንን ህንተና ዎሶስነ ዞሮስ። 2 ኑኒ ጎዳ የሱሳ ማታን ህንተና ኪትዳ ኪታይ አዉሰኮ ኤሬታ።

3 ፆሳይ፥ ህንተ ጌሽ ግዳና መላነ ላይማቶና መላ ኮዬስ። 4 ህንተ እሶይ እሶይ፥ ህንተ ማቸታራ ጌሻተንነ ቦንቾን ዳናዉ በሴስ። 5 ፆሳ ኤሮናነ አማኖና አሳዳ ላይማተ አሞን ፁገቶፍተ። 6 ኑ ካሰ ህንተዉ ኦድዳይሳዳነ ምን ዞርዳይሳዳ ጎዳይ ሄሳ መላባ ኦያ ኡባ ፕርድያ ግሾ፥ ኦንካ ሀይሳታን ባ አማንያ እሻ ናቃናዉነ ጭማናዉ በሰና። 7 ፆሳይ ኑና ጌሻተን ዳና መላ ፄግስፐ አትሽን፥ ቱናተን ዳና መላ ፄግቤና። 8 ሄሳ ግሾ፥ ሀ ትምርትያ እፅያ ኦንካ ህንተዉ ጌሻ አያና እምያ ፆሳ እፄስፐ አትሽን፥ አሰ ግደና።

9 ህንተ እሶይ እሱዋ ዋት ሲቃነኮ ፆሳይ ህንተና ታማርስዳ ግሾ፥ ሀእ ሲቆባ ኑ ህንተዉ ፃፋናዉ ኮሸና። 10 ቃስ ማቀዶነ ቢታን ደእያ አማንያ እሻታ ኡባ ቱማ ህንተ ዶሴታ። ሽን ኑ እሻቶ፥ ሀእካ ህንተ ኤንታ አድ ዶሳና መላ ህንተና ዎሶስ።

11 ኑኒ ካሰ ህንተዉ ኦድዳይሳዳ ዎፑ ግዳ ደኡዋ ደእተ። ህንተ፥ ህንተ ኦሶ ኦድ ህንተዉ ዱሳስ ኮሽያባ ደምተ። 12 ሄሳዳ ሀንኮ፥ አማኖናይሳታ ማታን ህንተ ቦንቸታና፤ ቃስ ህንተና ኮሽያባስ ኦናካ አዳሸከታ።

13 ኑ እሻቶ፥ አማንድ ሀይቅዳ አሳት ሀናናባ ህንተ ኤራና መላ ኑ ኮዮስ። ህንተ ኤንታ ግሾ ኡፋይስ ባይና አሳዳ ካዮቶፍተ። 14 ኑኒ፥ የሱሲ ሀይቅዳይሳነ ቃስ ሀይቆፐ ደንድዳይሳ አማኖስ። ሄሳዳካ፥ ፆሳይ የሱሳ አማንድ ሀይቅዳይሳታ እያራ ዎላ ኤሀናይሳ አማኖስ።

15 ጎዳይ ኑስ ኦድዳይሳዳ ጎዳይ ያ ጋላስ እያራ ጋሄታናዉ ኑኒ ፓፃ ደኤይሳት፥ ሀይቅዳይሳታፐ ስንቶኮ። 16 ጎዳይ ዎልቃማ ኪታራ፥ ኪታንቾታ ሀላቃ ግርሳራ፥ ፆሳ ሞይዘ ፑኖራ፥ ሳሎፐ ዎና። ክርስቶሳ አማንድ ሀይቅዳይሳት ኮይሮትድ ሀይቆፐ ደንዳና። 17 ሄሳፈ ጉየ፥ ሄ ዎደ ኑኒ ፓፃ ደኤይሳት፥ ጎዳራ ሻራን ጋሄታናዉ ኤንታራ እስፈ ሳሎ ኤከታና። ሄሳፈ ጉየ፥ ኑኒ ጎዳራ እስፈ መርናዉ ዳና። 18 ሄሳ ግሾ፥ ሀ ቃላን እሶይ እሱዋ ምንተ።