ላፑን ማታመይ ዶየትስ
1 ዶርሳይ ላፑን ማታምያ ዶይዳ ዎደ ባጋ ሳተ ግደይሳ መላ ሳሎይ ስእ ግስ።
2 ሄሳፈ ጉየ፥ ታኒ ላፑን ሞይዘት እመትዳ ላፑን ኪታንቾታ ፆሳ ስንን ኤቅዳይሳታ በአስ።
3 እፃነ ጩይስያ ዎርቃ ሻተ ኦይክዳ ሀራ ኪታንቾይ ይድ፥ ያርሾ በሳ ማታን ኤቅስ። እ አራታ ስንን ደእያ ዎርቃ ያርሾ በሳ ቦላ ጌሻታ ኡባ ዎሳራ ጉጅድ ያርሻና መላ እያዉ ዳሮ እፃነይ እመትስ። 4 እፃንያ ጩያይ ጌሻታ ዎሳራ እስፈ ኪታንቹዋ ኩሸፐ ፑደ ፆሳኮ ከይስ። 5 ሄሳፈ ጉየ፥ ኪታንቾይ እፃነ ጩይስያ ሻትያ ኤክድ፥ እያን ያርሾ በሳፈ ቦንቆ ታማ ኩንድ ሳአ ዱገ ሆልስ። ያትን ደሾይ፥ ዎልአን፥ ግርስነ ቢታ ቃፆይ ሀንስ።8:5 ሌወ 16:12፤ ህዝ 10:2፤ ከሳ 19:16፤ ቆን 11:19፤ 16:18.
ላፑን ሞይዘታ
6 ሄሳፈ ጉየ፥ ላፑን ኪታንቾት ባንታ ሞይዝያ ፑናናዉ ጊገትዶሶና።
7 ኮይሮ ኪታንቾይ ባ ሞይዝያ ፑንያ ዎደ ሻችነ ሱራ ዋላከትዳ ታም ሳሎፐ ቡክስ። ሳኣፐ ስኮይ ፁገትስ፤ ምፈ ስኮይ ፁገትስ፤ ጭልኦ ማታ ኡባይ ፁገትስ።8:7 ከሳ 9:23-25፤ ህዝ 38:22.
8 ናምአን ኪታንቾይ ባ ሞይዝያ ፑንዳ ዎደ ዎልቃማ ዙማ ዳንያባይ ታማን ኤፅሸ አባን የገትስ። ያትን፥ አባፈ ስኮይ ሱ ግድስ። 9 አባን ደኦን ደእያ መተፈ ስኮይ ሀይቅስ፤ ማርካበታፐ ስኮይ ይስ።
10 ሄን ኪታንቾይ ባ ሞይዝያ ፑንዳ ዎደ ፆምፐዳ ኤፅያ ዎልቃማ ፆልንቶይ ሻፋፐ ስኩዋ ቦላነ ፑልቶታ ቦላ ሳሎፐ ዎስ።8:10 እሳ 14:12. 11 ሄ ፆልንቱዋ ሱንይ ጫሞ ጌተቴስ። ሃፈ ስኩዋ ጫምስስ፤ ሃይ ጫምዳ ግሾ፥ ዳሮ አሳይ ሄ ሃ ኡይድ ሀይቅዶሶና።8:11 ኤርም 9:15.
12 ኦይዳን ኪታንቾይ ባ ሞይዝያ ፑንስ። አዋፐ፥ አጌናፐነ ፆልንቶታፐ ስኩዋ ደችስ፤ ኤንታ ፖኡዋፐ ስኮይ ምስ። ጋላሳፐ ስኮይ፥ ቃማፈካ ስኮይ ምስ።8:12 እሳ 13:10፤ ህዝ 32:7፤ እዩ 2:10.
13 እስ አርጋን ሳሎ ቁ ግድ፥ ፕራሽን በአስ። ሄ አርጋንይ ባ ቃላ ቁ ኦድ፥ "አትዳ ሄ ኪታንቾት ባንታ ሞይዝያ ፑናናዉ ደእያ ግሾ፥ ሳአን ደእያ አሳ አየ! አየ! አየ!" ያግሽን ስአስ።