144,000 አሳት ማለትዶሶና
1 ሄሳፈ ጉየ፥ ኦይዱ ኪታንቾት ኦይዱ ሳኣ ጋፃን ኤቅዳይሳታ በአስ። ሄ ኪታንቾት ሳአ ቦላ ዎይኮ አባ ቦላ ዎይኮ አይ ም ቦላ ጫርኮይ ኦይዱ ሳኣ ጋፃፐ ጫርኮና መላ ተቅዶሶና።7:1 ኤርም 49:36፤ ዳነ 7:2፤ ዛካ 6:5. 2 ቃስ ደኦ ፆሳ ማታምያ ኦይክዳ ሀራ ኪታንቾይ ዶሎሀ ባጋፈ ከየይሳ በአስ። ሄ ኪታንቾይ ባ ቃላ ቁ ኦድ፥ ሳኣነ አባ ቆሀናዉ ዎልቅ እመትዳ ኦይዱ ኪታንቾታ፥ 3 ፄግድ፥ "ኑኒ ፆሳ አይለታ ሶምኦን ማታምያ ዎና ጋካናዉ ቢታ ዎይኮ አባ ዎይኮ ም ቆሆፕተ" ያግስ።7:3 ህዝ 9:4.
4 ያትን፥ ታኒ ፆሳ ማታመይ ሶምኦን ዎሰትዳይሳታ ፓይዱዋ ስአስ። እስራኤለ ማይዛታ ኡባፈ 144,000 አሳስ ሶምኦን ማታመ ዎስ።
5 ይሁዳ ኮቻፈ ታማነ ናምኡ ሙኩሉ፥
ሮቤላ ኮቻፈ ታማነ ናምኡ ሙኩሉ፥
ጋደ ኮቻፈ ታማነ ናምኡ ሙኩሉ፥
6 አሴራ ኮቻፈ ታማነ ናምኡ ሙኩሉ፥
ንፍታለመ ኮቻፈ ታማነ ናምኡ ሙኩሉ፥
ምናሰ ኮቻፈ ታማነ ናምኡ ሙኩሉ፥
7 ስሞና ኮቻፈ ታማነ ናምኡ ሙኩሉ፤
ሌወ ኮቻፈ ታማነ ናምኡ ሙኩሉ፥
ይሳኮራ ኮቻፈ ታማነ ናምኡ ሙኩሉ፥
8 ዛብሎና ኮቻፈ ታማነ ናምኡ ሙኩሉ፥
ዮሰፋ ኮቻፈ ታማነ ናምኡ ሙኩሉ፥
ብንያመ ኮቻፈ ታማነ ናምኡ ሙኩሉ፥
አሳ ሶምኦን ማታመ ዎስ።
ቦ ማኦ ማእዳ አሳታ
9 ሄሳፈ ጉየ፥ ኮቸ ኡባፈ፥ ካዎተ ኡባፈ፥ ያራ ኡባፈነ ዱማ ዱማ ዶናፐ ዛው ባይና ዳሮ አሳ በአስ። ሄ አሳይ ቦ ማኦ ማእድ፥ ዛምባ ሀይ ባንታ ኩሸን ኦይክድ፥ አራታ ስንንነ ዶርሳ ስንን ኤቅዶሶና። 10 ኤንቲ ባንታ ቃላ ቁ ኦድ፥ "አቶተይ አራታን ኡትዳ ኑ ፆሳፈነ ዶርሳፈ ዬስ" ያግዶሶና።
11 ኪታንቾት ኡባይ አራታ፥ ጭማታነ ኦይዱ መተታ ዩሹዋን ኤቅዶሶና። ኤንቲ አራታ ስንን ጉፋንድ ፆሳ ጎይንዶሶና።
12 "አምንእ!
አንጆይ፥ ቦንቾይ፥ ጭንጫተ፥ ጋላት፥ ሳብ
ዎልቅ፥ ምኖተ መር መርናዉ ኑ ፆሳስ ግዶ።
አምንእ!"
ያግዶሶና።
13 ጭማታፐ እሶይ ታኮ፥ "ሀ ቦ ማኡዋ ማእዳ አሳት ኦናንቴ? ኤንቲ አዉፐ ይዶና?" ያግድ ኦይችስ።
14 ታኒ ዛራዳ፥ "ጎዳዉ፥ ነ ኤራሳ" ያጋስ።
እካ ታኮ፥ "ሀይሳቲ ዳሮ ዋየ ዋይድ አዳይሳታ። ኤንቲ ባንታ ማኡዋ ዶርሳ ሱን ሜጭድ ጌሽዶሶና።7:14 ዳነ 12:1፤ ማቶ 24:21፤ ማር 13:19. 15 ሄሳ ግሾ፥
ኤንቲ ፆሳ አራታ ስንን ግድድ
ቃማነ ጋላስ እያ ኬን ኦሶና፤
አራታ ቦላ ኡትዳይስ ኤንታዉ ኩያ ግዳና።
16 ህዛፐ ጉየ፥ ኤንቲ ኮሻቶኮና፥ ሳሞቶኮና።
አው ዎይኮ ምሽ ኤንታ ሜና።7:16 እሳ 49:10.
17 አራታ ግዶን ኡትዳ ዶርሳይ ኤንታ ሄማና።
ደኦ ፑልቶ ሃኮ ኤንታ ካለና።7:17 ማዝ 23:1፤ ህዝ 34:23፤ ማዝ 23:2፤ እሳ 49:10፤ እሳ 25:8.
ፆሳይ ኤንታ አይፈፐ አፉ ኡባ ቁቻና"
ያግስ።