1 ኡባባስ ዎደይ ደኤስ፤ ሳሎፐ ጋርሳን ኦሰትያባ ኡባስ

ዎደይነ ቃም ደኤስ።

2 የለታናዉ ዎደይ ደኤስ፤

ሀይቃናዉ ዎደይ ደኤስ።

ቶካናዉ ዎደይ ደኤስ፤

ሾዳናዉ ዎደይ ደኤስ።

3 ዎናዉ ዎደይ ደኤስ፤

ፓናዉ ዎደይ ደኤስ።

ላላናዉ ዎደይ ደኤስ፤

ኬፃናዉ ዎደይ ደኤስ።

4 ዬካናዉ ዎደይ ደኤስ፤

ሚጫናዉ ዎደይ ደኤስ።

ካዮታናዉ ዎደይ ደኤስ፤

የፃናዉ ዎደይ ደኤስ።

5 ሹቹ ላላናዉ ዎደይ ደኤስ፤

ሹቹ ሺሻናዉ ዎደይ ደኤስ።

ቆመታናዉ ዎደይ ደኤስ፤

ዱፃናዉ ዎደይ ደኤስ።

6 ኮያናዉ ዎደይ ደኤስ፤

ኮሽ አጋናዉ ዎደይ ደኤስ።

ሺሽ ኦይካናዉ ዎደይ ደኤስ፤

ላላናዉ ዎደይ ደኤስ።

7 ፔናዉ ዎደይ ደኤስ፤

ስካናዉ ዎደይ ደኤስ።

ስእ ጋናዉ ዎደይ ደኤስ፤

ኦደታናዉ ዎደይ ደኤስ።

8 ዶሳናዉ ዎደይ ደኤስ፤

እፃናዉ ዎደይ ደኤስ።

ኦላስ ዎደይ ደኤስ፤

ሳሮ ዳናዉ ዎደይ ደኤስ።

9 ያትን፥ ኦሳንቾይ ባ ዳቡርዳ ዳቡራፐ አይ ዎ ደሚ? 10 ታኒ ቃስ፥ አሳ ናእ ዳቡርድ ኦና መላ፥ ፆሳይ እምዳ ቶሆይ ዳሮ ዴፆ ግደይሳ በአስ። 11 ፆሳይ ኡባባ እያ ዎድያን ዎድያን ሎይድ ኦስ። ፆሳይ አሳ ዎዛናን መርናተ ዎስ፤ ግድኮካ፥ ፆሳይ ኦዳባ ኡባ ኮይሮፐ ዉርሰ ጋካናዉ፥ አስ ኩመ ኤራናዉ ዳንዳኤና። 12 አስ ባ ደእዳ ላይን ሎእያባ ኦይሳፈነ፥ ኡፋይተይሳፈ አያባይ አይብካ ባይናይሳ ታኒ አኬካስ። 13 ቃስ፥ አሳስ ኦ ዳቡርድ ደምያ ዳቡራስ ጋተይ፥ ምድነ ኡይድ ኡፋይተይስ ፆሳፈ እያዉ እመትዳ እሞታ።

14 ፆሳይ ኦዳባ ኡባይ መርናዉ ደኤይሳ ታኒ ኤራስ፤ እ ኦዳባ ቦላ ጉጃናዉ ዎይኮ እያፐ ደንናዉ ኦደስካ ዳንዳኤተና። ፆሲ ሄሳ ኦይ፥ አስ እያ ያይድ ቦንቻና መላሳ። 15 ሀእ ሀንሸ ደእያባይ ዎይኮ ስንፈ ሀናናዉ ደእያባ ኡባይ ካሰ ሀንዳባ፤ ፆሳይ ካሰ ሀንዳባይ ዛር ሀናናዳ ኮዬስ።

16 ቃስ ታኒ፥ ሳሎፐ ጋርሳን ፅሎ ፕርዳ በሳን ኢታተ፥ ፅሎተ በሳን ገነይ ደኤይሳ በአስ። 17 ታ ዎዛናን፥ "ፆሳይ ፅሉዋነ ዎርዱዋ ናምኣካ ፕርዳስ ሺሻና፤ ፆሳይ ሀንዳባ ኡባስነ ኦሶ ኡባስ ዎደ ቃንፅ ዎስ" ያጋዳ ቆፓስ።

18 ታኒ ታኮ፥ "አስ ዶአፐ ዱማቶናይሳ ኤንቲ አኬካና መላ ፆሳይ ኤንታ ፓጬስ" ያጋስ። 19 አሰ ግድን፥ ዶአ ግድን፥ ኤንታ ቃዳይ እስኖ፤ እሶይ ሀይቀይሳዳ፥ ሀንኮይካ ሀይቄስ። ናምአይ እስ ጫርኮ ሸምፖሶና፤ ሄሳ ግሾ፥ አስ ዶአፐ ዱማተና፤ ሄስካ ሀዳ። 20 ኤንቲ ናምአይ እስ በሲ ቦሶና፤ ናምአይ ቢታፈ መትዳ ግሾ፥ ቢታ ስሞሶና። 21 ያትን፥ አሳ ሸምፖይ ሳሎ ፑደ ከየይሳነ ዶአ ሸምፖይ ቢታ ዱገ ዎይሳ ሻክድ ኤረይ ኦኔ? 22 አስ ባ ኦዳ ኦሶን ኡፋይተይሳፈ ሎእያ ሀራባይ እያዉ ባይናይሳ በአስ። እያዉ ደእያ ሎኦ ቃዳይ ሄሳ ፃላላ። አስ ሀይቅ ስምን እያፐ ጉየ ሀንያባ በሳናዉ፥ እያ ጉየ ኤሀናዉ ዳንዳኤይ ኦኔ?