እሶይ እሱዋ ማድተ
1 ታ እሻቶ፥ እስ አስ ናጋራን ኩንድኮ፥ አያናን ደእያ ህንተ ሄ ኡራ አሽከተን ሱርስተ። ሽን ኔኒ ሄሳ መላባን ፓጨቶና መላ ነና ናጋ። 2 እሶይ እሱዋ ዴፆ ቶሁዋ ቶክተ። ያትኮ ክርስቶሳ ህግያ ፖሌታ። 3 እስ አስ አይኮይካ ባዋሽን፥ ባና ሀራታፐ ሎኦ ግድ ቆፕኮ፥ እ ባና ጭሜስ። 4 ሽን እስ እስ አስ ባ ኦሱዋ ፓጮ። ሄሳፈ ጉየ፥ ሀራታራ ባና ጋደየይሳ አግድ ባዉ ጬቀትያባ ደሜስ። 5 እስ እስ አስ ባ ቶሁዋ ባዉ ቶካናዉ በሴስ።
6 ፆሳ ቃላ ታማርያ ኦንካ ሎኦባ ኡባ ባ አስታማርያራ ሻከቴስ።
7 ህንተ፥ ህንተና ጭሞፍተ። አስ ባ ዘርዳባ ዛሪድ ጫክያ ግሾ ፆሳ ቦላ ቀልቅሶፕተ። 8 ባ አሾ አሙዋ ኩንናዉ ዘርያ ኦንካ፥ ባ አሾ አሙዋፐ ሀይቆ ቡጫና። ሽን አያና ኡፋይሳናዉ ዘርያ ኦንካ አያናፐ መርና ደኦ ጫካና። 9 አነ ሎኦ ኦሶ ኦናዉ አዛለይሳ አጎስ። ኑኒ አዛሎና እፅኮ ዎደይ ጋክያ ዎደ ኑ ዘርዳይሳ ጫካና። 10 ኑ እንጀ ዎደ ደምኮ፥ አሳ ኡባስ፥ አድካ አማንያ አሳስ ሎኦባ ኦስ።
ዞረነ ሳሮ
11 ታኒ ታ ኩሸን፥ አይ መላ ግታ ፕዳለን ህንተዉ ፃፍዳኮ በእተ። 12 አሳ ስንን ሎኦ ግድድ በንታናዉ ኮይያ አሳት ህንተ ቃፃረታና መላ ኮዮሶና። ሽን ሄሳ ኤንቲ ኦይ፥ ክርስቶሳ ማስቃልያ ግሾ ኤንታና ጎድ ጋኮና መላሳ። 13 ኤንቲ ህንተ ቃፃረተን ጬቀታናዉ ኮይድ ህንተና ቃፃረቶ ጎሶናፐ አትሽን፥ ቃፃረትዳይሳትካ ባንታ ሁጰን ህግያ ናጎኮና።
14 ሽን አላመይ ታዉ ካቀትዳይሳፈነ ታንካ አላምያስ ካቀትዳ፥ ጎዳ የሱስ ክርስቶሳ ማስቃልያፐ አትሽን፥ ሀራ ጬቆይ ታፐ ሃኮ። 15 ህዛ፥ ቃፃረትን ቃፃረቶና አግን አይኮካ ማደና። ማደይ ኦራ መተ ግዶ። 16 ሀ ዎጋ ካልያ ኡባስነ ፆሳ ደረ ግድዳ እስራኤለስ ሳሮተነ ማሮተ ግዶ።
17 ታኒ የሱሳስ ማዱንፅዳ ቤታ ታ አሳተን ቶክዳ ግሾ፥ ህዛፐ ታና ኦንካ ዋይሶፖ።
18 ታ እሻቶ፥ ኑ ጎዳ የሱስ ክርስቶሳ አ ኬሀተይ ህንተራ ግዶ። አምንእ።