1 ዛው ባይና ኦላ ቁልፕያነ ግታ ሳንላታ ባ ኩሸን ኦይክዳ እስ ኪታንቾይ ሳሎፐ ዎሽን በአስ። 2 እ ዳውያ ኦይክድ ሙኩሉ ላይስ ቃችስ። ሄ ዳወይ ኮይሮ ሾሻ፥ ዳቡሎሳ ዎይኮ ፃላሄ።✝20:2 መ 3:1. 3 ኪታንቾይ ዛው ባይና ኦላን እያ የግድ፥ ሙኩሉ ላይ ዉራና ጋካናዉ ካዎተታ ዛር ባለና መላ ቁልፐን ጎርድድ አታምስ። ሄሳፈ ጉየ፥ ዳወይ ጉ ዎደስ ብለታናዉ በሴስ።

4 ሄሳፈ ጉየ፥ አራታታነ አራታታ ቦላ ኡትድ ፕርዳና መላ ማት እመትዳይሳታ በአስ። የሱሳስ ማርካትዳ ግሾነ ፆሳ ቃላ ኦድዳ ግሾ ባንታ ቆያ ጎይረትዳ አሳ ሸምፑዋ በአስ። ኤንቲ ዶኣ ዎይኮ ዶኣ ምስልያ ጎይንቦኮና። ኤንቲ ዶኣ ማላ ባንታ ሶምኦን ዎይኮ ባንታ ኩሸን ዎቦኮና። ኤንቲ ሀይቆፐ ደንድድ ክርስቶሳራ እስፈ ሙኩሉ ላይ ሃርዶሶና።✝20:4 ዳነ 7:9. 5 ሀይስ ኮይሮ ደንዱዋ፤ አትዳ ሀንኮ ሀይቅዳይሳት ሙኩሉ ላይይ ዉራና ጋካናዉ ሀይቆፐ ደንድቦኮና። 6 ኮይሮ ደንዱዋስ ቃድ ደኤይሳት አንጀትዳይሳታነ ጌሻታ። ኤንታ ቦላ ናምአን ሀይቁዋስ ዎልቅ ባዋ። ኤንቲ ፆሳስነ ክርስቶሳስ ካህነ ግዳና፤ እያራ እስፈ ሙኩሉ ላይ ሃራና።

7 ሙኩሉ ላይይ ዉርዳፐ ጉየ ፃላሄይ ቃሾፐ ብለታና። 8 እ ሳኣ ጋፃፐ ጋፃ ጋካናዉ ደእያ ካዎተታ፥ ኤንትካ፥ ጎገነ ማጎገ ጌተተይሳታ ባለድ ኦላስ ሺሻናዉ ከያና። ኤንታ ፓይዶይ አባ ጋፃን ደእያ ሻፈ መላ።✝20:8 ህዝ 38:2. 9 ኤንቲ ቢታ ኡባን ላለትድ፥ ጌሻታ ሄራነ ፆሳይ ዶስያ ካታማ ተቅዶሶና። ሽን ታም ሳሎፐ ዎድ ኤንታና ምስ።

10 ኤንታ ባለዳ ፃላሄይ፥ ዶአይነ ዎርዶ ናበይ የገትዳ ኤፅያ ዲነ ታማ አባን የገትስ። ኤንቲ ቃማነ ጋላስ መርናዉ ፓፃ ካኤታና።

11 ሄሳፈ ጉየ፥ ግታ ቦ አራታ ቦላ ኡትዳይሳ በአስ። ሳእነ ሳሎይ እያ ስንፈ ባቃትዶሶና፤ ኤንቲ ዛር በንትቦኮና።✝20:11 ዳነ 7:9-10. 12 ሀይቅዳይሳት፥ ግታትነ ጉት አራታ ስንን ኤቅዳይሳታ በአስ፤ ማፃፋት ዶየትዶሶና፤ ቃስ ደኦ ማፃፋ ግድዳ ሀራ ማፃፍ ዶየትስ። ሀይቅዳይሳት ማፃፋን ፃፈትዳ ባንታ ኦሱዋዳ ፕርዳ ኤክዶሶና። 13 አባይ ባ ግዶን ደእያ ሀይቅዳይሳታ እሚስ፤ ሀይቆይነ ስኦለይ ባንታ ግዶን ደእያ ሀይቅዳይሳታ እምዶሶና። እስ እስ አስ ባ ኦሱዋዳ ፕርዳ ኤክስ። 14 ያትን፥ ሀይቆይነ ስኦለይ ታማ አባን የገትዶሶና። ሄ ታማ አባይ ናምአን ሀይቆ። 15 ደኦ ማፃፋን እያ ሱንይ ፃፈትቦና አስ ኦንካ ታማ አባን የገትስ።