1 ሳሎፐ ጋርሳን አሳ ቦላ ጋክያ ዳሮ ኢታባ ታኒ በአስ። 2 ፆሲ አሳስ ሻሎ፥ ዱረተነ ቦንቾ እሜስ፤ እያዉ ኮሽያባፐ እስባካ ፓጭሰና። ሽን እያዉ እመትዳ ሻሉዋንነ ዱረተን ኡፋይታና መላ ኩመ ማታ እመና። ሄሳ ፃላላ ግዶናሽን እ ዳቡርድ ደምዳባን ሀር ኡፋይታና መላ ኦስ፤ ሄስካ ሀዳነ አዛንያ ኢታባ።
3 እስ አስ ፄቱ ናአ የልድ፥ አዱሳ ላይ ደእድ ጭማናዉ ዳንዳኤስ። ሽን እ ባዉ እመትዳባን ኡፋይቶናነ ዉርሰን ቦንቾን ሞገቶና አትኮ እያፐ ቦሽ ሎኦ ጋይስ። 4 ሄ ቦሻይ ጮ የለትድ ኦንካ ሀሳዮና ማ ብያ ግሾ እያ ሱንይ ማን ካመትድ አቴስ። 5 እ፥ አዋ ፖኦ በኦና ዎይኮ አይብባካ ኤሮና አትኮካ ሄ ኡራፐ አድ እያዉ ሸምፖይ ደኤስ። 6 ሄሳ ግሾ፥ ኡፋይስ ባይና ናምኡ ሙኩሉ ላይ ደእያ አሳፐ ሄ ቦሻ ቃዳይ ሎኦ። ዉርሰን ናምአይ እስ በሲ ቦሶና።
7 አስ ዳቡርድ ኦያ ኡባይ ባዉ ምያባ ደማናሳ፤ ሽን እያ አሞይ አል ኤረና። 8 ያትን፥ ጭንጫ አስ ኤያ አሳፐ አይብን ዱማቲ? ማንቆይ ዳሮ ጭንጭድ፥ ሀራታ ስንን ዋንድ ዳነኮ ኤሮይ እያ አይ ማዲ? 9 አሞን ፁገታናፐ አይፈን በኦይ ሎኦ፤6:9 አይፈን በኦይ ሎኦ፦ አስ አሞን ፁገትሸ ዳናፐ ባዉ ደእያባን አልድ ደኦ ጉሱ። ሄስካ ጫርኮ ኦይካናዉ ካሎ መላ ሀዳ።
10 ሀንያባ ኡባይ ኮይሮትድ ኤረትድ ደኤስ። እስ እስ አስ ዋናናዉ ደእያኮ አዱሳ ዎደፐ ካሰ ኤረትድ ኡትስ። አይ አስካ ባፐ ምነይሳራ ባፀታናዉ ዳንዳኤና። 11 ኦድ ዳርያ ዎደ ሀዳባይ ዳሬስ፤ ያትን ሄስ አሰ አይ ማዲ?
12 ሀዳ ግድድ ኩያዳ ጮ አያ ባ ጉ ላይ አስ ዋትድ አናዉ ኮሽያኮ ኤረይ ኦኔ? አስ ሀይቅድ አግን ሳሎፐ ጋርሳን ሀናናዉ ደእያባ አሳስ ኦዳናዉ ዳንዳኤይ ኦኔ?