ዮሃንሳ ቆንጨ 18

ባብሎነ ኩንደ

1 ያትድ፥ ግታ ማት ደእያ ሀራ ኪታንቾይ ሳሎፐ ዎሽን ታ በአስ። ሄ ኪታንቹዋ ቦንቾይ ሳአ ፖእስስ። 2 ሄ ኪታንቾይ ባ ቃላ ቁ ኦድ፥

"እያ ኩንዳሱ! ግታ ባብሎነይ ኩንዳሱ!

ባብሎነይ ቱና አያናት አቅያ በሲ ግዳሱ።

ዱማ ዱማ ኢታባታስ ኬ ግዳሱ፤

ቱና ካፎትነ ዶአት ሸምፕያ በሲ ግዳሱ።✝18:2 እሳ 21:9፤ ኤርም 51:8፤ ቆን 14:8፤ እሳ 13:21፤ ኤርም 50:39.

3 አሳ ኮቸ ኡባ ባ ላይማተ ዎይንያ ኡሻሱ።

ሳኣ ካዎት ኢራ ላይማትዶሶና።

እ ሚኮተፈ ደንዶይሳን

ቢታን ደእያ ዛልአንቾት ዱረትዶሶና"

ያግስ።✝18:3 እሳ 23:17፤ ኤርም 51:7.

4 ሄሳፈ ጉየ፥ ታ ሳሎፐ ሀይሳዳ ግያ ሀራ ቃላ ስአስ።

"እ ናጋራ ኢራ ኮፆና መላነ፥

እያ ኤካናዉ ደእያ ሴራ ህንተ ኤኮና መላ፥

ታ ደርያዉ ኢፐ ከይተ።✝18:4 እሳ 23:17፤ ኤርም 51:7.

5 ህዛ፥ እ ናጋራይ ሳሎ ጋካናዉ ዶረትስ።

ፆሳይ እ ናቁዋ አኬክስ።✝18:5 መ 18:20.

6 እያ እምዳይሳ መላ ዛሪድ እዉ እምተ።

እያ ኦዳ ኦሱዋስ ናምኡ ኩሸ እዉ ዛርተ።

እያ ጊግስዳ ኡሻ ቦላ ህንተ ናምኡ ኩሸ ማይያ ኡሻ እ ፁአን ኩንተ።✝18:6 ማዝ 137:8፤ ኤርም 50:29.

7 እያ ባዉ ቦንቸትዳይሳዳነ እዉ እንጀትዳይሳ መላ፥

እዮ መቶተነ ካዮይተ።

እያ ባ ዎዛናን፥

‘ታኒ ካዌዳ ኡታስ፤ ታ አዝን ባይና ማጫስ ግድከ፤

ታኒ ኡባካ ካዮትከ’ ያጋሱ።

8 ሄሳ ግሾ፥ ቦሻ ኡባይ፥

ሀርገይ፥ ካዮይነ ኮሽ እዮ እስ ጋላስ ኦይካና።

ቃስ እያ ታማን ፁገታና፤

አይስ ጊኮ፥ እ ቦላ ፕርድያ ፆሳይ ዎልቃማ"

ያግስ።✝18:8 እሳ 47:7-9.

9 "ኢራ ላይማትዳይሳትነ እ ሚኮተን ደእዳ፥ አላምያ ካዎት ሄ ካታምያ ፁገትን ከይያ ጩያ በእዳ ዎደ እዉ ዋስድ ዬካና።✝18:9 ህዝ 26:16-17. 10 ኤንቲ ሄ ካታመ ዋይያ በእድ ያይዳ ግሾ፥ ሃክ ኤቅድ፥

" ‘ሀ ግታ ካታመ! ዎልቃማ ካታመ!

ባብሎነ፥ ነና አየ!

ኔኒ እስ ሳተ ግዶን ነ ፕርዳ ኤካዳሳ’ ያጋና።

11 "ኤንታ ማርካብያ ጫና ህዛፐ ሻምያ አስ ባይና ግሾ፥ ሳአን ደእያ ዛልአንቾት ሄ ካታማስ ዋሳናነ ካዮታና።✝18:11 ህዝ 27:31. 12 ኤንታ ዎርቃ፥ ብራ፥ ቦንቾ ሹቹ፥ አልኦ ሹቻ፥ ካሎሰ ማኦ፥ ሊኖ ማኦ፥ ሃረ ማኦ፥ ዞኦ ማኦ፥ ዱማ ዱማ ሳዎ ም፥ ዳንጋርሳ ዛለ፥ አልኦ ም፥ ናሰ ብራታ፥ ጎለ ሹቹ፥✝18:12 ህዝ 27:12-13፥ 22. 13 ቃራፋ፥ ቅማመ፥ እፃነ፥ ካርበ፥ ሽቶ፥ ዎይነ፥ ዛይተ፥ ሎኦ ለ፥ ግስተ፥ መሄ፥ ዶርሰ፥ ፓራ፥ ፓራ ጋረ፥ አይለታነ ሀራ አሳታ ሻምያ ኦንካ ባዋ።

14 "ዛልአንቾት ማጫሴኮ፥ ‘ኔኒ አሞትዳ ሎኦባ ኡባይ ኔፐ ይስ። ነ አቆይነ አሌቀትዳባ ኡባይ ኔፐ ሃክስ። ኔኒ ዛራዳ ኤንታ ኡባ ደማካ’ ያግዶሶና። 15 ሄ ካታማን ዛልእድ ዱረትዳ ዛልአንቾት እ መቱዋ ባብድ ኢፐ ሃክድ ኤቃና። ኤንቲ ዬካናነ ካዮታና።✝18:15 ህዝ 27:31. 16 ቃስ፥

" ‘ሊኖ፥ ካሎሰ ማኦነ ዞኦ ማኦ ማአዳ፥

ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀትዳ፥

ሄ ግታ ካታሜስ አየ! 17 ሀይሳ መላ ግታ ሻሎ ኡባይ እስ ሳተ ግዶን ይስ’ ያግዶሶና።

"ማርካብያ ላግያ ኡባይ፥ ማርካብያን ብያ ኡባይ፥ ማርካብያ ቦላ ኦያ ኡባይነ አባን ዛልእያ ኡባይ ሃክ ኤቅዶሶና።✝18:17 እሳ 23:14፤ ህዝ 27:26. 18 ሄ ካታምያ ፁገትን ከይያ ጩያ በእዳ ዎደ፥ ‘ሀ ግታ ካታምዉ ዳንያ ሀራ ካታም ደእሻ?’ ያግዶሶና።✝18:18 ህዝ 27:32. 19 ኤንቲ ባንታ ሁጰን ባና ቆልድ፥ ዋስዶሶናነ ካዮትዶሶና።

" ‘አባ ቦላ ማርካበት ደእያ ኡባይ፥

እ ሻሉዋን ዱረትዳ ኡባይ፥

ሄ ካታምያ እስ ሳተን ይዳ ግሾ፥

አየ! አየ!

20 ሳሉዋዉ፥ እ ዩዋን ኡፋይታ!

ጌሻቶ፥ ሀዋረቶ፥ ናበቶ፥

ፆሳይ ህንተ ግሾ እ ቦላ ፕርድዳ ግሾ ኡፋይትተ’ ያግዶሶና።"✝18:20 ህዝ 27:30፤ ዛረ 32:43፤ ኤርም 51:48.

21 ያትን፥ ምኖ ኪታንቾይ ዎፃ ዳንያ ግታ ሹቹ ደንድ አባን ሆልሸ፥ "ግታ ካታምያ ባብሎነይ ዎልቃን ሆለታዳ ሀይሳዳ ኩንዳና፤ እያ ሀችፈ ጉየ ኡባካ በንቱኩ።✝18:21 ኤርም 51:63. 22 ዲ ዲፀይሳትነ የፀይሳት፥ ሱሱልኤነ ሞይዘ ፑነይሳት፥ ህዛፐ ጉየ ነ ግዶን ኡባካ ስኤቶኮና። አይ ኮቻ ዛልኤ ዛልእያ አስካ ነ ግዶን በንተና። ዎፃ ግርስ ህዛፐ ጉየ ነ ግዶን ስኤተና።✝18:22 እሳ 24:8፤ ህዝ 26:13.✝18:22 ኤርም 7:34፤ 25:10. 23 ፆምፐ ፖኦይ ዛሪድ ነ ግዶን ፖኤና። ማቾ ኤከይስነ አዝና ገልያር ቃል ህዛፐ ጉየ ነ ግዶን ስኤተና። ነ ዛልአንቾት ቢታ ኡባን ኤረትዳ ዎልቃማታ። ነ ብታን ካዎተታ ኡባ ጭማዳሳ" ያግስ።

24 ናበታ ሱይ፥ ጌሻታ ሱይነ ቢታ ቦላ ሀይቅዳ አሳ ኡባ ሱይ እ ግዶን በንትዳ ግሾ ባብሎነይ ፕርደታሱ።✝18:24 ኤርም 51:49.