1 ሄሳፈ ጉየ፥ ጎዳይ ሀራ ላፑን ታማነ ናምኡ*10:1 ላፑን ታማነ ናምኡ፦ እስ እስ ማፃፋት ላፑን ታማ ጎሶና፤ ቃስ ፓይዶ 17 ፄላ። አሳታ ዶርስ። እ ባናዉ ቆፕዳ ካታማነ ጉታ ኡባ ስንትድ ባና መላ ናምአ ናምአ ኦድ ኪትስ። 2 የሱሲ ኤንታኮ፥ "ሄኮ፥ ሺቃና ካይ ዳሮ ሽን ኦሳንቾት ጉ። ያንያ ግሾ፥ ካ ጎዳይ ኦሳንቾታ ኪታና መላ ዎስተ።✝10:2 ማቶ 9:37-38. 3 ህዛ፥ ቢተ፥ ታኒ ህንተና ዶርሳታዳ ሱመታ ግዶ የዳና።✝10:3 ማቶ 10:16. 4 ህንተ ብያ ኦግያስ አይኮካ ኦይኮፍተ፥ ሚሸ ግድን ካ ግድን ጫማ ኦይኮፍተ። ኦገ ቦላ ኦናካ ሳሮፍተ።✝10:4 ማቶ 10:7-14፤ ማር 6:8-11፤ ሉቃ 9:3-5. 5 ህንተ ገልያ ኬ ኡባ ኮይሮትድ፥ ‘ሳሮይ ሀ ኬስ ግዶ’ ያግተ። 6 ሳሮ ዶስያ አስ ሄ በሳን ደእኮ፥ ህንተ ሳሮይ ያን ሸምፓና፤ እፃስ ጊኮ ህንተ ሳሮይ ህንተዉ ስማና። 7 ኦሳንቾስ ዳሞዘ በሲያ ግሾ፥ ህንተ ገልዳ ኬን ህንተዉ ሺሽዳባ ኡባ ምሸነ ኡይሸ ያን ጋምእተ። እሱዋ ሶፐ እሱዋ ሶ ዩዮፕተ።✝10:7 2 ቆሮ 9:14፤ 1 ፅሞ 5:8. 8 አይ ካታማካ ህንተ ገልያ ዎደ አሳይ ህንተና ሞክድ፥ ህንተዉ ሺሽዳባ ኡባ ሚተ። 9 ሄ ካታማን ደእያ ሀርጋንቾታ ፓሸ፥ ‘ፆሳ ካዎተይ ህንተኮ ማትስ’ ያግድ ኦድተ። 10 ሽን እስ ካታማ ገልያ ዎደ አሳይ ህንተና ሞኮና እፅኮ ዳባባ ከይድ ሀይሳዳ ጊተ:✝10:10 ሀዋ 13:51. 11 ‘ኑ ቶሁዋ ቦላ ደእያ ህንተ ካታማ ባና ፕቶስ፥ ሽን ፆሳ ካዎተ ህንተኮ ማታትዳይሳ ኤርተ።’✝10:11 ማቶ 10:7-14፤ ማር 6:8-11፤ ሉቃ 9:3-5. 12 ፕርዳ ጋላሳን፥ ሀ ካታማፐ ሶዶመ ካታማስ ፕርድ ካዉሸ ግዳናይሳ ታ ህንተዉ ኦዳይስ" ያግስ።✝10:12 መ 19:24-28፤ ማቶ 10:15፤ 11:24.

13 ካልድካ፥ የሱሲ፥ "ነኖ ኮራዝነ፥ ነኖ ቤተሳይዳ፥ አየ! ህንተናን ኦሰትዳ ማላታት ፅሮሳንነ ስዶናን ኦሰትዳኮ ያን ደእያ አሳይ ካዮ ማኦ ማእድ፥ ብድን ቦላ ኡትድ፥ በን ማሮታን ገል አጋናሽን።✝10:13 እሳ 23:1-18፤ ህዝ 26:1-21፤ እዩ 3:4-8፤ አሞ 1:9-10፤ ዛካ 9:2-4. 14 ሄሳ ግሾ፥ ህንተፈ አድ ፅሮሳስነ ስዶናስ ፆሳ ፕርድ ካዉያና። 15 ነካ ቅፍርናሆማ፥ ሳሎ ጋካናዉ ነና ቁ ኦናዉ ኮያይ? ነ ዱገ ስኦለ ሆለታና" ያግስ።✝10:15 እሳ 14:13-15.

16 ቃስካ የሱሲ ባ ታማረታኮ፥ "ህንተና ስኤይ ታና ስኤስ፥ ህንተና ኤኮናይ ታና ኤከና፥ ታና ኤኮናይ ታና ኪትዳይሳ ኤከና" ያግስ።✝10:16 ማቶ 10:40፤ ማር 9:37፤ ሉቃ 9:48፤ ዮሀ 13:20.

17 ላፑን ታማነ ናምኡ ታማረት ኪተትዳ በሳፈ ዳሮ ኡፋይትሸ ስምዶሶና። የሱሳኮ ሺቅድ፥ "ጎዳዉ፥ ነ ሱንን ቱና አያናትካ ኑስ ኪተትዶሶና" ያግዶሶና።

18 የሱሲ ኤንታኮ፥ "ፃላሄይ ሳሎፐ ዎልአንዳ ዎሽን ታ በአስ። 19 ሄኮ፥ ሾሽነ ኮርነ የና መላነ ሞርክያ ዎልቃ ዛራና መላ ማታ ህንተዉ እማስ። ህንተና ቆሀናባይ አይኮይካ ዴና።✝10:19 ማዝ 19:13. 20 ግዶሽን፥ ህንተ ሱንይ ሳሎ ማዝጋበን ፃፈትዳ ግሾ፥ ኡፋይትተፐ አትሽን፥ ቱና አያናት ኪተትዳ ግሾ ኡፋይቶፍተ" ያግስ።

21 ሄ ዎደ፥ የሱሲ ጌሻ አያናን ኡፋይትድ፥ "ሳሉዋ ሳኣ ጎዳዉ፥ ሀይሳ ጭንጫታፐነ ኤራንቾታፐ ገንዳ ያላጋታስ ቆንጭስዳ ግሾ ጋላተታ። ኤ፥ ታ አዋዉ፥ ሄሳ ነ ኦናዉ ሎኦ ሸነ ግድስ።

22 "ኡባባይ ታ አዋፐ ታዉ እመትስ። ናአይ ኦነኮ አዋፐ አትሽን፥ ሀር ዎይኮ ናአይ ቆንጭሳናዉ ኮየይሳፈ ሀር ኦንካ አዋ ኤረይ ባዋ" ያግስ።✝10:22 ዮሀ 3:35፤ 10:15.

23 ካልድካ፥ የሱሲ ባ ታማረታስ ዱማ፥ "ህንተ በኤይሳ በኤይሳት አንጀትዳይሳታ። 24 ቱማ ዳሮ ናበትነ ካዎት ህንተ በኤይሳነ ስኤይሳ በአናዉነ ስአናዉ አሞትዶሶና፥ ሽን በእቦኮና፥ ስእቦኮና" ያግስ።

25 ሄኮ፥ እስ ጋላስ ሙሰ ዎጋ ኤርያ እስ ኡራይ ደንድድ የሱሳ ያግድ ፓጨ ኦይሾ ኦይችስ። "አስታማርያዉ፥ መርና ደኦ ላታናዉ ታኒ አይ ኦ?" ያግስ።✝10:25 ማቶ 22:35-40፤ ማር 12:28-34.

26 የሱሲ፥ "ሙሰ ማፃፋን ፃፈትዳይስ ዎይጊ? ነ ዋታ ናባባይ?" ያግስ።

27 አደይ ዛሪድ፥ " ‘ነ ጎዳ ነ ፆሳ፥ ነ ኩመ ዎዛናፐ፥ ነ ኩመ ሸምፖፈ፥ ነ ኩመ ዎልቃፈነ ነ ኩመ ቆፋፐ ዶሳ። ቃስ ነ ሾሩዋ ነ ሁጰዳ ዶሳ’ ያጌስ" ያግስ።✝10:27 ሌወ 19:18፤ ዛረ 6:5.

28 የሱሲ እያኮ፥ "ኔኒ ልከ ዛራዳሳ፥ ነካ ሄሳዳ ኦ። ኔኒ መርናዉ ደኦን ዳና" ያግስ።✝10:28 ሌወ 18:5.

29 ሽን ኡራይ ባና ፅሎ ኦናዉ ኮይድ፥ "እ ታ ሾሮይ ኦኔ?" ያግስ።

30 እያ ኦይሻስ የሱሲ ያግድ ዛሮ እሚስ፤ "እስ አሰ ደኤይስ የሩሳላመ ካታማፐ ዱገ እያርኮ ካታማ ብሽን፥ ኦገ ቦላ ፓንጋት ከይድ ሾጭዶሶና። እያ ማኡዋ ቃር ኤክድ ሀይቆፐነ ፓፃፐ ግዶን የግድ ብዶሶና። 31 ጉየፐ፥ አይሁደ ካህነ እሶይ ሄ ኦግያራ ባ ቡሱ ብሸ ኡራ በእድ ደሽ ግድ አስ። 32 ቃስ እስ ሌወ ደኤይስ ሄ በሳ ጋክሸ ኡራ በእድ፥ ሀራ ሶራ አድ ብስ። 33 ሽን፥ እስ ሳማረ ቢታ አሰ ደኤይስ ሄ ኦግያራ ይሸ ኡራ በእድ እያዉ ቃትስ✝10:33 2 ታር 28:15. 34 እያኮ ሺቅድ፥ እያ ማዱን ቦላ ዛይተነ ዎይነ ትግድ ቃችስ። ባ ሀርያ ቦላ ኡትስድ እማ አቅያ ኬ ኤፍስ። ሄ በሳን እያዉ ኮሽያባ ኡባ ኦስ። 35 ዎንተ ናምኡ ድናረ ከስድ እማ ኬ አዋስ እምድ፥ ‘ሀያና ሀ ኡራ ሎይ ፄላ። ታኒ ነዉ እምዳይሳፈ ቦላራ ነ ከስያባ ኡባ ታ ነዉ ጭጋና’ ያግስ።

36 "ህዛ፥ ሀ ሄ አሳታፐ ፓንጋት ሾጭዳ ኡራስ ሾሮተይ ነዉ ኦና ዳኒ?"

37 ኡራይ ዛሪድ፥ "እያዉ ቃትዳይሳካ" ያግስ።

የሱሲ፥ "ነካ ባዳ ሄሳዳ ኦ" ያግስ።

38 የሱሲ ባ ታማረታራ ኦገ ብሸ እስ ጉታ ጋክስ። ያን ማርታ ጌተትያ እስ ማጫስያ፥ እያ ባ ሶን ሞካሱ።✝10:38 ዮሀ 11:1. 39 እዉካ ማይራሞ ጌተትያ ምችያ ደአዉሱ፥ ማይራማ ቃላ ስአሸ ጎዳ ቶሁዋ ማታን ኡታሱ። 40 ሽን ማርታ ዳሮ ኦሶን ኡንኤታዳ የሱሳኮ ሺቃዳ፥ "ጎዳዉ፥ ታ ምችያ ኦሱዋ ታ ፃላላስ የጋዳ ኡታ አግን ታ ዳቡርያ ዎደ ኔኒ በአሸ ስእ ጋይ? እያ ታና ማዳና መላ ኦድኪ" ያጋሱ።

41 ሽን ጎዳይ ዛሪድ፥ "ማርታ፥ ማርታ፥ ኔኒ ዳሮባን ኡንኤታሳነ መቶታሳ። 42 ግዶሽን፥ ኮየተይ እስባ ፃላላ። ማይራማ ሎኦባ ዶራሱ፥ ሄስካ ኢፐ ኤከተና" ያግስ።