ኤፈሶና ኪታ 1

1 ፆሳ ሸነን ክርስቶስ የሱሳ ሀዋረ ግድዳ ጳዉሎሳፐ፥ ኤፈሶናን ደእያ ጌሻታስነ ክርስቶስ የሱሳ አማነይሳታስ ፃፈትዳ ኪታ።✝1:1 ሀዋ 18:19-21፤ 19:1.

2 ፆሳ ኑ አዋፐነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

ክርስቶሳን ደእያ አያና አንጁዋ

3 ሳሎን ደእያ አያና አንጆ ኡባን ክርስቶሳ ባጋራ ኑና አንጅዳ፥ ኑ ጎዳ የሱስ ክርስቶሳ አዋይ፥ ፆሳይ ጋላተቶ። 4 ኑኒ እያ ስንን ጌሻታነ ቦረይ ባይናይሳታ ግዳና መላ ፆሳይ አላመይ መታናፐ ካሰ ክርስቶሳ ባጋራ ባ ሲቁዋን ኑና ዶርስ። 5 ፆሳይ ባ ሸንያን ባ ዶስዳይሳዳ የሱስ ክርስቶሳ ባጋራ ኑና ባ ናይታ ኦናዉ ካሰትድ ቆፕ ዎስ። 6 ፆሳይ ባ ሲቅያ ናኣ ባጋራ ኑስ ጮ እምዳ አ ኬሀተይ ቦንቸታና መላ ሄሳ ኦስ።

7 ፆሳ አ ኬሀተ ዱረተዳ ክርስቶሳ ሱን ዎዘትድ ናጋራ አቶተ ደምዳ። 8 ባ አ ኬሀተ ጭንጫተንነ ኤራተን ኩንድ ኑስ እሚስ።✝1:8 ቆላ 1:14. 9 ፆሳይ ባ ዶስዳይሳዳ ክርስቶሳ ባጋራ እያ ሸንያ ፁራ ኑ ኤራና መላ ኦስ። 10 ዎደይ ጋክያ ዎደ ፆሳይ ፖላናዉ ቆፕዳ ቆፋይ፥ ሳሎንነ ሳአን ደእያ መተ ኡባይ ክርስቶሳፐ ጋርሳን ግዳና መላሳ።

11 ኡባባ ባ ሸንያዳ ኦያ ፆሳይ፥ ካሰትድ ሀልችዳይሳ ክርስቶሳ ባጋራ ኑኒ እያባ ግዳና መላ ኑና ዶርስ። 12 ሄሳ እ ኦዳይ፥ ክርስቶሳን ኡፋይስ ዎድ ናጎን ኮይሮ ግድዳ ኑኒ ፆሳ ቦንቹዋ ጋላታን ቆንጭሳና መላሳ። 13 ህንተካ ህንተ አቶተ ዎንገላ፥ ሄስካ ቱማ ቃላ ስእዳ ዎደ ክርስቶሳ አማንደታ። ፆሳይ ህንተዉ እማና ግዳ ጌሻ አያናን ህንተ አታመትደታ። 14 ፆሳ ቦንቾይ ጋላተታና መላ ፆሳይ ባ አሳ ዎዛና ጋካናዉ ጌሻ አያና ኑስ ኦይ ኦድ እሚስ።

ጳዉሎሳ ዎሳ

15 ሄሳ ግሾ፥ ጎዳ የሱሳ ህንተ አማነይሳነ ጌሻታ ኡባ ህንተ ሲቀይሳ ታ ስእዳ ዎደ 16 ታ ዎሳን ህንተና ቆፓሸ ህንተ ግሾ ፆሳ ጋላተይሳ አጋብከ። 17 ጎዳ የሱስ ክርስቶሳ ፆሳይ፥ ቦንቾ አዋይ፥ ፆሳ ህንተ አድ ኤራናዳ ጭንጫተነ ቆንጨ አያና ህንተዉ እማናዳ ታኒ ፆሳ ዎሳይስ። 18 ፆሳይ ህንተና ፄግዳ ኡፋይሳይነ ጌሻት ላትያ ቦንቾ ላታይ አይ መላ ዳሮኮ ህንተ ኤራና መላ ፆሳይ ህንተ ዎዛና አይፍያ ዶያና መላ ታኒ ፆሳ ዎሳይስ።

19 ቃስ እያ አማንያ ኑናን ኦያ እያ ዎልቃይ አይ መላ አዳ ግቴኮ ህንተ ኤራና መላ ዎሳይስ። ሄ ዎልቃይ ፆነቶናነ ዳቡሮና ዎልቃ። ሀ ኑናን ደእድ ኦያ ዎልቃይነ፥ 20 ክርስቶሳ ሀይቆፐ ደንድ፥ ሳሎን ፆሳፈ ኡሻቻ ባጋራ ኡትስዳ ግታ ዎልቃይ እስኖ።✝1:20 ማዝ 110:1. 21 እያ ሱንይ፥ አይሰይሳታፐነ ማታ አዋታፐ፥ ሃረይሳታፐነ ጎዳታፐ፥ ቦላ ግድድ ሀ አላምያ ፃላላን ግዶናሽን፥ ስንፈ ያና አላምያንካ ሀራ ሱንታ ኡባፈ ቃ። 22 ፆሳይ ኡባ ክርስቶሳ ቶሆፐ ጋርሳን ሃርስስ፤ ቃስ ዎሳ ኬን፥ ኡባባን ጎዳ ግዳና መላ እያ ሹምስ።✝1:22 ማዝ 8:6፤ ቆላ 1:22-23፤ 1:18. 23 ዎሳ ኬ ክርስቶሳ ኩመ ኦያ እያ አሳተ። መተይ ደእያ በሳ ኡባን ክርስቶስ ባ ሁጰን ኡባባ ኩንይሳ።