ግታ ላይማ ማጫስዉ
1 ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ "ሃያ፤ ዳሮ ሃታ ቦላ ኡትዳ ግታ ላይማትያ ማጫሰ ቦላ ያናዉ ደእያ ፕርዳ ታ ነና በሳና።17:1 ኤርም 51:13. 2 አላምያ ካዎት ኢራ ላይማትዶሶና፤ አላመን ደእያ አሳይካ እ ላይማተ ዎይንያ ኡይድ ማትዶሶና" ያግስ።17:2 እሳ 23:17፤ ኤርም 51:7.
3 ሄ ኪታንቾይ ታና ጌሻ አያናን መላ ቢታ ኤፍስ። ያን እስ ማጫስያ ጫሻ ሱንይ እ ቦላ ኡባን ፃፈትድ ኡትዳ፥ ዞኦ ዶኣ ቶግዳሮ በአስ፤ ሄ ዶኣስ ላፑን ሁጰይነ ታሙ ካጨይ ደኤስ።17:3 ቆን 13:1. 4 ሄ ማጫስያ ካሎሰ ማኦነ ዞኦ ማኦ ማአሱ፤ እያ ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀታሱ። እያ ባ ኩሸን ቦርስያባነ ላይማተ ቱናተን ኩምዳ ዎርቃ ፁአ ኦይካሱ።17:4 ኤርም 51:7. 5 እ ሶምኦን ፁራ ኦሶ ብርሸይ ደእያ ሱንይ፥ "ግታ ባብሎነይ፥ ላይማተስነ ሳአን ደእያ ቱናባ ኡባስ አዮ" ግያ ፁፈይ ፃፈትድ ኡትስ። 6 ቃስ ሄ ማጫስያ ጌሻታ ሱነ የሱሳስ ማርካትሸ ሀይቅዳይሳታ ሱ ኡያዳ ማትዳሮ ታ በአዳ ማላለታስ።
7 ኪታንቾይ ታኮ፥ "ኔኒ አይስ ማላለታይ? ታኒ ነዉ ማጫሰ ፁራ ኦዳነ እያ ቶክዳ ላፑን ሁጰይነ ታሙ ካጨይ ደእያ ዶኣ ፁራ ኦዳ ኦዳና። 8 ኔኒ በእዳ ዶአይ ኮይሮ ደኤስ፥ ሽን ሀእ ባዋ። ሄ ዶአይ ጪሞ ኦላፈ ከይድ ዮስ ባና። ሳእ መቶሳፐ ዶምድ፥ ደኦ ማፃፋን ኤንታ ሱንይ ፃፈትቦና ሳአን ደእያ አሳይ፥ ዶኣ በእድ ማላለታና። ህዛ፥ እ ካሰ ደኤስ፤ ሀእ ባዋ፥ ሽን ስንፈ ያና።17:8 ዳነ 7:7፤ ቆን 11:7፤ ማዝ 69:28.
9 "ሀይስ ጭንጫተነ አኬካ ኮዬስ። ላፑን ሁጰት ማጫስያ ኡትያ ላፑን ደረታ፤ ሄሳት ቃስ ላፑን ካዎታ። 10 ኤንታፈ እቻሹ ካዎት ኩንድዶሶና። እሶይ ሀእ ጋካናዉ ሃሬስ፤ ሀንኮ ካዎይ ይቤና። እ ይድ ጉ ዎደ ታካናዉ በሴስ። 11 ስን ደእዳ ዶአይ፥ ሀእ ባይናይስ፥ እ ባ ሁጰን ሆስፑን ዶኣ። እ ላፑን ዶአታፐ እሱዋ፤ እ ያናዉ ቤስ።
12 "ኔኒ በእዳ ታሙ ካጨት ሃሮ ዶምቦና ታሙ ካዎታ። ሽን ኤንቲ ዶኣራ እስፈ እስ ሳተ ካዎትድ ሃራናዉ ኤንታዉ ማት እመታና።17:12 ዳነ 7:24. 13 ኤንታ ኡባስ እስ ቆፋይ ደኤስ፤ ኤንቲ ባንታ ዎልቃነ ባንታ ማታ ዶኣስ እማና። 14 ኤንቲ ዶርሳራ ኦለታና፥ ሽን ዶርሳይ ጎዳታ ጎዳነ ካዎታ ካዎ ግድያ ግሾ፥ እ ፄግዳይሳት፥ ዶርዳይሳትነ አማነትዳይሳት ሄ ካዎታ ፆናና" ያግስ።
15 ኪታንቾይ ቃስካ ታኮ፥ "ላይማትያራ ኡትዳ ሄ ኔኒ በእዳ ሃት ያራታ፥ ካዎተታ፥ ዘረታነ ዱማ ዱማ ዶናን ኦደተይሳታ። 16 ቃስ ኔኒ በእዳ ታሙ ካጨይነ ዶአይ ላይማትያሮ እፃና። ኤንቲ እዉ ደእያ ኡባባ ኤካና። ቃስ እዮ ካሎ አሻናነ እ አሹዋ ምድጋና፤ ያትድ ኤንቲ እዮ ታማን ፁጋና። 17 ህዛ፥ ፆሳ ቃላይ ፖለታና ጋካናዉ ኤንታ ቆፋይ እስኖ ግዳና መላ ኤንቲ ባንታ አይስያ ዎልቃ ዶኣስ እማናዳነ ፆሳይ ቆፕዳይሳ ኤንቲ ኦናዳ ኤንታ ዎዛናን ፆሳይ አሞ ዎስ። 18 ሄ ኔኒ በእዳ ማጫስያ ሳአ ካዎታ ሃርያ ግታ ካታምዉ" ያግስ።