ሉቃሳ ዎንገላ 20

የሱሳ ማታይ ኦይሸተ

1 እስ ጋላስ የሱሲ ፆሳ ኬን አሳ ታማርስሽንነ ዎንገላ ማርካትሽን፥ ካህነ ሀላቃት፥ ህገ አስታማረትነ ደርያ ጭማት እስፈ እያኮ ይድ፥ 2 "ኔኒ ሀይሳታ አይብ ማታን ኦያኮ ኑስ ኦዳ። ሀ ማታ ነዉ እምዳይ ኦኔ?" ያግድ ኦይችዶሶና።

3 እ ኤንታኮ፥ "ታካ ህንተና እስባ ኦይቻና፥ አነ ታዉ ዛርተ። 4 ፃማቅያ ዮሃንሳ ፅንቃተይ ፆሳፈየ አሳፔ?" ያግስ።

5 ኤንቲ ዎል ግዶን ያግድ ዞረትዶሶና፦ "ፆሳፈ ጊኮ ያትን፥ አይስ አማንበከቲ?" ያጋና።

6 "አሳፐ ጊኮ፥ አሳ ኡባይ ዮሃንስ ናበ ግደይሳ አማንያ ግሾ ኑና ሹቻን ጫዳና።"

7 ያንያ ግሾ፥ "አዉፐኮ ኑ ኤሮኮ" ያግድ ዛርዶሶና።

8 የሱሲ ዛሪድ፥ "ህዛ፥ ታካ አይ ማታን ሀይሳታ ኦያኮ ህንተዉ ኦድከ" ያግስ።

ጎሻንቾታ ሌምሶ

9 ሄሳፈ ጉየ፥ የሱሲ ያግድ ሀ ሌምሱዋ አሳስ ኦድስ፦ "እስ አስ ዎይነ ቶክስ። ጎሻንቾታስ ከራ እምድ ዳሮ ዎደ ጋምእድ ያናዉ ሀራ ቢታ ብስ።✝20:9 እሳ 5:1. 10 ዎይነ አይፍያ ማፅያ ዎደይ ጋክን ዎይነ አይፍያፐ እያዉ የዳና መላ ጎሻንቾታኮ ባ አይልያ ኪትስ። ሽን ጎሻንቾት ሄ አይልያ ኦይክድ ዋድ መላ ኩሸ የድዶሶና። 11 ካልድካ ሀራ አይልያ ኪትስ። ቃስ ጎሻንቾት እያ ዋድ፥ ካዉሽድ መላ ኩሸ የድዶሶና። 12 ሀእካ ዛሪድ ሄን አይልያ ኪትስ። ጎሻንቾት እያካ ማዱንፅስድ ዎይነ ጋድያ ግዶፈ ጋፃ ከስድ የግዶሶና።

13 "ዎይነ ጋድያ ጎዳይ፥ ‘ያትን ታ አይ ኦ? አነ ቃስ ታ ዶስያ ታ ናአ የዳና፤ ኦን ኤር ኤንቲ እያ ቦንቾና አጎኮና’ ያግስ።

14 "ሽን ጎሻንቾት ኡራ ናአ በእዳ ዎደ፥ ‘ሀይስ እያ ላታናይሳ፥ ሃ ዪተ እያ ዎና፥ ያትኮ ላታይ ኑስ ግዳና’ ያግድ ዞረትዶሶና። 15 ዎይነ ጋድያ ግዶፈ ጋፃ ከስድ ዎዶሶና። ያትን፥ ዎይነ ጋድያ ጎዳይ ሄ አሳታ ዋታኔ? 16 ይድ ሄ ጎሻንቾታ ይሳና፥ ዎይነ ጋድያ ሀራ አሳታስ እማና። አሳይ ሄሳ ስእዳ ዎደ ‘ሽንቻለ ሄሳ መላባ ጋፎ’ ያግዶሶና።

17 "የሱሲ ኤንታ ጫድ ፄልድ፥

" ‘ያትን፥ ግምበ ኬፅያ አሳት ቦርዳ ሹቻይ፥

ኬስ ማላነ ምኖተ እምያ ኡባፈ አያ ሹች ግድስ’

ጌተትድ ፃፈትዳይሳ ብርሸይ አይቤ?✝20:17 ማዝ 118:22. 18 ሄ ሹቻ ቦላ ኩንድያ ኡባይ ቆፀታና፥ ሹቻይ እያ ቦላ ዎያ ኡባይ ሊቃና" ያግስ።

19 ህገ አስታማረትነ ካህነ ሀላቃት ሀ ሌምሶይ ኦደትዳይ ኤንታ ቦላ ግደይሳ ኤርድ ሄ ዎደ እያ ኦይካናዉ ኮይዶሶና፥ ሽን አሳስ ባብዶሶና።

ጊራባ

20 ሄሳ ግሾ፥ የሱሳ ደርያ ሃርያ ሮመ ካዋ ማታስ አድ እማናዉ ኮይድ እያ ዶናፐ ባላ ቃላ ናጎሶና። ሄሳ ፖልሳናዉ ፅሎ ዳንድ ጭምያ አሳታ እያኮ ኪትዶሶና። 21 ኪተትድ ብዳ አሳት፥ "አስታማርያዉ፥ ኔኒ ኦደይስነ ታማርሰይስ ልከ ግደይሳ፥ ቃስ ፆሳ ኦግያ ቱማተን ታማርሰይሳነ ኦናካ ሻኮናይሳ ኑ ኤሮስ። 22 ሀኖሽን፥ ሮመ ካዋስ ጊራ ጊራናዉ በሲ በሰኔ?" ያግድ እያ ኦይችዶሶና።

23 ሽን እ ኤንታ ዎዛና ኢታተ ኤርዳ ግሾ፥ 24 "አነ ታና እስ ሳንትመ በስተ፥ እያ ቦላ ደእያ ምስለይነ ሱንይ ኦደባዬ?" ያግስ።

ኤንቲ ዛሪድ፥ "ሮመ ካዋ ቄሳረይሳ" ያግዶሶና።

25 እ ዛሪድ፥ "ያትኮ፥ ቄሳረባ ቄሳረስ፥ ፆሳባ ፆሳስ እምተ" ያግስ።

26 ሄሳ ግሾ፥ እ ዛርዳ ዛሩዋን አሳ ስንን ባላ ደማናዉ ዳንዳእቦኮና። እያ ዛሩዋን ማላለትድ ስእ ግዶሶና።

ሀይቆፐ ደንዶባ

27 ሀይቆፐ ደንዶይ ባዋ ግያ ሳዱቃወታፐ እሶት እሶት የሱሳኮ ይድ፥✝20:27 ሀዋ 23:8. 28 "አስታማርያዉ፥ እስ አስ ማቾ ኤክድ ናአ የሎና ሀይቅኮ፥ እያ እሻይ ሄ ማጫስዉ ኤክድ ናይታ የልድ ባ እሻስ ኮቸ አሻና መላ ሙሰይ ፃፍስ።✝20:28 ዛረ 25:5. 29 ሄኮ ላፑን እሻት ደኦሶና። ኮይሮይስ ማቾ ኤክድ ናአ የሎና ሀይቅስ። 30 ናምአንይ እዮ ኤክድ ናአ የሎና ሀይቅስ። 31 ሄንይካ ሄሳ ሀንስ። ላፑናት ኡባይ ሄሳዳ ሀንድ እዮ ኤክዶሶና፥ ሽን ናአ የሎና ሀይቅዶሶና። 32 ዉርሰን ማጫስያ ሀይቃሱ። 33 ህዛ፥ ላፑን አደይ እዮ ኤክዳ ግሾ ሀይቆፐ ደንድያ ዎደ እያ ኦደ ማቾ ግዳኔ?" ያግድ ኦይችዶሶና።

34 የሱሲ ዛሪድ፥ "አሳይ ሀ ዎድያን ኤኮሶናነ ገሎሶና። 35 ሽን ሀይቆፐ ደንድድ ያና አላምያን ዳናዉ በሰይሳት ኤኮኮናነ ገሎኮና። 36 ኤንቲ ኪታንቾ መላ ግድያ ግሾ ስንፈ ሀይቆኮና። ሀይቆፐ ደንድዳ ግሾ ኤንቲ ፆሳ ናይታ። 37 ሙሰይ ጎዳ፥ ‘አብራሃመ ጎዳ፥ ይሳቃ ጎዳ፥ ያይቆባ ጎዳ’ ግድ ቱሽያ ግዶን ፁገትያ ታማ ታርክያ ፃፍዳይሳን ሀይቅዳ አሳይ ደንደይሳ በሴስ።✝20:37 ከሳ 3:6. 38 ኡባይ እያዉ ደኦን ደኤይሳታ ግድያ ግሾ እ ደኦን ደኤይሳታ ጎዳፐ አትሽን፥ ሀይቅዳይሳታ ጎዳ ግደና" ያግድ ዛርስ።

39 ህገ አስታማረታፐ እሶት እሶት፥ "አስታማርያዉ፥ ሎኦባ ኦዳዳሳ" ያግዶሶና። 40 ሄሳፈ ጉየ፥ ሀራ ኦይሾ ኦይቻናዉ ያይዶሶና።

ክርስቶስ ኦደ ናኤ?

41 እያፐ ካልድ የሱሲ ኤንታኮ፥ "አሳይ ክርስቶሳ ዋትድ ዳዊታ ናአ ያጎና? 42,43 አይስ ጊኮ፥ ዳዊቲ ባ ሁጰን ባ ማፃፋን፥

" ‘ፆሳይ ታ ጎዳኮ "ታ ነ ሞርከታ

ነ ቶሆይ የያሶ ኦና ጋካናዉ

ታፐ ኡሻቻ ባጋን ኡታ" ግስ’ ያግስ።✝20:42-43 ማዝ 110:1.

44 "ህዛ፥ ዳዊቲ ክርስቶሳ፥ ‘ጎዳ ግድ ፄግሸ እያዉ ናአ ዋንድ ግዲ?’ " ያግስ።

45 ደረይ ኡባይ ስእሽን ባ ታማረታኮ፥ 46 "አዱሳ ማኦ ማእድ ዩሸ ዶሰይሳታፐ፥ ግያን ቦንቾ ሳሮ፥ አይሁደ ዎሳ ኬን ቦንቾ ኦይደ፥ ሞከትያ ሶንካ ቦንቾ በሲ ኮይያ ህገ አስታማረታፐ ናገትተ። 47 ኤንቲ አምኤታ ኬ ካሎዮሶና፥ ፅሎ አስ ዳንድ ዎሳ አዱሶሶና። ሄሳት ኡባፈ አያ ኢታ ፕርዳ ኤካና" ያግስ።