ክርስቶሳን ሀይቆፐ ደኦ ፕነ
1 ሀይሳፈ ካሰ ህንተ፥ ህንተ ናጋራነ ህንተ ቆሁዋ ጋሶን ሀይቅዳይሳታ።2:1 ቆላ 2:13. 2 ሄ ዎደ ህንተ ሀ አላምያ ኢታ ኦግያ ካልደታ። ጫርኩዋ ቦላ ደእያ አያና ዎልቃታ ሀላቃስነ ሀእካ ፆሳስ ኪተቶና አሳ ሃርያ አያናስ ኪተትደታ። 3 ኑ ኡባይካ ካሰ ሄ አሳታ ግዶን ኑ አሾ አሙዋነ ኑ ዎዛና ሸንያ ካልድ ደእዳ። ኑካ ሀራታ መላ ኑ መተን ፆሳ ሀንቁዋ ኤካናዉ ደኤይሳታ።
4 ሽን ፆሳ ግታ ማሮተፈነ ኑስ ደእያ ግታ ሲቁዋፐ ደንድዳይሳን፥ 5 ሀር አቶሽን ኑኒ ኑ ቆሁዋን ሀይቅድ ደእሽን ክርስቶሳ ባጋራ ኑስ ደኦ እሚስ። ህንተካ አትዳይ ፆሳ አ ኬሀተና። 6 ፆሳይ ኑና ክርስቶሳራ እስፈ ሀይቆፐ ደንድ ሳሎን እያራ እስፈ ዎስ። 7 እ ሄሳ ኦዳይ፥ ክርስቶስ የሱሳ ባጋራ ኑስ ቆንጭስዳ ባ ኬሀተነ ዛው ባይና ባ አ ኬሀተ ዱረተ ያና ላይን ኑና በሳናሳ። 8 ህንተ አ ኬሀተን አማኖን አትደታ። ሄስካ፥ ፆሳ እሞታፐ አትሽን፥ ህንተ ኦሶን በንትዳባ ግደና። 9 ኦንካ ጬቀቶና መላ አቶተይ በንትዳይ ኦሶን ግደና። 10 ኑኒ ፆሳ መተ፤ እ ኑስ ካሰትድ ጊግስ ዎዳ ሎኦ ኦሶታ ኦና መላ ክርስቶስ የሱሳ ባጋራ ኦራ መትዳ።
ክርስቶሳራ ደእያ እስፈተ
11 ሄሳ ግሾ፥ ህንተኖ የለታን አይሁደ ግዶናይሳቶ፥ አይሁደት ባንታዉ አሳ ኩሸን ቃፃረትድ፥ ህንተና ቃስ ቃፃረትቦናይሳታ ግድ ፄገይሳ አኬክተ። 12 ሄ ዎደ ህንተ ክርስቶሳፐ ሻከት ደእዳይሳ፥ እስራኤለ አሳስ አላጋ ግድድ ደእዳይሳ፥ ፆሳ ኡፋይሳ ቃላፐ ሃክድ ደእዳይሳነ ሀ አላምያን ኡፋይስነ ፆሲ ባይና ደእዳይሳ አኬክተ። 13 ሽን ህንተ ካሰ ሃክድ ደእዳይሳት፥ ሀእ ክርስቶስ የሱሳን ደእድ ክርስቶሳ ሱን ማታ ሺቅደታ።
14 ክርስቶስ ኑ ሳሮተ፤ እ አይሁደነ አይሁደ ግዶና አሳ ትምድ፥ ናምኣ ሻክ ዎዳ ሞርከተ ጎዳ ላልስ። 15 እ ባናን ሀ ናምኡ ኮቻታፐ እስ ኦራ አሰ መድ፥ ህግያ እያ ኪታራነ ዎጋታራ እስፈ ባ አሳተን ይስድ ሳሮተ እሚስ።2:15 ቆላ 2:14. 16 ክርስቶስ ማስቃልያ ቦላ ሀይቅድ ሞርከተ ይስስ፤ ቃስ ናምኡ ኮቻታ እስ አሳተ ኦድ ፆሳራ ስገስ።2:16 ቆላ 1:20. 17 ክርስቶስ ይድ፥ ፆሳፈ ሃክድ ደእያ ህንተዉ፥ ቃስ ማትድ ደእያ ኤንታዉ ሳሮተ ዎንገላ ኦድስ።2:17 እሳ 57:19. 18 ኑ ኡባይ እያ ባጋራ እስ አያናን አዋ ስን ሺቃናዉ ዳንዳኦስ።
19 ህዛፐ ህንተ አላጋ ዎይኮ እማ ግደከታ፥ ሽን ህንተ ሀእ ጌሻታ ቢታ አስነ ፆሳ ሶ አስ። 20 ህንተ ሀዋረትነ ናበት ባስዳ ባሱዋ ቦላ ኬፀትደታ። ጎዳ ፃጱዋ ምንያ ሹቻይ ክርስቶስ የሱሳ። 21 እያን ኬ ኡባይ እስፈ ኦይከትድ ጎዳን ጌሻ ፆሳ ኬ ግዳናዉ ድጬስ። 22 ህንተ ቃስ ፆሳይ ባ አያናን ደእያ ኬ ግዳናዉ ክርስቶሳን እስፈ ኬፀተታ።