1 ህዛ፥ ጎዳ ግሾ ቃሸትዳ ታኒ፥ ህንተ ፄገትዳ ፄሳስ በሲያ ደኦ ዳና መላ ህንተና ዎሳይስ። 2 ህንተ ኡባ ዎደ አዳታነ ሀዮ ግድተ፤ እሶይ እሱዋ ዳንዳእተነ ሲቆን ደእተ።✝ 3 ሳሮተን ቃሸትድ አያናይ እምያ እስፈተ ናጋናዉ ምንተ። 4 ፆሳይ ህንተና ፄግዳ ዎደ እስ ኡፋይሳስ ፄግዳይሳዳ እስ አሳተነ እስ አያን ደኤስ። 5 እስ ጎዳይ፥ እስ አማኖይነ እስ ፅንቃተይ ደኤስ። 6 ኡባፈ ቦላ ግድዳ፥ ኡባ ባጋራ ኦያነ ኡባ ግዶን ደእያ እስ ፆሳይ፥ ኡባ አዋይ ደኤስ።

7 ሽን ክርስቶስ እማናዉ ኮይዳይሳዳ ኑ እሶይ እሶይ ዱማ ዱማ እሞታ ኤክዳ። 8 ሄሳ ግሾ፥ ፆሳ ቃላይ፥

"እ ፑደ ከይዳ ዎደ

ድኤትዳ ዳሮታ ባራ ኤክድ ብስ፤

አሳስካ እሞታ እሚስ"

ያጌስ።✝ 9 ያትን፥ "ፑደ ከይስ" ጉሳይ ዎይ ጉሴ? እ ኮይሮ ዱገ፥ ሳኣ ዝቃ በሳ ዎስ ጉሱ ግዶና እፅኮ አይ ጉሴ? 10 ሀ ዱገ ዎዳይስ፥ ኡባ በሳን በንታናዉ ኡባፈ ቃ ሳሉዋ ከይዳይስ እያ።

11 እ እሶታ እሶታ ሀዋረታ፥ እሶታ እሶታ ናበታ፥ እሶታ እሶታ ዎንገላ ሳባከታ፥ እሶታ እሶታ ዎሳ ኬ ሄመይሳታ፥ እሶታ እሶታ አስታማረታ ኦድ እሚስ። 12 እ ሄሳ ኦዳይ ክርስቶሳ አሳተ ግድዳ ዎሳ ኬ ድቻናዉነ አማንያ አሳ ፆሳ ኦሶስ ጊግሳናሳ። 13 ሄሳዳካ፥ ኑ ኡባይ ፆሳ ናኣ ኤርድ አማኖን በንትያ እስፈተኮ ጋክድ፥ ክርስቶሳ አያና ደኡዋ ኩመ ጋክድ ድጫና መላሳ።

14 ህዛፐ ጉየ፥ አሳ ገነ ጭሞን ጊግዳ ባለያ ዎርዶ ትምርተ ጫርኮንነ ሆበን ገደነ ሃ ኩሎ ካእያ ናይታ መላ ግዳናዉ በሰና። 15 ሽን ኑኒ ቱማ ሲቆን ኦድሸ፥ አሳተስ ሁጰ ግድያ ክርስቶሳራ ደእያ እስፈተ ጉጅ ጉጅ ድቾስ። 16 ኩመ አሳተይ ክርስቶሳ ቦላ ዘምፔስ ቃስ ዱማ ዱማ አሳተ ብልተት እሶይ እሱዋራ ኦይከትድ ኡትስ። እስ እስ አሳተ ክፍለይ ባ ኦሱዋ ኦያ ዎደ ኩመ አሳተይ ሲቆን ድጬስ።✝

17 ሄሳ ግሾ፥ ታኒ ሀይሳ ህንተዉ ጎዳ ሱንን ኦዳይስነ ማርካታይስ። ጎእ ባይና ቆፋ ቆፕያ አይሁደ ግዶና አሳታዳ ደኦፕተ። 18 ኤንታ ቆፋይ ምስ፤ ባንታ ዎዛና ሙምስዶሶና። ኤንቲ ኤራተ ዮንነ እፃስ ግድ ፆሳይ እምያ ደኡዋፐ ሃክዶሶና። 19 ኤንቲ ዬላ ግያባ ኤሮኮና፤ ኤንቲ ላይማተስ ባንታና አድ እምዶሶና፤ ቃስ ቱናባ ኡባ ጉየ ጎና ኦሶና።

20 ሽን ህንተ ክርስቶሳ ኤርዳይ ሄሳ መላ ኦገን ግደና። 21 እያባ ቱማ ስእደታ። ቃስ የሱሳን ደእያ ቱማ መላ እያፐ ታማርደታ። 22 ህንተ ካሰ ደእዳ ደኦ ኦግያ አግተ። ቃስ ባ ጭምያ አሞን ይያ ህንተ ጬጋ አሳተ ድግተ።✝ 23 ህንተ ዎዛና ቆፋን ኦራፅተ። 24 ቱማ ፅሎተንነ ጌሻተን ፆሳ ሌምሶን መትዳ ኦራ አሳተ ማእተ።✝

25 ህዛ፥ ዎርዶ ኦደቶፍተ። ኑኒ ኡባይ ክርስቶሳ አሳተ ብልተታ ግድያ ግሾ አሳ ኡባራ ቱማ ኦደትተ።✝ 26 ሀንቀትተ፥ ሽን ህንተ ሀንቁዋን ናጋራ ኦፍተ። ህንተ ሀንቀት ደእሽን አው ዉሎፎ።✝ 27 ፃላሄስ በሰ እሞፍተ። 28 ካይሶትያ ኡራይ ህዛፐ ጉየ ካይሶቶፖ። ሽን ማንቆታ ማድያባይ እያዉ ዳና መላ ባ ኩሸን ሎኦባ ኦ።

29 ህንተ ዶናፐ ኢታ ቃል ከዮፖ። ሽን ስኤይሳታ ጎአና መላነ ሀራታ ምንያ ኮሽያ ሎኦ ቃል ህንተ ዶናፐ ከዮ። 30 ፆሳይ ህንተና ዎዝያ ጋላሳስ ህንተና አታምድ ዎዳ ፆሳ አያና አዛንፍተ። 31 ጫመተ፥ ይሎ፥ ሀንቆ፥ ዋሶ፥ ጫሸነ ኢታ ኡባ ህንተፈ ሃስተ። 32 አድ እሶይ እሱዋስ ኬሀነ ቃተይሳታ ግድተ። ፆሳይ ክርስቶሳ ባጋራ ህንተዉ አቶ ግዳይሳዳ ህንተካ ዎልስ አቶ ጊተ።✝