ናምኡ ዶአታ
1 ሄሳፈ ጉየ፥ እስ ዶአይ አባፈ ከይሽን በአስ። እያዉ ታሙ ካጨይነ ላፑን ሁጰይ ደኤስ። ሄ ታሙ ካጨታ ቦላ ታሙ ካላቻት ደኦሶና። ሄ ሁጰታ ቦላ ፆሳ ጫሻ ሱንት ፃፈትድ ኡትስ።13:1 ዳነ 7:3፤ ቆን 17:3. 2 ታ በእዳ ዶአይ ማሄ ዳኔስ፤ እያ ቶሆይ ባባን ቶሆ መላ፤ እያ ዶናይካ ጋሞ ዶና ዳኔስ። ዳወይ ባ ዎልቃ፥ ባ አራታነ ባ ግታ ማታ ሄ ዶኣስ እሚስ።13:2 ዳነ 7:4.
3 ሄ ዶኣ ሁጵያፐ እሱዋ ቦላ ሀይቆስ ጋያ ማዱን በአስ፥ ሽን ሄ ማዱንይ ፓፅስ። አላምያ አሳ ኡባይ ማላለትድ ሄ ዶኣ ካልስ። 4 ዳወይ ባ ማታ ዶኣስ እምዳ ግሾ አሳ ኡባይ ዳውያ ጎይንዶሶና። ቃስ አሳይ፥ "ዶኣ መል ኦኔ? እያራ ኦለታናዉ ዳንዳኤይ ኦኔ?" ያግድ ዶኣስ ጎይንዶሶና።
5 ሄ ዶኣስ ኦቶርታና መላነ ጫያና መላ ዶን እመትስ፤ ኦይታማነ ናምኡ አጌና ሃራና መላ ማት እያዉ እመትስ።13:5 ዳነ 7:8፥ 25፤ 11:36. 6 ሄ ዶአይ ፆሳ፥ እያ ሱን፥ እ ደእያ በሳነ ሳሎን ደእያ ኡባ ባደ ኦይክስ። 7 ሄ ዶአይ ጌሻታራ ኦለትድ፥ ኤንታና ፆናና መላ ዎልቅ እያዉ እመትስ። ያራ ኡባ፥ ደረ ኡባ፥ ዱማ ዱማ ዶና ኡባ ቦላነ ኮቸ ኡባ ቦላ ማት እያዉ እመትስ።13:7 ዳነ 7:21. 8 አላመይ መቶሳፐ ዶምድ፥ ሹከትዳ ዶርሳ ደኦ ማፃፋን ኤንታ ሱንይ ፃፈቶና ሀ ሳአን ደእያ አሳ ኡባይ ሄ ዶኣስ ጎይናና።13:8 ማዝ 69:28.
9 ስእያ ሀይ ደእያ አስ ስኦ። 10 ኦንካ ድኤታናዉ ደኤይ ድኤቴስ። ማሻን ሀይቃናዉ ደኤይ ማሻን ሹከታና። ሄሳንካ ጌሻታ ዳንዳአይነ አማኖይ ኤረታና።13:10 ኤርም 15:2፤ 43:11.
11 ቃስካ፥ ሀራ ዶእ ሳአፐ ከይሽን በአስ። እያዉ ዶርሳ ካጨ ዳንያ ናምኡ ካጨይ ደኤስ፤ እያ ኦዳይ ዳወ ኦዳ መላ። 12 ሄ ዶአይ ኮይሮ ዶኣ በሳን፥ እያ ማታን ኦስ። እካ ሀይቆስ ጋያ ማዱንፈ ፓፅዳ ኮይሮ ዶኣስ፤ ቢታን ደእያ አሳ ኡባይ ጎይናና መላ ኦስ። 13 ሄ ናምአን ዶአይ ሀር አቶሽን፥ ታማ ሳሎፐ አሳ ኡባ ስንን ዎሳና ጋካናዉ ግታ ማላታታ ኦስ። 14 ኮይሮ ዶኣ በሳን ኦና መላ፥ እያዉ እመትዳ ማላታታን ሳአን ደእያ አሳ ኡባ እ ባለስ። ማሻን ማዱንፅድ ፓፅዳ ዶኣ ቦንቾስ ምስለ ጊግሳና መላ ኤንታና ኪትስ። 15 ናምአን ዶአይ ኮይሮ ዶኣ ምስልያስ ሸምፖ እምድ ኦደታና መላነ እያዉ ጎይኖናይሳት ሀይቃና መላ ኦያ ማት እመትስ።
16 ሄ ናምአን ዶአይ ግትነ ጉ፥ ማንቆይነ ዱረይ፥ ዎማኖይነ አይለይ ባ ኡሻቻ ኩሸን ዎይኮ ባ ሶምኦን ማላ ዎና መላ ኦስ። 17 ሄ ዶኣ ሱንይ ዎይኮ እያ ሱን ፓይዱዋ ማላይ ባይና አስ ኦንካ ባይዛናዉነ ሻማናዉ ዳንዳኤና።
18 ጭንጫተ ኮሸይ ሄሳና። ኤራተ ደእያ ኦንካ ሄ ዶኣ ፓይዱዋ ብርሸ ኤሮ፤ ሄ ፓይዶይ አሳ ሱን። ሄ ፓይዶይ ኡሱፑን ፄታነ ኡሱፑን ታማነ ኡሱፑና።