1 ሄሳፈ ጉየ፥ አራታ ቦላ ኡትዳይሳ ኡሻቻ ኩሸን ግዶራነ ካረራ ፃፈትዳ ላፑን ማታመን ጎርደትዳ ፃ ማፃፋ በአስ።✝ 2 እስ ምኖ ኪታንቾይ ባ ቃላ ቁ ኦድ፥ "ማታምያ ብላናዉነ ማፃፋ ዶያናዉ በሰይ ኦኔ?" ያግድ አዋጅሽን በአስ። 3 ሽን ሳሎን ግድን ሳአን ዎይኮ ሳአፐ ጋርሳን ግድን ሄ ፃ ማፃፋ ብላናዉነ ግዱዋ በአናዉ ዳንዳኤይ ኦንካ በንትቤና። 4 ፃ ማፃፋ ብላናዉነ እያ ግዱዋ በአናዉ በሲያ አስ ይዳ ግሾ ታ ዳሮ ዬካስ። 5 ያትን፥ ጭማታፐ እሶይ ታኮ፥ "ዬኮፋ! ሄኮ፥ ይሁዳ ኮቸ ግድያ ጋሞይ፥ ዳዊታ ሼሻይ፥ ላፑን ማታመታ ብላናዉነ ማፃፋ ዶያናዉ ዳንዳእስ" ያግስ።✝

6 ሄሳፈ ጉየ፥ ሹከትዳ ዶርሳይ አራታስ፥ ኦይዱ ደኦን ደእያ መተታስነ ጭማታስ ግዶን፥ ኤቅዳይሳ በአስ። እያዉ ላፑን ካጨትነ ላፑን አይፈት ደኦሶና። ሄሳት ሳአ ኡባ ኪተትዳ ፆሳ ላፑን አያናታ።✝ 7 ሄ ዶርሳይ ብድ፥ አራታ ቦላ ኡትዳይሳ ኡሻቻ ኩሸፐ ፃ ማፃፋ ኤክስ። 8 እ ሄ ፃ ማፃፋ ኤክዳ ዎደ፥ ደኦን ደእያ ኦይዱ መተትነ ላታማነ ኦይዱ ጭማት ዶርሳ ስንን ኩንድዶሶና። ኤንቲ እሶይ እሶይ ዲነ ጌሻታ ዎሳ ግድዳ እፃነይ ኩምዳ ዎርቃ ሻተ ኦይክዶሶና።✝ 9 ኤንቲ፥

"ፃ ማፃፋ ኤካናዉ፥

ማታመታ ብላናዉ ነዉ በሴስ።✝

አይስ ጊኮ፥ ኔኒ ሹከታዳሳ፤

ኮቸ ኡባፈ፥ ዱማ ዱማ ዶናፐ፥

ያራታፐነ ካዎተታ ኡባፈ

ነ ሱን ፆሳስ ዎዛዳሳ።

10 ኤንቲ እያ ፆሳ አዋስ ኦና መላ

ኤንታና ካህነ ካዎተ ኦዳሳ።

ኤንትካ ቢታ ኡባ ሃራና"

ያግድ ኦራ ማዝሙረ የፅዶሶና።✝

11 ታ በእያ ዎደ ሙኩሉ ቶሆ ሙኩሉነ ታሙ ሙኩሉ ቶሆ ታሙ ሙኩሉ ግድያ ኪታንቾታ ግርሳ ስአስ። ኤንትካ አራታ፥ ኦይዱ ደኦን ደእያ መተታነ፥ ጭማታ ዩሹዋን ኤቅዶሶና።✝ 12 ሄ ኪታንቾት ቁ ግዳ ቃላን፥

"ሹከትዳ ዶርሳይ ዎልቃ፥ ዱረተ፥

ጭንጫተነ ምኖተ፥

ቦንቾ፥ ሳባነ ጋላታ ኤካናዉ በሴስ"

ያግዶሶና።

13 ሄሳፈ ጉየ፥ ሳአን፥ ሳሎን፥ ሳአፐ ጋርሳንነ አባ ግዶን ደእያ መተ ኡባይ፥

"አራታ ቦላ ኡትዳይሳስነ ዶርሳስ፥

ጋላታይ፥ ቦንቾይ፥ ሳብነ ዎልቅ፥

መር መርናዉ ግዶ"

ያግድ የፅሽን ስአስ።

14 ኦይዱ ደኦን ደእያ መተት፥ "አምንእ" ያግዶሶና፤ ቃስ ጭማት ጉፋንድ ጎይንዶሶና።