Colossenses 4

1 ጎዳቶ፥ ህንተዉካ ቃስ ሳሎን ጎዳይ ደኤይሳ ኤርድ፥ ህንተ አይለታስ ፅሎተንነ እሱዋ እሱዋፈ ሻኮና ኮሽያባ ኦተ።✝4:1 ኤፈ 6:9.

2 ፆሳ ባርክድ ጋላትሸ ቃንፆና ዎስተ። 3 ፆሳይ ባ ቃላስ ፐንገ ዶያና መላነ ታኒ ሄሳ ጋሶን ቃሾን ደእያ ክርስቶሳ ፁራ አዋጃና መላ ኑስካ ዎስተ። 4 ቃስ ታካ በሰይሳዳ ቃላ ቆንጭሳዳ ኦዳና መላ ታዉ ፆሳ ዎስተ።

5 እንጀትያ ዎደ ኡባ ጎኤትሸ አማኖና አሳ ማታን ጭንጫተን ደእተ።✝4:5 ኤፈ 5:16. 6 ህንተ አሳ ኡባስ ኮሽያ ዛሮ እሞ ኤራና መላ ህንተ ኦዳይ ኡባ ዎደ አ ኬሀተን ኩምዳይሳነ ማፅነዳ ማልእያባ ግዳናዉ በሴስ።

ሳሮ

7 ኑ ሲቆ እሻይ ትክቆስ፥ ታራ እስፈ ጎዳ ኦሱዋን አይለ ግድዳ፥ አማነትያ ኦሳንቾይ፥ ታ ደኡዋባ ህንተዉ ኦዳና።✝4:7 ሀዋ 20:4፤ 2 ፅሞ 4:12.✝4:7 ኤፈ 6:21-22. 8 ታኒ እያ ህንተኮ ኪትዳይ፥ ኑ ዋንድ ደእያኮ ህንተዉ ኦድድ ህንተና ምንና መላሳ። 9 አናስሞስ፥ አማነትያ ሲቆ እሻይ፥ ህንተ ባጋይ፥ እያራ ህንተኮ ቤስ። ኤንቲ ሀይሳን ሀንያባ ኡባ ህንተዉ ኦዳና።✝4:9 ፍልሞ 10-12.

10 ታራ ቃሸትዳ አርስፅሮኮስነ ባርናባሳ እሻ ናአይ ማርቆስ፥ ህንተና ሳሮ ያጎሶና። ታ ህንተዉ ካሰ ኦድዳይሳዳ ማርቆስ ህንተኮ ቢኮ እያ ሞክተ።✝4:10 ሀዋ 19:29፤ 27:2፤ ፍልሞ 24፤ ሀዋ 12:12፥ 25፤ 13:13፤ 15:37-39. 11 የሱሳ ጌተትያ ያስፆስ ህንተና ሳሮ ሳሮ ያጌስ። ፆሳ ካዎተ ግሾ ታራ ኦያ አሳታ ግዶፈ አይሁደ ግድዳይሳት ሀ ሄታ፤ ኤንቲ ታና ዳሮ ምንዶሶና።

12 ህንተ ባጋይ፥ ክርስቶስ የሱሳ አይለይ፥ ኤጳፍር ህንተና ሳሮ ሳሮ ያጌስ። እ ህንተ ፆሳ ስንን ምንድ ኤቃናዳነ ፆሳ ሸንያ ኤርድ ፖላና መላ ኡባ ዎደ ፆሳ ህንተ ግሾ ዎሴስ።✝4:12 ቆላ 1:7፤ ፍልሞ 23. 13 እ ህንተ ግሾነ ሎዶቀንነ ህራፖልሳ ካታማን ደእያ አሳ ግሾ ዳሮ ዳቡርዳይሳ ታ ማርካታይስ።

14 ኑ ሲቆ እሻይ ዶቶረይ ሉቃስነ ዴማስ፥ ህንተና ሳሮ ሳሮ ያጎሶና።✝4:14 2 ፅሞ 4:10-11፤ ፍልሞ 24. 15 ሎዶቀን ደእያ ኑ እሻታስ፥ ንምፋስነ እ ኬን ሺቅያ አሳስ ኑ ሳሮዋ ኦድተ።

16 ሀ ዳብዳብያ ህንተ ናባብዳፐ ጉየ፥ ሎዶቀ ዎሳ ኬን ናባብስተ። ህንተካ ሎዶቀ ዎሳ ኬይ ህንተዉ የድያ ዳብዳብያ ናባብተ። 17 ቃስ አርክጳሳ፥ "ጎዳይ ነዉ እምዳ ኦሱዋ ፖላናይሳ ዶጎፓ" ያግድ ቆፍስተ።✝4:17 ፍልሞ 2.

18 ታኒ፥ ጳዉሎስ፥ ሀ ሳሮዋ ታ ኩሸን ፃፋስ። ታ ቃሹዋ ቆፕተ።

ፆሳ አ ኬሀተይ ህንተራ ግዶ።