ዉርሰ ቦሻታ
1 ታኒ ሳሎን ሀራ ግታነ ማላልስያ ማላታ በአስ። ፆሳ ዉርሰ ሀንቁዋ ቆንጭስያ ላፑን ቦሻታ ኦይክዳ ላፑን ኪታንቾት ደኦሶና።
2 ቃስ ታማራ ዋላከትዳ ቡርጩኮ አባ ዳነይሳ በአስ። ሄ አባ ጋፃን ዶኣ፥ እያ ምስልያነ እያ ሱን ታይቡዋ ፆንዳይሳታ በአስ። ፆሳይ ኤንታዉ እምዳ ዲ ኦይክድ ኤቅዶሶና። 3 ኤንቲ ፆሳ አይልያ ሙሰ ማዝሙርያነ ዶርሳ ማዝሙርያ ሀይሳዳ ያግድ የፆሶና።
"ጎዳዉ፥ ኡባፈ ዎልቃማ ፆሳዉ፥
ነ ኦሶይ ግታነ ማላልስያባ።
ደረ ኡባ ካዋዉ፥
ነ ኦገይ ፅሎነ ቱማ።15:3 ከሳ 15:1.
4 ጌሽ ነ ፃላላ ግድያ ግሾ፥
ጎዳዉ፥ ነዉ ያዮናይነ
ነ ሱን ቦንቾናይ ኦኔ?
ነ ፅሎ ኦሶይ አሳ ኡባስ ቆንጨ ግድያ ግሾ፥
ካዎተ ኡባይ ነ ስን ይድ ጎይናና"
ያግድ የፆሶና።15:4 ኤርም 10:7፤ ማዝ 86:9.
5 ሄሳፈ ጉየ፥ ሳሎን ዶየትድ ደእያ ፆሳ ኬ፥ እካ ማርካተ ዱንካንያ በአስ።15:5 ከሳ 38:21. 6 ላፑን ቦሻታ ኦይክዳ ላፑን ኪታንቾት ፆሳ ኬፈ ከይዶሶና። ኤንቲ ጌሽነ ጶልያ ሊኖ ማኦ ማእዶሶና፤ ባንታ ትራን ዎርቃ ዳንጮ ዳንጭዶሶና። 7 ኦይዱ መተታፐ እሶይ፥ መርናዉ ደእያ ፆሳ ሀንቆይ ኩምዳ ላፑን ዎርቃ ፁአታ ላፑን ኪታንቾታስ እሚስ። 8 ፆሳ ቦንቹዋፈነ እያ ዎልቃፈ ደንዶይሳን ፆሳ ኬይ ጩያን ኩምስ። ላፑን ኪታንቾት ኦይክዳ ላፑን ቦሻት ፖለታና ጋካናዉ ፆሳ ኬ ኦንካ ገላናዉ ዳንዳእቤና።15:8 ከሳ 40:34፤ 1 ካዎ 8:10.