Marcos 12

ጎሻንቾታ ሌምሶ

1 የሱሲ ኤንታዉ ሌምሶን ያግድ ኦድስ፦ "እስ ኡራይ ዎይነ ቶክድ፥ እያ ዩሾን ድርስ ድርስ። ቃስ ሄ ዎይነ ጉምእያ ኦላ ቦክስ። እያ ናጋናዉ አዱሳ ሻኮ ሻክስ። ሄሳፈ ጉየ፥ ኮ ኦያ አሳስ እምድ፥ ሀራ ቢታ ብስ።✝12:1 እሳ 5:1. 2 ዎይነ አይፍያ ማፅያ ዎደይ ጋክን፥ ባና ጋክያ ግሹዋ ኤሀና መላ፥ እስ ባ አይልያ ኮ አዋታኮ የድስ። 3 ኮ አዋት እያ አይልያ ኦይክድ ዋድ፥ መላ ኩሸ የድዶሶና። 4 ናምአን ሀራ አይለ ኤንታኮ ኪትን፥ ኤንቲ ሄ አይልያ ሁጵያ ቆእድ ካዉሽድ የድዶሶና። 5 ዎይነ አታክልትያ ጎዳይ ቃስካ ሀራ አይለ ኪትስ። ሄ አይልያ ዎዶሶና፥ ቃስ ሀራ ዳሮታ ሄሳዳ ኦዶሶና፥ እሶታ እሶታ ዋድ፥ ሀራታ ዎዶሶና።

6 "ዎይነ አታክልትያ ጎዳስ ኪታናዉ ኡባፈ ዉርሰን እ ዳሮ ዶስያ ባ ናኣ ፃላል አትስ። እ፥ ‘ኤንቲ ታ ናኣ ቦንቾና አጎኮና’ ግድ፥ ባ ናኣ ኤንታኮ ኪትስ።

7 "ሽን ኮ አዋት ባንታ ግዶን፥ ‘ላታናይስ ሀይሳ፤ የተ እያ ዎኦስ፤ እያ ላታይ ኑባ ግዳና!’ ያግዶሶና። 8 ናኣ ኦይክድ ዎድ፥ እያ አሀ ዎይነ ጋድያ ግዶፈ ጋፃ ከስድ የግዶሶና።

9 "ህዛ፥ ዎይነ ጋድያ ጎዳይ ዋታኔ? ይድ ሄ ኮ አዋታ ዎ ኦንግድ፥ ዎይንያ ኮ ኦያ ሀራ አሳስ እማና።

10,11 " ‘ግምበይሳት ቦርድ እፅዳ ሹቻይ

ጎዳ ፃጱዋ ምንያ፥

ኡባፈ አያ ሹቹ ግድስ።

ሀይስ ጎዳይ ኦዳባ፤

ቃስ ኑ አይፍያስካ ማላልስያባ’

ያገይሳ ጌሻ ማፃፋፐ ናባብበከቲ?" ያግስ።✝12:10-11 ማዝ 118:22-23.

12 ካህነ ሀላቃት፥ ህገ አስታማረትነ ጭማት የሱሲ ሄ ሌምሱዋ ባንታ ቦላ ሌምስዳይሳ ኤርዳ ግሾ፥ እያ ኦይካናዉ ኮይዶሶና፥ ሽን አሳስ ያይድ፥ አግድ ብዶሶና።

ጊራባ

13 ቃስ እያ ኦዳፐ ባላ ደምድ፥ እያ ኦይካና መላ፥ ፋርሳወታፐነ ሄሮዲሳ ባጋታፐ ጉ አሳታ እያኮ ኪትዶሶና። 14 ኤንቲ እያኮ ይድ፥ "አስታማርያዉ፥ ኔኒ ቱማ ኦደተይሳነ አሳፐ አሰ ሻኮናይሳ ኑኒ ኤሮስ። ኔኒ አሰ ዱማያካ፤ ቃስ ፆሳ ኦግያ ቱማተን ታማርሳሳ። ኑኒ ሮመ ቢታ ካዋ ቄሳረስ ጊራ ጊረይስ ዎገየ ዎጋ ግደኔ? ጊራ ጊራነ አጋኔ?" ያግዶሶና።

15 ሽን የሱሲ ኤንታ ጩቦተ ኤርድ፥ "ታና አይስ ፓጨቲ? አነ እስ ሳንትመ ታና በስተ" ያግስ። 16 ኤንቲ እያዉ ኤህዶሶና፥ "ሀ ምስለይነ ሱንይ ኦደባዬ?" ያግድ ኤንታ ኦይችስ።

ኤንቲ፥ "ሮመ ካዋ ቄሳረይሳ" ያግዶሶና።

17 የሱሲ ዛሪድ፥ "ያትኮ፥ ቄሳረባ ቄሳረስ፥ ፆሳባ ፆሳስ እምተ" ያግን ኤንቲ እያባ ማላለትዶሶና።

ሀይቆፐ ደንዶባ

18 ሀይቅዳ አስ ደንደና ግያ ሳዱቃወታፐ እስ እስ አሳት የሱሳኮ ይድ፥ ሀይሳዳ ያግድ፥ እያ ኦይችዶሶና።✝12:18 ሀዋ 23:8. 19 "አስታማርያዉ፥ ሙሰይ ኑስ ህግያ ፃፍሸ፥ ‘ማቾ ኤክዳ አስ ናአ የሎና ሀይቅኮ፥ ሄ ሀይቅዳይሳ እሻይ እያ ማችዉ ኤክድ፥ ባ እሻስ ናአ የላናዉ በሴስ’ ያግስ።✝12:19 ዛረ 25:5. 20 በን ዎደ ላፑን እሻት ደኤይሳታፐ ባይራይ ማቾ ኤክድ፥ ናአ የሎና ሀይቅስ። 21 ናምአንይ እዮ ኤክስ፥ እካ ናአ የሎና ሀይቅስ። ሄንይካ ሄሳዳ ሀንስ። 22 ላፑናትካ ሄሳ እዮ ኤክድ፥ ናአ የሎና ሀይቅዶሶና። ኡባፈ ጉየ፥ ቃስ ሄ ማጫስያ ሀይቃሱ። 23 ያትን፥ ላፑናት እዮ ኤክዳ ግሾ ሀይቅዳ አሳይ ሀይቆፐ ደንድያ ጋላስ፥ እያ ኤንታፈ አዉሳስ ማቾ ግዳኔ?" ያግዶሶና።

24 የሱሲ ዛሪድ፥ "ህንተ ባለተይ፥ ጌሻ ማፃፋታ ዎይኮ ፆሳ ዎልቃ ኤሮና ግሾሳ! 25 ሀይቅዳ አሳይ ሀይቆፐ ደንድያ ጋላስ፥ ሳሎን ደእያ ኪታንቾታ መላ ግዳናፐ አትሽን፥ ኤኮኮና፤ ገለኮና። 26 ሽን ሀይቅዳይሳታ ደንዱዋባ ግድኮ፥ ሙሰ ማፃፋን ፃፈትዳ ፁገትያ ቱሽያባ ኦድያ በሳን፥ ፆሳይ ሙሰኮ፥ ‘ታኒ፥ አብራሃመ ፆሳ፥ ይሳቃ ፆሳ፥ ያይቆባ ፆሳ’ ግዳይሳ ናባብበከቲ?✝12:26 ከሳ 3:6. 27 ሄሳ ግሾ፥ እ፥ ፓፃ ደኤይሳታ ፆሳፈ አትሽን፥ ሀይቅዳይሳታ ፆሰ ግደና። ህንተ ዳሮ ባልደታ" ያግስ።

ኡባፈ ባይራ ኪታ

28 ህገ አስታማረታፐ እሶይ ኤንቲ ፓላመይሳ ሺቅድ ስእስ። ቃስ የሱሲ ኤንታዉ ሎይ ዛርዳይሳ ስእድ፥ "ኪታ ኡባፈ አያ ኪታይ አዉሴ?" ያግድ የሱሳ ኦይችስ።✝12:28 ሉቃ 10:25-28.

29 የሱሲ ዛሪድ፥ እያ ሀይሳዳ ያግስ፦ "ኪታ ኡባፈ አያ ኪታ ስእተ፤ ‘እስራኤለ አሳዉ፥ ጎዳይ ኑ ፆሳይ እስ ጎዳ።✝12:29 ዛረ 6:4-5. 30 ነ ጎዳ ነ ፆሳ ነ ኩመ ዎዛናፐ፥ ነ ኩመ ሸምፑዋፈ፥ ነ ኩመ ቆፋፐ፥ ነ ኩመ ዎልቃፈ ዶሳ’ ያጌስ። 31 ቃስ ኪታ ኡባፈ አያ ናምአን ኪታይ ሀይሳ፤ ‘አሰ ኡባ ነ ሁጵያዳ ዶሳ’ ያገይሳ፤ ሀይሳታፐ አያ ሀራ ኪት ባዋ" ያግስ።✝12:31 ሌወ 19:18.

32 ህገ አስታማረይ የሱሳኮ፥ "አስታማርያዉ፥ ቱማ ጋዳሳ፤ ኔኒ ‘ፆሳይ እስ ፆሳ ፃላላ። እያፐ አትሽን፥ ሀር ባዋ’ ግዳይስ ቱማ።✝12:32 ዛረ 4:35. 33 ፆሳ ኩመ ዎዛናፐ፥ ኩመ ቆፋፐነ ኩመ ዎልቃፈ ዶሰይስነ ቃስ አሰ ኡባ ባ ሁጵያዳ ዶሰይስ፥ ፁሳ ያርሾፈነ ሀራ ያርሾ ኡባፈ አስ" ያግስ።✝12:33 ሆሰ 6:6.

34 የሱሲ ህገ አስታማርያ ዛሮይ አዳ ኤራንቾ አሳ ዛሮ ግድዳይሳ በእድ፥ "ኔኒ ፆሳ ካዎተፈ ሃካባካ" ያግስ፤ ሄሳፈ ጉየ፥ የሱሳ ሀራባ ኦይቻናዉ ኦንካ ምንቤና።✝12:34 ሉቃ 10:25-28.

ክርስቶስ ኦደ ናኤ?

35 የሱሲ ፆሳ ኬን ታማርስሸ፥ ሀይሳዳ ያግስ፦ "ህገ አስታማረት ክርስቶሳ ዎይግድ ዳዊታ ናአ ጎና? 36 ዳዊቲ ጌሻ አያናን ኩምድ፥

" ‘ጎዳይ፥ ታ ጎዳ፥ "ታኒ ነ ሞርከታ

ነ ቶሆይ የያሶ ኦና ጋካናዉ፥

ሀይሳን ታፐ ኡሻቻ ባጋራ ኡታ" ግስ’ ያግስ።✝12:36 ማዝ 110:1.

37 ዳዊቲ ባ ሁጰን ክርስቶሳ፥ ‘ጎዳ’ ግድ ፄግኮ፥ ያትን፥ ክርስቶስ ዋንድ፥ ዳዊታ ናአ ግድ?" ያግስ።

ዳሮ አሳይ የሱሲ ገይሳ ኡፋይሳን ስእዶሶና።

ህገ አስታማረታነ ፋርሳወታ አየ!

38 የሱሲ ታማርስሸ፥ ሀይሳዳ ያግስ፦ "ህገ አስታማረታፐ ናገትተ፤ ኤንቲ አዱሳ ማኦ ማእድ ዩየይሳነ ግያንካ አሳይ ኤንታ ቦንችድ ሳሮይሳ ዶሶሶና። 39 ኤንቲ አይሁደ ዎሳ ኬታን ዳሮ ሎእያ ኦይድያ ዶሶሶና፤ ቃስ አስ ባንታና ሞክያ በሳን ቦንቾ በሲ ዶሶሶና። 40 ኤንቲ አምኤታ ኬ ቦንቅድ፥ ባንታዉ ሎኦ ዳናናዉ ዎሳ አዱሶሶና፤ ኤንቲ ኡባፈ አያ ፕርዳ ኤካና" ያግስ።

አምኤ ሙፃታ

41 የሱሲ ፆሳ ኬን ሙፃታ የግያ ሳፅንያ ማታን ኡትድ፥ አሳይ ባ ሚሽያ ሄ ሳፅንያን የገይሳ በእስ፤ ዳሮ ዱረ አሳይ ዳሮ ሚሽያ ሄ ሳፅንያን የጎሶና። 42 እስ ማንቆ አምእያ ያዳ፥ ናምኡ ባካና ሄ ሳፅንያን የጋሱ። 43 የሱሲ ባ ታማረታ ፄግድ፥ "ታኒ ህንተዉ ቱማ ኦዳይስ፤ ሙፃታ ሳፅንያን የግዳ አሳ ኡባፈ ሀ ማንቆ አምእያ ዳርሳዳ የጋሱ። 44 አይስ ጊኮ፥ ሀራት ኡባይ ባንታዉ ፓላህዳ ሚሽያፐ የግዶሶና። ሽን እያ ባ ፓጫፐ፥ ባዉ ደእያ አቁዋ ኩመ እማሱ" ያግስ።