1 ታኒ ዎችያ ግምብያ ቦላ ኤቃዳ ናጋና። ሄ በሳን ኤቃዳ ጎዳይ ታዉ ኦድያባነ ታ ሞቱዋስ እምያ ዛሩዋ ስአናዉ ናጋሻና።

2 ጎዳይ ዛሪድ፥ "ዎፅያ አደይ ናባባና መላ ሎቸ ሹቻ ቦላ ታኒ ነዉ ቆንጭስያ ቃላ ኦርድሳዳ ፃፋ። 3 ቆንጨይ ባ ዎድያ ናጌስ፤ ቆንጨይ ፖለትያ ዎደይ ኤለ ጋካና፤ ዎርዶ ግደና። ጋምእኮካ ናጋ፤ እ ቱማ ሀናና፤ ጋምኤና።" 4 ሄኮ፥ እያ ዎዛናይ ኦቶርትስ፤ እያ ቆፋይ ሱረ ግደና፤ ሽን ፅሎይ ባ አማኑዋን ደኦን ዳና። 5 ዱረተ አሰ ጭሜስ፤ ጬቀትያ ኡራስ ሸምፖይ ባዋ። እ ዱፎዳ ያራምባ ግድያ ግሾነ ሀይቆዳ ካል ኤሮና ግሾ፥ ካዎተታ ኡባ ባዉ ሺሼስ፤ አሳ ኡባ ባዉ ድኤስ።

6 ድኤትዳ አሳይ ስሚድ ኤንታ ቦርሸነ ቀልቅስሸ ሀይሳዳ ያጋና፦ "ባባ ግዶና ሚሸ ሺሽድ ዶረይሳነ ቦንቅድ ዱረትዳይሳታ አየ! ሀይስ ሀይሳዳ ሀንድ፥ አዉደ ጋካናዉ ዳኔ?" ያጋና። 7 ኔኒ ኤንታፈ ቦንቅዳ አሳት ነ አኬኮና ነ ቦላ ደንድድ ነና ኮኮርሳና። ሄሳፈ ጉየ፥ ኤንቲ ነ ሻሉዋ ኡባ ቦንቃና። 8 ኔኒ ዳሮ አሳ ሻሉዋ ቦንቅዳ ግሾ፥ ኤንታፈ አትዳይሳት ነ ሻሉዋ ቦንቃና። ነ ዳሮ አሳ ሱ ጉሳዳሳ፤ ሳኣ ቦላ፥ ካታማታ ቦላነ ያን ደእያ አሳ ኡባ ቦላ ኢታ ኦሶ ኦዳሳ። 9 መቶይ ነና ጋኮና መላ ነ ኬ ቃ በሳን ኬፃናዉ ጌላተን ሚሸ ሺሽዳይሶ ነና አየ! 10 ዳሮ አሳ ገናዳ ይስዳ ግሾ፥ ነ ሶ አሳ ካዉሻዳሳ፤ ኔኒ ነ ቦላ ዮ ኤሀዳሳ። 11 ሀር አቶሽን ነ ኬ ግምበ ሹቻይ ነ ቦላ ዋሳና፤ ኬ ቱቀት ዋሱዋ ኮሹማና። 12 ካታማ ኢታተን ባስድ አሳ ሱን ኬፀይሳቶ ህንተና አየ! 13 አሳይ ኦያባ ኡባይ ታማ ካሆ ግዳና መላ፥ ካዎተት ዳቡርዳ ኡባይ ሀዳ ግዳና መላ ኦዳይ ኡባፈ ዎልቃማ ጎዳ ግደኔ? 14 አብ ሃን ኩመይሳዳ ሳእ ጎዳ ቦንቹዋ ኤራተን ኩማና።

15 "ባ ሾሮይ ካሎትን በአና ግድ፥ ማይያ ኡሽ ኡሽያ ኡራ አየ! 16 ኔኒ ቦንቾ አጋዳ ካዉሸ ማአና። ሀእ ማይ ነ ታራ፤ ነ ኡያዳ ካሎታ። ጎዳ ኡሻቻ ኩሽያን ደእያ ፁአይ ነዉ እመታና፤ ነ ቦንቾይ ዬላን ላመታና። 17 ነ ልባኖሰ ይስዳይሳዳ ነካ ያና። ነ ዶአታ ዉርሳዳሳ፥ ሀእ ኤንቲ ነና ያሽሳና። ነ ዳሮ አሳ ሱ ጉሳዳሳ፤ ሳአ ቦላ፥ ካታማታ ቦላነ እያን ደእያ አሳ ቦላ ኢታ ኦሶ ኦዳሳ።

18 "እ ባዉ ኤቅ አይ ማዲ? እያ አሳ ኩሸን ጊግስ ግደኔ? ዎርዶፈ አትሽን፥ እያን ሀራባይ በንተና። ያትን፥ እያ መዳ ኡራይ ሀ አይኮካ ኦደቶና ኤቃን አማነተይስ እያ አይ ማዳኔ? 19 ምፈ ጊግዳይሳ ‘ባርካ’ ገይሶ፥ ቃስ ሸምፖይ ባይና ሹቻ ‘ደንዳ’ ገይሶ ነና አየ! እ ዎና ነዉ አይ ቆንጭሳናዉ ዳንዳኢ? ሄኮ፥ ዎርቃንነ ብራን ሜሸትስ፤ እያዉ ሸምፖይ ባዋ።

20 "ሽን ጎዳይ ባ ጌሻ ኬና። ሄሳ ግሾ፥ ሳአን ደእያ አሳ ኡባይ እያ ስንን ስእ ጎ" ያግስ።