1 ሄሳፈ ጉየ፥ አይሁደት የሱሳ ዎናዉ ኮይያ ግሾ እ ይሁዳ አግድ ጋልላን ስመረቴስ። 2 አይሁደት ቦንችያ ሻቃራ ባለይ ቦንቸታናዉ ማትስ።✝ 3 ሄሳ ግሾ፥ የሱሳ እሻት፥ "ነ ታማረት ኔኒ ኦያ ማላታታ በአና መላ ሀይሳፈ ደንዳዳ ይሁዳ ቢታ ባ። 4 ባዉ ኤረታናዉ ኮያ አስ ኦንካ ባ ኦሱዋ ገንና። ኔኒ ሀይሳታ ኦዳ ነባ አላምያ ኤርሳ" ያግዶሶና። 5 እያ እሻት ሄሳ ግዳይ እያን አማንቦና ግሾሳ።

6 የሱሲ ኤንታኮ፥ "ታዉ እንጀ ዎደይ ጋክቤና፥ ሽን ህንተዉ ኡባ ዎደይ እንጀቴስ። 7 አላመይ ህንተና እፃናዉ ዳንዳኤና፥ ሽን ታኒ አላምያ ኦሶይ ኢታ ግደይሳ ማርካትያ ግሾ ታና እፄስ። 8 ህንተ ባልያ ቢተ፤ ታ ዎደይ ጋክቦና ግሾ ታኒ ባልያ ቢከ" ያግስ። 9 እ ሄሳ ግድ ጋልላን አትስ። 10 እያ እሻት ባኣለ ቦንቻናዉ ብዳፐ ጉየ የሱሲ ኦናካ ኤርሶና ቆሳን ሄ በሳ ብስ። 11 አይሁደት ባኣለ ቦንችያ በሳን፥ "እ አዉን ደኢ?" ያግድ እያ ኮይዶሶና።

12 አሳይ ካልካሽድ እያባ ኦደቶሶና። ባጋይ፥ "እ ሎኦ አስ" ግያ ዎደ ሀራት ቃስ፥ "አካይ፥ እ አሳ ባለስ" ያጎሶና። 13 ሽን አይሁደ ሀላቃታስ ያይዳ ግሾ ኦንካ እያባ ቆንጨን ኦደተና።

14 ባልያ ቦንችድ ግዶ ጋያ ዎደ የሱሲ ፆሳ ኬ ብድ ታማርሶ ኦይክስ። 15 አይሁደት፥ "ሀ አደይ ትምርተ ታማሮና ሀይሳ ኡባ ዋት ኤርዴ?" ያግድ ማላለትዶሶና።

16 የሱሲ ዛሪድ፥ "ታ ታማርስያ ትምርተይ ታና ኪትዳ ፆሳ ማታፐ ያ ትምርተፈ አትሽን፥ ታባ ግደና። 17 ፆሳ ሸንያ ኦናዉ ኮይያ ኦንካ ሀ ትምርተይ ፆሳ ማታፐ ያኮነ ዎይኮ ታኒ ታፐ ኦድያኮ ኤራና። 18 ባባ ኦድያ ኦንካ ባ ሁጰ ቦንቾ ኮዬስ። ሽን ባና ኪትዳይሳ ቦንቹዋ ኮይያ ኦንካ እ ቱማንቾ፤ እያን ዎርዶይ ባዋ። 19 ሙሰይ ህንተዉ ህግያ እሚስ፥ ሽን ህንተፈ ኦንካ ህግያ ናግቤና። ያትን አይስ ታና ዎናዉ ኮዬቲ?" ያግስ።

20 አሳይ ዛሪድ፥ "ነና ፃላሄይ ኦይክስ፤ ነና ዎናዉ ኦኔ ኮየይ?" ያግዶሶና።

21 የሱሲ፥ "ታኒ እስ ማላታ ኦን ህንተ ኡባይ ማላለትደታ። 22 ህንተ፥ ህንተ ናይታ ቃፃራና መላ ሙሰይ ኪትስ። ሽን ቃፃሮ ህንተ ማይዛት ዶምዶሶናፐ አትሽን፥ ሙሰ ግደና። ሄሳ ግሾ፥ ህንተ ሳምባታ ጋላስ አደ ናይታ ቃፃሬታ።✝ 23 ሙሰ ህገይ ኪትዳ ግሾ፥ ህንተ ሳምባታ ጋላስ ቃፃርያባ ግድኮ፥ ታኒ እስ አሳ ኩመ አሳተ ፓዳ ግሾ፥ ታራ አይስ ካጬቲ?✝ 24 ቱማ ፕርዳ ፕርድተፐ አትሽን፥ አሳ ሶምኦ በእድ ፕርዶፍተ" ያግስ።

25 የሩሳላመ አሳፐ እሶት እሶት፥ "ኤንቲ ዎናዉ ኮይያ ኡራይ ሀይሳ ግደኔ? 26 ሄኮ፥ እ ቆንጨን ኦዴስ፤ ኤንቲ እያ አይኮካ ጎኮና። እ ክርስቶሳ ግደይሳ አይሁደ ሀላቃት ቱማ ኤርዶናሻ? 27 ክርስቶስ ያ ዎደ እ አዉፐ ያኮ ኦንካ ኤረና፥ ሽን እ አዉፐ ይዳኮ ኑ ኤሮስ" ያግዶሶና።

28 የሱሲ ፆሳ ኬን ታማርስሸ ባ ቃላ ቁ ኦድ፥ "ቱማ ህንተ ታኒ ኦነኮነ ታ አዉፐ ይዳኮ ኤሬቲ? ታኒ ታ ማታን ያቢከ፥ ሽን ታና ኪትዳይስ ቱማንቾ፤ ህንተ እያ ኤረከታ። 29 ሽን ታኒ እ ኪትን እያ ማታፐ ይዳ ግሾ እያ ኤራይስ" ያግስ።

30 ሄሳ ግሾ፥ ኤንቲ እያ ኦይካናዉ ኮይዶሶና። ሽን እያ ዎደይ ቡሮ ጋክቦና ግሾ ኦንካ እያ ቦላ ኩሸ ዎቤና። 31 ሽን ዳሮ አሳይ የሱሳ አማንድ፥ "ክርስቶስ ያ ዎደ ሀ ኡራይ ኦዳ ማላታታፐ ዳርያ ማላታ ኦነዬ?" ያግዶሶና።

32 ፋርሳወት ዳሮ አሳይ የሱሳባ ካልካሸይሳ ስእዶሶና። ካህነ ሀላቃትነ ፋርሳወት እያ ኦይድ ቃሽሳናዉ ፆሳ ኬ ናገይሳታ ኪትዶሶና።

33 የሱሲ፥ "ታኒ ህንተራ ጉ ዎደ ጋምአና፤ ሄሳፈ ጉየ ታና ኪትዳይሳኮ ባና። 34 ህንተ ታና ኮያና፥ ሽን ደመከታ። ታኒ ደእያሱዋ ህንተ ያናዉ ዳንዳኤከታ" ያግስ።

35 አይሁደት እሶይ እሱዋራ፥ "ሀይስ ኑኒ ደሞናሶ አዉ ባና ሀኒ? ግርከ ካታማን ደእያ አይሁደታኮ ብድ ግርከታ ታማርሳናዉ ሀንዬ? 36 ‘ህንተ ታና ኮያና፥ ሽን ደመከታ’ ቃስ፥ ‘ታኒ ደእያሱዋ ህንተ ያናዉ ዳንዳኤከታ’ ጉሳይ አይ ጉሴ?" ያግዶሶና።

37 ባልያ ቦንችያ ጋላሳታፐ ዎልቃማነ ዉርሰ ጋላሳን የሱሲ ደንድድ፥ ባ ቃላ ቁ ኦድ፥ "ሳሞትዳ ኦንካ ታኮ ይድ ኡዮ።✝ 38 ታና አማንያ ኦንካ ጌሻ ማፃፋይ ግዳይሳዳ ደኦ እምያ ፑልቶ ሃይ እያፐ ጎጋና" ያግስ።✝ 39 እ ሄሳ ግዳይ እያ አማንዳይሳት ኤካናዉ ደእያ ጌሻ አያናባ። የሱሲ ቡሮ ቦንቸትቦና ግሾ፥ ሄ ዎደ ጌሻ አያናይ እመትቤና።

40 ሄ አሳፐ ዳሮት እ ገይሳ ስእድ፥ "ቱማ ሀይስ ናብያ"* ያግዶሶና።

41 ሀራት ቃስ፥ "ሀይስ ክርስቶሳ" ያግዶሶና።

ሽን ሀራት ቃስ፥ "ክርስቶስ ጋልላፐ ዋንድ ከዪ? 42 ጌሻ ማፃፋይ፥ ‘ክርስቶስ ዳዊታ ሼሻፐ ዳዊቲ ደእዳ ቤተለመ ካታማፐ ያና’ ያገነዬ?" ያግዶሶና።✝ 43 ሄሳ ግሾ፥ የሱሳ ጋሶን አሳይ ባንታ ግዶን ሻከትዶሶና። 44 ሄ አሳፐ እሶት እሶት እያ ኦይካናዉ ኮይዶሶና፥ ሽን ኦንካ እያ ቦላ ኩሸ ዎቤና።

45 ፆሳ ኬ ናገይሳት ካህነ ሀላቃታኮነ ፋርሳወታኮ ጉየ ስም ይን ኤንቲ፥ "አይስ እያ ኤህበከቲ?" ያግድ ኦይችዶሶና።

46 ፆሳ ኬ ናገይሳት ኤንታኮ፥ "ሀ አደይ ኦደተይሳ ኦንካ ኦደተና" ያግድ ዛርዶሶና።

47 ፋርሳወት ዛሪድ፥ "እ ህንተናካ ባለዴ? 48 አይሁደ ሀላቃታፐ ዎይኮ ፋርሳወተፐ እያ አማንዳ አስ ደኢ? 49 ሙሰ ህግያ ኤሮና ሀ አሳይ ባደትዳሳታ" ያግዶሶና።

50 ፋርሳወታፐ እሶይ ቃማ የሱሳኮ ብዳ ንቆድሞስ ኤንታኮ፥✝ 51 "እስ አስ ግያባ ስኦና ዎይኮ እ አይ ኦዳኮ ኤሮና ደእሸ ኮይሮትድ እያ ቦላ ፕርደይስ ኑ ህግያን ደኢ?" ያግስ።

52 ኤንቲ ዛሪድ፥ "ኔንካ ቃስ ጋልላ ቢታ አሴ? ጋልላ ቢታፈ ናበይ ከዮናይሳ ጌሻ ማፃፋፐ ፕልጋዳ ደማ" ያግዶሶና። 53 እሶይ እሶይ አግድ ባ ሶ ባ ሶ ብስ።